اســتراحــة

القرار

2010-03-23T06:41:00.000-07:00

تخيل معايا وانت مروح على بيتك كان قدامك طريقين للبيت
وانت اخترت طريق منهم ، وفى الطريق قابلت البنت اللى كنت بتحبها زمان وقضيت ليلة حزينة تسترجع فى زكريات الماضى
لو كنت خدت الطريق التانى ما كنتش قابلتها خالص ، وساعتها كنت هتقضى ليلة مختلفة تماما
ده موقف بسيط جدا فى الحياة وبيكرر الاف المرات
البنى ادم بيحصلوا الاف المواقف اللى قرارته فيها بتفرق كتير معاه ، بس عشان ربنا رحيم بينا خلى معظم القرارات دى مش مباشرة
يعنى انت مش بتفضل تحسبها امشى من هنا ولا امشى من هنا وتعمل دراسات تقضى بسببها خمس سنين فى الشارع لحد ما تاخد القرار الصح ، ده لو خدته اصل
كل ما فى الموضوع انك بتمشى وخلاص .. ايوا هى كده بتمشى وخلاص
وعشان ربنا رحيم بنا ومش عاوزنا نبقى مجانين رسمى ، وعارف اد ايه القرارات مسئولية رهيبة تخر منها الجبال هدا ، عشان كده خلى معظم القرارت بيده هو وحده ولم يترك لنا الا القليل جدا جدا جدا جدا ، ويارتنا قادرين عليهم
معظم تحركاتك هى قرارات مصيرية .. سواء لاحظت او لم تلاحظ

عن النفس البشرية

2010-03-18T19:40:00.000-07:00

البوست ده بكتبه وانا .. مش عارف انا حاسس بأيه ..حاجات كتير اوى

نخش فى الموضوع

كل اللى جاى عبارة عن حاجات قديمة مرفوعة عاليوتيوب وانا واخد بعض تعليقات الناس وحاطيطها

اولا : اغنية البنات البنات لسعاد حسنى

1- اغنية جميلة اوييي إحنا كنا بنغنيها و احنا عند جدو بس الصبيان كانوا بيقولولنا البنات البنات صراصير البلاعات هههههههههايام تحفة اوي

2- بجد دموعى نزلت انا بحب الايام دى اوى

ثانيا : اغنية توت توت لعبد المنعم مدبولى

1-
لماذا قطار الطفولة هرب مسرعا ليتركنا ها هنا والله ابكتني هذه الاغنية لاني كنت احبها موووووووووووت

2-
الله يرحمك ياجدو عبده ويجعل مثواك الجنةالواحد افتكر نفسه لما كان صغير اقسم بالله ايام لاتعوض

3 - الله عليك والله ماما الله يرحمها كانت بتغنيهالنا قبل النوم كل يوم يااااااااااااااه كانت ايام

4 - ما قدرت امسك دموعي ..أيام وراحت

ثالثا : اغنية انا انا ابريق الشاى لسيد ملاح

1 - اجمل ايام الواحد عشهاكنت لازم اسمعها قبل ماروح المدرسة

2-
يالله غباار افتكر كان عندنا شريط وما يعدي يوم الا ولازم اسمعلووطبعا لازم التمثيل الحركي اندماج كامل هههه p:

3 - اول شي ايامكم سعيده ثاني شي عاشت ايدك اخوي العزيز الي رفعت هذا الفديو الرائع, رجعتني 16 سنه ليوره . عاشت مصر ام الدينا اخوك حسن من العراق

رابعا : اغنية جوايز للشطار ليلى نظمى

1- انا عاوزه جوايز كنت بزعل وانا صغيره عشان مخدتش زيهم

2- انا و واحد صاحبى كنا ماشين فى شوارع المعادى انهارده وعمالين نفتكر الاغنيه دى ونضحك , دخلت مخصوص عشان ادور عليهااا. جامده مووووووووووووووت

خامسا : اغنية سوسة كف عروسة عفاف راضى

1- بجد اشكركم هاي اغنية اختي الصغيره ما كانت تنام الا لما نغنيها ليها ......ياااااه صارت عروس الان

2- اغنية المنبه بتاعى لازم اصحا عليها كل يوم مرسيه ليك او ليكى اوووووووووى

3- اه واه على زمان واياااام زماانوالله الواحد جسمه بيقشعر اما يقعد يتقرج ع.الحاجات دى

سادسا : اغنية هم النم عفاف راضى

1- ياه الله يحفظك يا أمي، كانت جايبالنا الشريط ده أنا و أخويا و احنا أطفال، و النهارده احنا عايشين كل واحد في بلد :(اشتقت لك يا أمي

2- انا عندي 27 ولحد دلوقتي اقف في مطبخ واغني الاغنيه دي وانا بعمل الاكل وزمان قالوا الجزر بيقوي النظر ويخلينا خفاف الدم

3- بجد يا جماعه بلاش الاغاني دي بالرغم من جمالها بس الواحد بيتعب منها لانه بيحن لزمن ماضي وبيعيش في زمن ماضي ويحب يترك الواقع

سابعا : اغنية حلوة يا زوبة

1- مش ملاحظين حاجه ان اغاني الاطفال زمان كانت بتعلم الاطفال ان الفقر مش عيب بالعكس بتخليهم فخورين باهلهم وببيتهم وبتين ديما ان الاسرة البسيطة جميلة وسعيدة مش زي دلوقتي كل الفضائيات مش بتظهر غير الاطفال الاغنياء والعاب غالية جدا وعيشة مختلفة تمام عن الواقع

2 - ااااااااااااااااااااااااااه زمان فين ايام زمان ايام البراءه وراحه البال

ثامنا : اغنية زهب ( الكيبورد ما بتكتبش الزال) زهب الليل محمد فوزى

1- اكتب كلماتى ودموعى تسبق الحروف شوقا وحنينا الى الماضى الجميل وايام راحت بحلاوتها ولم يبقى الا الذكريات الجميلة والشوق والحنين لايام لن تعود ولن انساها ما حييت

2- بجد رجعتنى لوقت كنت فيه بجد باعرف أفرح

تاسعا : مقدمة مسلسل المال والبنون

1- نفش الشعور...اتجنب مشاهده مقاطع التلفزيون القديمه....ارتبطت كثيرا بفتره الطفوله والبراءه والفرح..لذلك مشاهده هذه المقاطع تذكرنا بواقعنا الملئ بالهموم

2- ياه احنا نزلنا من المستوى العالى اللى كنا فيه للمستوى المتدنى ده ازاى حاجة عجيبة

*****************************************************

البوست المرة دى يا اما تقول ايه الهبل ده يا اما تخرج منه بأثر كبير جواك ، مافيش وسطية

فى النهاية اختم بكلمات رائعة لسيد حجاب فى مقدمة مسلسل ليالى الحلمية

ومنين بيجى الهوا .. من ائتلاف الهوا

ومنين بيجى الشجن .. من اختلاف الزمن

كلمة للتاريخ

2010-03-15T10:20:00.000-07:00

عالم الحيوان وسينما الاطفال والشيخ الشعراوى بعد الصلاة ونادى السينما والعالم يغنى وتاكسى السهرة وغيرها وغيرها

الحاجات دى بقت فجأة حاجات قديمة برغم انها واقعيا ما مرش عليها كتير

كأننا كنا فى عالم تانى خاااااااااااااااالص

المهم اللى عاوز اقوله ان احنا اخر جيل شاف كل حاجة مع بعضه وله حاجات مشتركة فعلا

دلوقتى مع كتر الفضائيات والانترنت وعالم الخيال العلمى اللى احنا عايشين فيه ، اصبحت الاجيال الجديدة متفرقة الانتمائات

يعنى مثلا زمان كنا كلنا بنسمع العلم والايمان كبار وصغيرين وكلنا كنا بنسمع توم وجيرى كبار وصغيرين

لكن دلوقتى ليه الطفل يسمع العلم والايمان - لو اتعرض - وهو ممكن يجيب سبيس تون

ليه اسمع الشيخ الشعراوى وانا ممكن اجيب ميلودى

ليه اسمع المسلسل وانا ممكن اجيب قناة الناس

ليه اشوف التلفزيون اساسا وانا ممكن اخش عالنت

اراهنك لو لقيت فى زماننا اليوم الولاد فى شارعك فى اى حتة فى مصر بيلعبوا كورة ساعة العصرية والبنات فى ركن تانى بيلعبوا فتحى يا وردة

بمناسبة فتحى يا وردة ، حد عاقل يقولى يا جدعان ما هو الهدف من تلك اللعبة ومتى تنتهى

ببساطة

2010-03-05T10:53:00.000-08:00

حقيقة الدنيا مؤلمة لدرجة ان الناس لا يعترفون بها

لو كنت واقعيا فى تلك الحياة سيحرقك الحزن كالنار الهشيم

ولو كنت خياليا سيسجنك التمنى فى دروبه اللامتناهية

يتبقى لنا حتى نعيش ان نتغاضى عن كنه الحياة .. لنستمر

my status

2010-02-04T10:35:00.000-08:00

انا لست من هو اراد ان يكون كما انا

راية الحزن ترفرف خفاقة فى جوانب روحى ونشيد اليأس الوطنى تعلو اصداؤه بين جوانبى

انا مصدوم

انا حائر

انا لست من هو اراد ان يكون كما انا

2009-03-05T18:29:00.000-08:00

لو فى سلام فى الأرض وضمان وامن

لو كان مافيش ولا فقر ولا خوف وجبن

لو يملك الانسان مصير كل شىء

انا كنت اجيب لدنيا ميت الف ابن

الرحلة

2008-08-09T02:01:00.000-07:00

اجدع مسا متغلف بكلمة وحشتونى على أحلى بلوجارية
يارب أكون وحشتكوا زى ما انتوا وحشنى
والله يا جماعة البلد اللي اسمها مطروح دى من أجمل بلاد الدنيا ، على الأقل فى وجهة نظر العبد لله ، انا بروح هناك بحس إن الدنيا بتضحك مع انى من النادر جدا لما بشوفها بتعمل كده ، اصل بعيد عنكو الدنيا دى كشرية حبتين
المهم تعالوا احكلكوا عن رحلة المتعة اللي أنا قضتها
اللقطة الأولى : قبل الرحلة بأيام بدأ يطاردني كابوس في نومي أن سيارتي تنقلب بي أنا واصدقائى في طريقنا إلى مطروح ويموت الجميع إلا أنا ، وظل ذلك الكابوس يطاردني كلما نمت ، حتى قررت أن اذهب مواصلات وليكن قليلا من التعب أفضل من أن افتح باب الحقيقة لذلك الكابوس اللعين بيدي
اللقطة الثانية : في عربة المترو انظر حولي فأرى واحدة بشعرها وأخرى منقبة وثالثة محجبة ، وارى جلباب وبنطلون وكلاسيك وكاجول
كل أصناف البشر أراها امامى في عربة واحدة
نحن عندنا كل الثقافات ومن المفروض ان تلك التعددية تجعلنا أفضل حالا لكنى اكتشفت أننا نفتقد الشيء الذي يوصل تلك الحلقات لتكون عقدا مبهرا ، نحن نفتقد إلى الإيمان بالآخر ، كل منا يؤمن أن طريقته هي التي يجب أن تسود وما الآخر إلا رجس من عمل الشيطان
بهذا تتحول تلك التعددية إلى نقمة تضربنا لأسفل سافلين
اللقطة الثالثة : يصل القطار إلى محطة مطروح ورغم تعب السفر إلا أن عربات كنس التعب تنطلق داخلي واجد النشاط يدب فجأة في كياني
القائل بأن متعة الوصول للغاية تنسيك تعب الطريق صادق بلا شك
اللقطة الرابعة : يمر التاكسي من أمام البحر في طريقنا إلى الشقة التي سنسكن بها
بحر مطروح بألوانه الثلاثة يجعلك تأخذ نفسا عميقا وتغمض عينيك متخيلا الرسالة الكامنة داخل تعدد الألوان ، انك لن تتمتع مرة ولا اثنان بل ستكون متعتك ثلاثة أضعاف
اللقطة الخامسة : تلمس قدماى البحر لتسرى تلك القشعريرة الباردة في اوصالى والتي تنتهي مع أول غطسة لي في المياة الصافية
ونفس تلك القشعريرة تصيبك عندما تغادر المياه إلى الخارج ، إنها ضريبة التغيير التي لابد أن تدفعها ، والا فلتبقى مكانك كما أنت
اللقطة السادسة : دخلت السينما وكونت الانطباعات الآتية عن الأفلام التي شاهدتها
بوشكاش ، يحاول من خلاله محمد سعد تدمير نفسه بمنتهى القوة وبحماس يحسد عليه
كباريه ، فيلم يحاول أن يقول شيئا ما ، وعلى ايه حال فأي شيء أفضل من لا شيء
كابتن هيما ، سأمتنع عن الحكم على هذا الفيلم فأنا اكره تامر حسنى وبهذا من الممكن أن يكون حكمي ظالما ، وسبب كرهي لتامر حسنى أن أغانيه تذكرني بالغزل الصريح ، وأنا أرى أن ذلك كفيل بأن يدمر هالة الرومانسية التي حوله
حسن ومرقص ، لا أحب هذه النوعية من الأفلام فأنا أرى أن ناتجها يكون عكسي تماما ، وان كانت فكرة الفيلم هذه المرة جيدة
أسف على الإزعاج ، يثبت احمد حلمي أن فيلم كده رضا لم يكن ضربة حظ ، ويضع نفسه بقوة في مقدمة ممثلي مصر
اللقطة السابعة : قبيل الفجر وأمام البحر الساحر والذي يجبر العقول على التأمل ، يسألني صديقي لماذا نحن هنا في هذه الدنيا
والحقيقة أن الإجابة الكلاسيكية أن الله خلقنا حتى نعبده أجدها ناقصة نوعا ما
فالله خلقنا هنا حتى نعبده وهذا غرضه هو ، لكن ما هو غرضنا نحن
مثلا عندما يكون هناك مدير ويعين ( يخلق ) موظفا جديدا في شركته فغرضه أن يستفيد بخبرته ومجهوده ويزيد ربحيته
لكن هذا لا يعنى أن ذلك هو غرض الموظف أيضا ، فالموظف له غرض مختلف كأن يربح هو المال ويكون أسرة ويصرف عليها وهكذا
الأمر عميق جدا ، كعمق ذلك البحر الهادر الشاهد على نقاشي بصديقي
اللقطة الثامنة : هناك شاطىء في مطروح يسمى عجيبة تحفة طبيعية من صنع المولى تعالى
كلما ذهبت هناك اشعر بصفاء روحي من التقاء الماء مع صخرة عجيبة الشاهقة في تناغم عجيب
لكن عندما يضاف إلى ذلك موسيقى من فرقة شعبية تعزف أغانيها فهنا تصبح المتعة اكبر من أن يحتملها قلبي
قضيت هناك لحظات من أحلى لحظات حياتي
اللقطة التاسعة : أنسى ( البشكير ) في الشقة ، لأجد نفسي مضطرا بعد خروجي من المياه أن أسير إلى الشقة دون استحمام أو أن أغير ملابسي
أسير دون أن يكون مظهري شاذا أو ملفتا الكل يمر حولي دون أن يثير مظهري اهتمامهم ، أتخيل لو حدث ذلك في مدينتي أو مدينة اى فرد ممن يمروا حولي ، كان الأمر سيأخذ وضعا مختلفا تماما
سبحان الله على البشر يضيقوا الخناق على أنفسهم حتى يلجأوا لمعشوقتهم الشكوى
اللقطة العاشرة : الملم اغراضى في حقيبتي مستعدا للرحيل ، بعد أن قضيت هنا أياما اقل ما توصف بالسعيدة من حرية وضحك من القلب ومتعة وانطلاق وراحة نفسية وصفاء روحي
ولتبدأ رحلة العودة والتي دائما ما تكون كئيبة حتى أعود إلى غرفتي لأكتب إليكم الآن
كل مصيف وانتوا طيبين ، وبحبك يا مطروح

انا مبسوط

2008-07-27T19:07:00.000-07:00

هييييييييييييييييييييييييه
انا رايح معشوقتى ومحبوبتى والبلد اللى قضيت فيها احلى ايام فى حياتى
انا رايح اصيف فى مرسى مطروح
السعادة دلوقتى هى الحاجة اللى ممكن اوصف بيها احساسى
انا بجهز شنطتى لأنى رايح الجنة بتاعتى عالأرض
انا راحل الى عالم النشوة
جايلك يا مطروح
جايلك انا وصحابى عشان نملاكى جرى وضحك ولعب وغنى
دى المرة التانية اللى ازور فيها مطروح مع صحابى
راجع انا وصحابى لهناك عشان نجرى ساعة الفجر ونخطط ملعب تنس على البحر وكل واحد يعمل نفسه روجيه فيدر واحنا بنلعب بمضارب ركت اساسا بس احنا عملناها تنس واى كلام يا عبد السلام
وطبعا فيه حكم واكيد هو زى اللاعيبه حافظ اسم اللعبة بالعافية ، بس ربنا بيسهل وبنلعب وواحد بيفوز مننا وما تسألوش ازاى
راجع انا وصحابى على هناك عشان نقعد فى شط الغرام على الصخرة بتاعتنا اللى هناك ونغنى محتاج لعنيك يا ليل باللهجة الفلاحى اللى بنغنى بيها الغنوة دى ، ونفضل نغنى ونضحك لحد ما الشمس تغرب ونقولها باى بااااااااااااااااااااى
راجع انا وصحابى على هناك عشان نبلبط فى البحر الساحر ، واركب على كتاف اسلام كعادتى وكل مرة بيبقى على وشك يغرق لولا ان ربنا ستار ، واغيظه واقوله انت تخرس خالص انا جايبك بمليون جنيه عشان اغرقك اساسا
راجع انا وصحابى على هناك عشان نروح عجيبة ونجيب كوبايتين شاى تمام ونطلع فوق اعلى حتة فى الصخرة والناس كلها عمالة بتتفرج عالمجانين اللى فوق اللى مليين الدنيا ضحك
جايين ليكى يا مطروح نقعد على شطك بالليل وناكل بيتزا بالجمبرى او بمعنى اصح هم ياكلوا بيتزا بالجمبرى وانا بصفتى ما باكلش جمبرى ( وما حدش يضحك بخباثة ، انا عارف مصيبتى ) فبجيب بيتزا بالفراخ ، ونألف فى اغانى انا وشريف ونلحنها ونبقى مستكنيصين اوى من اللى بنعمله
جايلك يا مطروح ارمى هموم الدنيا ، واضحك من قلبى واغنى بعلو حسى واطلع لدنيا لسانى واقولها ضحكت عليكى وسرقت منك لحظتين حلوين
الساعة دلوقتى خمسة الفجر والمفروض انى انام لأنى هسافر بكرة المغرب وعاوز انام شوية حلوين ، وان شاء الله اشوفكوا على خير بعد ما ارجع ، وهتوحشونى بجد الكام يوم دول
امانة خلى بالكوا من المدونة وبقى شقروا عليها شوفوا يمكن محتاجة حاجة كده ولا كده ، وكل مصيف وانتوا بخير

التاريخ يعيد نفسه

2008-07-19T17:37:00.000-07:00

فى نفس الدقيقة ..
فى مكان ما على كوكب الأرض احدهم يضحك ، واخر فى مكان اخر تمتلىء عيناه بالدموع
فى نفس الدقيقة ..
هناك من يتثاءب ، وهناك من يستيقظ
فى نفس الدقيقة ..
هناك من يحارب ، وهناك من يسالم
فى نفس الدقيقة ..
هناك من يجرى ، وهناك من يجلس ، هناك من يرقص ، ومن يغنى ، ومن يموت ، ومن يولد
من يأكل ومن يقضى حاجته
دائما هناك كل شىء
فى دقيقة واحدة تحدث كل الأحداث التى مرت بتاريخ الأرض
اذا فعمر الأرض قياسا بالأحداث لا يتعدى دقيقة واحدة
نحن عبارة عن فريق اوركسترا كبير يعزف سيمفونية مدتها دقيقة واحدة ، وعندما تنتهى يتبادل كل فرد آلته مع الاخر
البيانو مع التشلو ، والفلوت مع الكمان
ثم تعاد عزف نفس السيمفونية تماما ، ولمدة دقيقة واحدة
وهكذا
الى ان يشاء الله
يقولون ان التاريخ يعيد نفسه
انه يعيد نفسه بسرعة اكبر مما نتخيل
انه يعيد نفسه .. كل دقيقة

واجب وجب حله

2008-07-15T21:43:00.000-07:00

الواجب ده جالى من صديقتي اسماء صاحبة مدونة ( كلام وخلاص ) ، وانا بشكر الدكتورة اسماء على اهتمامها وبقولها ثانك يو فيرى ماتش
نخش بقى على الواجب واللى عبارة عن انى أقول ست حاجات عن نفسي ماحدش هيكتشفها لو قابلنى للمرة الأولى
بسم الله الهادى المعين ، نبدأ نجاوب
اولا مش هيعرف انى بحب القراية والكتابة لأنى ما بجبش سيرة حبى للأتنين دول غير مع حد بيحبهم هو كمان ، وببقى فرحان قوى انى لقيت حد بيحب القراية زيى ، لأنى هقدر اتناقش معاه وافيده واستفيد
ثانيا مش هيعرف انى نفسى فى يوم من الأيام يكون عندى استديو تصوير مجهز ، اشتغل فيه فى وقت فراغى ، اصل انا بعشق التصوير جدا ، وفرحتى لما باخد صورة حلوة بتبقى نفس فرحتى لما بكتب موضوع يعجبنى
ثالثا مش هيعرف انى ببص فى عنيه دلوقتى عشان اكتشف شخصيته واكون معلومات عنه ، واللى على اساسها هحدد علاقتى بيه ، اصل انا مؤمن جدا ان العيون بتفضح كل حاجة مدفونة جوا البنى ادم ، ومن النادر لما تحليلى لعنين حد يطلع غلط
رابعا مش هيعرف انى حافظ القران كله على اساس ان مظهرى مش مدى خالص على واحد متدين ، فصعب ان يجى فى خياله ان انا حافظ القران
خامسا مش هيعرف انى واثق من مستقبلى وانه هيكون كويس جدا ان شاء الله ، لدرجة انى احيانا بقول لنفسى هو انا مغرور ولا ايه وبعدين انا جايب الثقة دى كلها منين
سادسا مش هيعرف انى متقلب جدا لأن اللى ظاهر للناس شخصية مستقرة ما بتتغيرش كتير ، بس الشخصية دى انا عملها زى ستارة وراها تغيرات بالهبل وتقلبات شبه يومية بتحصل
كده ممكن تقولولى كفارة ، انا خلصت الواجب
تمام كده يا ست اسماء ، دبستينى بس ربنا كرمنى وعديت
فاضل بس انى اقول اسماء خمس مدونات ادبسهم فى الواجب ده
ارسم نظرة شريرة ، واضحك ضحكة شرير معروفة من ايام الأبيض واسود واقول هدى الواجب ده لمين
اولا مدونة سمراء
ثانيا مدونة مقتطفات
ثالثا مدونة دواير
رابعا مدونة صباح الخير يا مصر
خامسا مدونة نعكشة
وسلامو عليكو

( تسبيحات شيطان )

2008-07-09T17:22:00.000-07:00

انا رجل فى السبعين من عمرى ..
عهدت نفسى طوال حياتى صابرا .. كان الصبر – وما زال – اهم ملمح وابرز علامة لشخصيتى .. واحقاقا للحق ، فلم تنمو داخلى تلك الميزة من مثابرة منى او حسن تدبير الا انها كانت هبة من الله ومنحة فاضلة لا تستحق منى الا ان اكون عبدا شكورا حامدا الله على رزقه وعظيم نعمته
ولم تنشأ داخلى تلك الخصلة فجأة ، او فى مرحلة عمرية معينة ، الا انها وجدت معى منذ طفولتى ومع سنينى الأولى على تلك الدنيا
فكيف انسى وانا مازلت طفلا فى السادسة من عمرى ، اختلف مع اختى الصغيرة – رحمها الله – فأحرق عرائسها انتقاما لنفسى .. لتبكى هى لأبى ، ويأتى هو ليوجعنى بقبيح الألفاظ ناعتا تصرفاتى بالحماقة .. ورغم ما كان يخلف ذك داخلى من ألم ، الا انى .. صبرت
وكيف انسى ذلك العصفور الذى اتى به ابى وانا فى نحو الثامنة من عمرى تقريبا ، ليحظى باهتمام اسرتى وعنايتها .. الا انه كان بالنسبه لى ليس الا مجرد شىء مزعج يوقظنى كل يوم من نومى بزقزقته اللعينة التى هى عندى نباحا وانكر الأصوات .. ولهذا فقد قررت باحسانى ونبل اخلاقى ان اخلصه من محبسه فى قفصه واطلق سراحه عند بارئه يرفرف فى جناته مختالا فرحا .. فسكبت عليه قليلا من الجاز ، وبعود ثقاب واحد انهيت المسألة .. ليأتى ابى ويقف مشدوها امام منظره ويوجعنى بعدها ضربا وسبابا .. الا انى احتملت كل ذلك .. وصبرت
على هذا المنوال عشت حياتى .. ومن اشباه هذه المواقف واجهت الكثير فى اطوار عمرى من طفولة وصبا وشباب .. حتى انى عندما نويت الزواج واخترت شريكة حياتى .. قمت بفحوصات طبية قبل الارتباط لأكتشف عدم قدرتى على الانجاب .. لكنى اخفيت ذلك عنها وتزوجتها حتى لا يشاركنى احد فى ثواب الصبر والاحتساب
وبدأت حياتى الوظيفيه تاجرا يحبو نحو النجاح .. هازما الصعاب مروضا للظروف حتى امن الله عليا بالفلاح لأصبح من اهم التجار فى السوق ، ليس لى الا منافسا واحدا ، وفقنى الله لقتله .. فلم يكن يصلى ، ولا يستحق امثال هذا الا القتل او ما هو اشد وطأ .. ورغم كل ما اثير حولى من اقاويل ، ورغم كل الشبهات التى مستنى الا انى كنت جلدا متيقننا من نبل اغراضى .. فتخطيت كل ذلك .. وصبرت
والان بعد ان مرت بى السنون ووصل العمر الى ارذله .. انهيت كل تجاراتى واوقفت كل اعمالى ، فلم تعد الصحة كما كانت ولم تعد النفس تشتاق للعمل كسابق عهدها .. وبما انى لا املك صديقا او حبيبا يؤنس وحدتى – ولا اريد – فقد اتجهت لشغل فراغى بتربيه القطط .. اهتم بها وأرعاها حتى تعتادنى واعتادها واشعر انها اخذت حيزا من قلبى ، وهنا تصدمنى الحقيقة .. فقد شارك الله فى الفؤاد شريك .. ولا استطيع ان احتمل عذاب ضميرى وخوفى من عقاب الجبار ، فأقوم بسلخ جلد القطة وهى حية تسعى اسمع مواء اقرب الى الصراخ ، واحتمل حتى يقبل الله توبتى ويغفر لى .. ثم اضعها فى ماء يغلى لتلفظ انفاسها الأخيرة امام عينى وانا متجلدا حابسا الامى محتسبا اجرى عند الله .. ثم امزق بطنها واخرج احشائها واتركها على حالتها بعد ان اغلق الغرفه عليها .. لأتى بعد يوم او يزيد فأفتح الغرفة واجلس وسط تلك الرائحة العفنة اشتمها ولا تهتز لى شعره او تأخذنى شفقة فقد اغضبت الله ، ومن اجل ان يقبل توبتى عانيت ما عانيت .. وصبرت

حكاية جمعة وكل جمعة

2008-07-02T10:22:00.000-07:00

( هذه القصة وقعت أحداثها في مدينة الأغبياء )
سار الشيخ في طريقه إلى مسجد المدينة ، ومازال يردد الخطبة التي سيلقيها على الناس بعد قليل ، لا يعنيه إن كانت الخطبة مكررة ، أو بلا مضمون حقيقي ، لكن كل ما يعنيه أن تكون الآيات والأحاديث محفوظة جيدا حتى لا يخطئ عندما يرددها فوق المنبر
فالناس لن تعترض عليه لو ألقى خطبة مكررة ، لكن مجرد التلفظ بآية بشكل غير سليم ، يثير امتعاض الناس ، ويفقد بعدها هيبته بينهم
أقام المؤذن صلاة الجمعة ، وصعد الشيخ إلى المنبر وبدأ حديثه عن عاشوراء ، فغدا هو يوم عاشوراء ، وان لم تكن الخطبة عن هذه المناسبة قد يذهب الشيخ إلى الجحيم وتصبح الصلاة باطلة
وانقسم المصلون في المسجد إلى فرق ، فريق غط في نوم عميق ، وفريق آخر شرد في هموم الدنيا مستغلا تلك اللحظات التي ينفرد فيها بنفسه دون أن يقطع احد أفكاره ، وهناك فريق اكتفى بالتطلع لوجوه المصلين في محاولة لقتل الوقت بأي شكل
هناك أيضا بالمسجد أطفال اصطحبهم ذويهم دون أن يعرف طفل منهم لماذا هو هنا ، وما هي الحكمة ؟
كل ما يعرفه انه لابد أن يكون هنا كل يوم جمعة لأنه يجب أن يكون هنا
على الجانب الآخر وفى بيوت المصلين ، تجلس الزوجة تقشر البطاطس ، وتحضر الغداء ، وتفتح التلفزيون على خطبة الجمعة التي يلقيها مفتى المدينة ، وهى أيضا عن عاشوراء ، ولا تدرى من الذي سرق الآخر ، المفتى هو الذي سرق خطبة شيخ المسجد أم العكس
هي نفس الخطبة بالآيات والأحاديث وكأنها أنزلت من السماء
أقام المؤذن الصلاة ، وارتص الناس في صفوف ليؤدوا الفريضة الإلهية ، وهناك في الصف الأخير حيث يوجد الأطفال ، تسمع صوت ركلات ولطمات ، فكلا منهم لا يعرف قيمة لوجوده هنا ويحاول أن يخلق لوقته قيمة

الضعف البشرى

2008-06-19T08:41:00.000-07:00

القاعدة المعروفة ان الأقوى والأكثر استقلالية هو الذي يملك غذاؤه
بناء على هذه القاعدة فالجنس البشرى ضعيف جدا مقارنة بباقي الكائنات الحية
نحن نعتمد في غذائنا على النبات والحيوان ، لا نستطيع أن نستمر ونبقى إلا ببقاء النبات والحيوان
أما الحيوانات فتعتمد في غذاءها على النبات او بافتراس بعضهم البعض ، دون حاجة لنا كجنس بشرى
والنبات – وهو الجنس الأقوى – يعتمد على نفسه اعتمادا كليا دون حاجة لأي كائن أخر مهما كان
إذا فالحياة على ارض هذا الكوكب بالنسبة للحيوانات او النباتات ، من الممكن أن تستمر بل وتزدهر لو انتهينا نحن ، ولن تتأثر الحياة بنهايتنا
لكن بالنسبة لنا نحن فالانقراض هو النهاية المحتومة لنا لو انتهت حياة النباتات أو الحيوانات
نحن إذا الأضعف ولا شك ، نحن الجنس الأقل استقلالية على ارض هذا الكوكب
نحن نعقد الاتفاقيات ونصرخ ونهدد بل ونتقاتل ، من اجل أن يستمر النبات ، ونقيم المحميات ونصرف اموالنا من اجل تربية الحيوان
والحقيقة أن كل هذا ليس حبا في الطبيعة ، فنحن لا نحافظ على الكائنات الأخرى إلا لحاجتنا ولغرض واضح وهو أن نبقى
ولك أن تتخيل ماذا لو كنا مستقلين كما هو الحال في النبات مثلا ، اترك العنان لخيالك وانظر ماذا ترى
ماذا أريد أن أصل من كلامي ؟ ، لاشيء ، فقط أردت أن أوضح لكم حجمنا الطبيعي على ارض هذا الكوكب
أردت أن أوضح إن إحنا واقفين بخسارة عالدنيا دى

الجهل بالنفس

2008-06-03T09:59:00.000-07:00

كلما شاهدت نفسي في تسجيل فيديو ، استغرب نفسي فعلا ، واجدنى مشمئزا منى ، وأتعمد أن أقدم اى لقطة تحوى داخلها صورتي
وكلما سمعت تسجيل صوتي لنفسي ، أجد أن صوتي سيء جدا ، واشعر بالاشمئزاز أيضا ، ولا استطيع أن أكمل الاستماع ، حتى أنى مؤخرا قررت أن امتنع عن الاستماع أو مشاهدة ذاتي
والحقيقة أن هذا لا يحدث لي وحدي بل كل منا عندما يرى نفسه يشعر بنفس الحالة التي تنتابني
وبالرغم من شعورك بأنك غريب ، وان ( شكلي كان وحش في اليوم ده ) ، إلا أن الباقين يروا انك كنت طبيعيا جدا ويؤكدوا لك انك كنت في حالة جيدة ، ولا داعي للمبالغة
السؤال الذي ينطق به الذهن الآن ، ما هو السبب في تلك الحالة الغريبة التي تشعر بها عندما تشاهد نفسك ؟؟
في وجهة نظري المتواضعة أن السبب يرجع لنقص المعلومات في عقلك عن ذاتك
أنت تستطيع أن ترى الآخرين وتتفاعل معهم ، وتكون عنهم فكرة ورأى ، وتنطبع صورة لهم في عقلك تتحرك على أساسها ، بدليل انه عندما يحيد احدهم عن ما كان معتادا منه بالنسبة لك ، تشعر بالاستغراب ، وتخبره انه ليس في حالته الطبيعية
أما بالنسبة لنفسك ، فأنت لا تراها ولا ينشغل عقلك بتكوين معلومات عن ذاتك
فعندما تأتى اللحظة التي تشاهد فيها صورتك ، تحدث صدمة راجعة إلى سببين
أولا نقص المعلومات عن مظهرك في حالات الفرح والحزن والدهشة ، وتعبيرات وجهك وجسدك المصاحبة لتلك الحالات
ثانيا إيمانك الوهمي انك تعرف نفسك ، وان ما تراه ليس هو أنت ، بالرغم انك لو طرحت على نفسك سؤال بسيط ، مثلا إذا لم تكن هذه ضحكتي فما هي ضحكتي ؟؟ ، فلن تجد إجابة محددة
هذان السببان يتضاربان في العقل وداخلك محدثين صدمة تتجسد في الاشمئزاز من نفسك
كل هذا النقص في المعلومات والجهل بالنفس في مجرد المظهر والشكل وتعبيرات الوجه وما شابه ، فما بالك بأعماق نفسك
أظن أن الجهل بها سيكون اكبر بكثير

خير نساء الأرض

2008-05-29T18:51:00.000-07:00

لن أجد أفضل من الطاهرة الوفية الحنونة ، سيدتي خديجة – رضي الله عنها – لتكون مثال حي انقل من خلاله افكارى عن الزوجة الحقيقية وتأثيرها في حياة زوجها
لن أتحدث هنا من منظور ديني ، وهذا ليس إنقاصا من قيمتها الدينية ، ولكن ما يشغلنى هنا هو الجانب الاجتماعي في حياتها
كانت سيدتي خديجة من أشراف قريش ، ذات نسب عريق ومال وفير من تجارة رابحة
وعندما أرسلت سيدنا محمد في رحلة تجارية لها ، واثبت أمانته ونزاهته ، وتقابلا مرة وأخرى في ظروف العمل ، بدأ قلبها يميل إليه ، وأنا هنا أتحدث عن القلب تحديدا ، فالعقل لا يجعلها أبدا تفكر في رجل فقير معدم ، يعمل عندها ، ولن يضيف إليها مالا أو نسب ، فهو لا يملك مال ، ولا هي ينقصها نسب
إلا أن الحب والانجذاب تملكها ، وتملك قلبها الرقيق ، حتى انه دفعها إلى أن تجاهر برغبتها في الزواج من سيدنا محمد ، وعندي يقين أن شجاعتها كانت نابعة من أمرين ، أولهما ثقتها في نفسها ، وثانيهما ثقتها في سيدنا محمد
وتواجه سيدتي خديجة قريش كلها من اجل حبها ، وتضع أصابعها في أذانها ضد كلام اى لائم أو مندهش أو حاقد أو طامع
وتسير وراء قلبها وتحدد به اختيارها ، ويمدها الحب باليقين أن محمد مختلف عن الاخرين
وعندما تم القران ، وكان لابد من وجود عش للزوجية ، وسيدنا محمد لا يملك بيتا أو مالا يبنى بها بيتا ، لم تلقى بالا سيدتي خديجة لأي نظرة اجتماعية ، وأخذت زوجها ليعيش معها في بيتها ، لتكون هنا نعم السند وتلقى بأول قطرة في سيل الحنان الجارف المتدفق منها
وكانت سيدتي خديجة نعم الزوجة في بيتها ، فاض البيت معها بالحنان والوفاء والإخلاص ، وكان حبها اكبر من الدنيا بما رحبت ، واكبر من المال زينة الحياة الدنيا ذاته ، حتى أنها حفاظا على كرامة زوجها ، أرسلت منادى ينادى في الناس أنها وهبت كل مالها وتجارتها لزوجها ، ليبقى هو عاليا ولو على حساب نفسها الطاهرة
ثم تنزل الرسالة على سيدنا محمد ويعود من خلوته فزعا ، متدثرا من شدة الرعب ، ويحكى لزوجته ما حدث ، وعلى الرغم من أن ما قاله سيدنا محمد لا يقبله العقل ببساطة ، إلا أنها آمنت بصدق زوجها ، ولم تناقشه أو تتهم عقله ، أو تزيد عليه همه ، بل قالت كلمات كتبت على جدران التاريخ بماء الذهب " لن يخذلك الله أبدا "
إنها المودة والرحمة ، إنها السكن والعون ، بالرغم من كمية العجب في الموقف ، إلا أن هذا لم يفقدها حنانها ، لأنه حقيقي وليس متكلف
لقد بثت الأمان في قلب فزع ، وداوت هموم زوجها ومخاوفه بكلمات رقيقة نابعة من قلب أنثى
ثم تتبع زوجها في رسالته الجديدة ، وتمده بكل ما تستطيع من عون ، حتى يصل الأمر إلى اختبار حقيقي لوفائها ، عندما حاصر قريش أهل الرسول في الشعب ، ومات الناس جوعا ، كانت هي بجانب زوجها ، سجينة معه في سجنه ، تلعب دورها التي ارتضته لنفسها وتبث في قلبه الأمل وان الله " لن يخذله أبدا " ، لم تمنعها تربيتها في بيت العز والرفاهية أن تضعف في المحن وتتخلى عن زوجها وقت أن ضاق الحال
وظلت حتى آخر أنفاسها العطرة تدعم سيدنا محمد وتسانده في طريقه ، ليكون لها دورا كبيرا في أن تنتشر رسالة الإسلام ، وتكون حياتها مثالا يضرب لنساء الأرض كافة
ومن الأشياء الملفتة أن الرسول – صلى الله عليه وسلم – لم يتزوج في حياة سيدتي خديجة غيرها ، فما الحاجة للجزء في وجود الكل ، واى نور يطغى فوق نور الشمس ، واى جمال ينافس جمال البدر
أيضا عاش سيدنا محمد طوال حياته ذاكرا لسيرتها العطرة ، مجاملا لصديقاتها ، غاضبا من اى كلمة سيئة تصدر في حقها
فقد زرعت هي الحب والصلاح في ارض طيبة أثمرت لها الوفاء والعرفان
وبالرغم من أنى وعدت أن أتناول الموضوع من جهة اجتماعية بحتة ، إلا انى سأختم بذلك الوعد الذي وعده رسول الله لسيدتي خديجة ، إذ قال لها أن الله يبشرها ببيت من قصب ( زبرجد مرصع ) لا صخب فيه ولا نصب
انظر إلى الوعد الالهى من جنس العمل ، فهي لم ترهق زوجها ولم يرتفع صياحها ، ولم تملأ مكانها بالصخب ، بل حل الهدوء والسكينة في عشها ، فكانت الخاتمة أن تعيش في بيت خالي من الصخب
رحمك الله يا سيدتي وادخلكى فسيح جناته ، كنتى نعم الزوجة ، حتى أن عيوني تمطر الدموع كلما جاءت ذكراك ، ولا أجد نفسي إلا داعيا الله بزوجة صالحة تسير على هديك الطاهر ، نادرا إلى المولى أن أسير على الهدى المحمدي معها في الوفاء والإخلاص

محمد الأسطورى

2008-05-23T08:25:00.000-07:00

قاعد بذاكر في امان الله ، فوجئت بصويت اشتغل في الشارع
طلعت في البلكونة جرى ، اشوف ايه اللى حصل ، وانا عمال اقول استرها يارب
فوجئت بالست اللى ساكنة جمبنا واقفة عمالة تصوت وتقول ، انت فين يا محمد ، رد على امك يا محمد ، يا حبيبى يا محمد
وبما ان أنا ما اعرفش اى حاجة عن الشارع بتاعنا فما كنتش اعرف ان محمد ده ابنها اللى عنده تلات سنين ، لدرجة انى في الأول افتكرت ان محمد ده أنا وكنت هقول ايوة يا حاجة عاوزة ايه
المهم الناس اتلمت وفهمت من حواراتهم ان محمد مختفى من الصبح وما ظهرش ، ومش بيلعب مع العيال ، يعنى من الاخر الواد ضاع
طبعا الناس تعاطفت واللى عنده عيل بيسأله ويرد العيل على ابوه ، ما شفتوش من الصبح ، وما جاش يلعب معانا
الست تسمع الكلام تهيج اكتر وتديها صويت
فضلت اتابع الوضع أنا وكل متفرجى الدرجة التالتة ( الناس اللى واقفة في البلكونات ) وبشوف الحوار هيخلص على ايه
الناس المتعاطفة وزعت نفسها على الشوارع تدور على محمد ، والكل رجع من غير ما حد يلاقيه
الست جارتنا انهارت وابتدت تجرى حافية في الشارع تستنجد بالناس يشوفوا محمد
صعبت عليا جدا ، ورغم انها ست غبية ، إلا ان الأمومة مالهاش دعوة بالعقل او الأخلاق
طبعا ما فكرتش انى انزل اساعد لأن أنا ما عرفش محمد اساسا ، ولو شفته احتمال اسأله على عيل تايه اسمه محمد
وعلى حين فجأة وفى عز ما الناس بتفكر وبتحاول توصل لمحمد ، ظهر ابنها التانى عنده ست سنين تقريبا وهو بيقول : لقيته يا ماما
الأم بسرعة سألت فين هو يا بني
- قاعد تحت الكنبة
لا حول الله يارب ، توب علينا يارب ، ارحمنا يارب ، الواد الجزمة قاعد تحت الكنبة وعامل دماغ ومستكيف في الطراوة وسايب الناس بتدور عليه
طبعا الناس ما مسكتش نفسها من الضحك ، وانا بصراحة وقعت عالأرض من الضحك ، بتعمل ايه تحت الكنبة يا حبيبى ، طب شايف امك هتجنن عليك مش تكرم معاليك وتطل عليها براسك بس تقولها ، أنا اهبل وقاعد تحت الكنبة يا ماما
الله يحرقك بجاز يا محمد ، وانا لو مكان امه احلف عليه يفضل تحت الكنبة اسبوع ، طالما هو بيعزها قوى كده
بس بأمانة أنا مبسوط من الواد ده ، اهو فك الغم اللى كان الواحد بيشوفه في الورق وخلانى اضحك وعمل شو حلو
ياما تحت الكنب عجب

الامتحان .. اهو جه يا ولاد

2008-05-16T10:54:00.000-07:00

في مساحة 1002000 من كوكب الأرض تمثل دولة مصر ، دخل دلوقتى عدد 18963250 من سكان المساحة دى وانا واحد منهم – تقريبا أنا رقم تسعة - فى نوبة مرضية تسمى الامتحانات
العدد المهول اللى فات ده تلاقيه دلوقتى يا عينى عمال يلف حوالين نفسه وجاله صداع وتشنجات وخزعبلات و جنش – مرض بتجيبه الامتحانات – وكوابيس مزعجة وحالته ما يعلم بيها إلا ربنا
العدد اللى فات ده المفروض انه طلب العلم لمدة سنة ، وده الوقت اللى الوزارة بتتأكد فيه ان العلم رد عليهم لما طلبوا ولا نفضلهم ، وعشان الوزارة ادت الطلبة دول النمرة غلط من الأول اساسا ، فالطالب بيتزنق زنقة سودة ، والجنش يخش عليه على طول
وفى الفترة دى من السنة وكل سنة ، بينقسم الطلبة لقسمين ، قسم مسكين ما فتحش كتاب من اول السنة ، وقسم تانى مسكين برضه مذاكر ومظبط نفسه
واللى مش مذاكر مسكين لأنه مش عارف حاجة وراسه وقعت على سدره من الحاجات اللى عمال يعبيها فيها في وقت قليل ، واللى مذاكر مسكين لأنه لغى عقله واهمل حياته وضيع عمره وترس نفسه في حاجة عقيمة وتربى التخلف
والنوعين اللى فاتوا من الطبلة بيبقى مزنوق وحالته كرب ، ده في عرض درجة عشان ينجح ، والتانى في عرض درجة عشان يخش كلية قمة او يطلع الأول عالدفعة ويبقى معيد
وفى الفترة دى بيبدأ كل واحد مسكين مش عارف حاجة ، يدور على واحد عارف يساعده ويشرحله واللى عارف بيبص للى مش عارف وفى علامة تعجب مرسومة على وشه ، ازاى ما ذاكرش ومش عارف حاجة خالص
واللى مش عارف بيقوله انقذنى وادينى الحقنة بسرعة ارجوك محتاجة الجرعة ، وفى علامة حلوف مرسومة على وشه
ويبتدى مكن التصوير يشتغل ومصر كلها تتغرق ورق ، وبالمرة بوجه رسالة شكر للى اخترع مكن التصوير وبقوله الله ينور يا معلم
وبما ان أنا واحد من المساكين اللى مش عارفين اى حاجة في اى حاجة ، ومزنوق دلوقتى وبكتبلكم وقدامى تل من الورق شكله يموت من الضحك ، فدعولى الله يكرمكو ، ودعوة قليلة تمنع بلاوى كتيرة
ادعولى انى اقدر اسيطر على اعصابى واذاكر الكلام الغبى اللى في الورق ده ، او بمعنى ادق اقدر احفظ الكلام اللى في الورق ، لأنه مكتوب عليه ضد الفهم
ادعولى ان ربنا يرزقنى دايما بواحد ابن حلال يشرحلى ويروضلى الفك المفترس اللى قدامى ده
ادعولى ان ربنا يكرمنى والامتحانات تيجى سهلة وما تجيش تعقد الواحد في عيشته ، ويخرج علينا بني ادم يقول الامتحان سهل وبسيط وفى مستوى الطالب المتوسط
ادعولى انى اقدر اسيطر على نفسى وما خرجش دلوقتى اسمع مسرحية مدرسة المشاغبين اللى اشتغلت في التلفزيون
ارحمنا يااااااااااااااااااااااااااااااااااااااااااااااااااااااااااااااااااارب

العادة السرية

2008-05-04T09:14:00.000-07:00

المرادى يا جماعة أنا هتكلم في موضوع حساس شوية ، وهو العادة السرية ، والحساسية بتاعة الموضوع ده مش راجعة لكونه ظاهرة او حاجة شاذة وهسلط عليها الضوء
، الحكاية مش كده خالص ، لأن الموضوع منتشر وموجود وحقيقة واقعة ما حدش يقدر ينكرها على الأقل مع ذاته
طب السؤال البديهى هنا ، ليه الكلام في الحكاية دى فيه حساسية ؟؟
وبصراحة أنا فكرت كتير ، وقررت انى اكون واضح مع نفسى عشان اوصل لأجابة واضحة واقرب للحقيقة
وتوصلت ان الولاد مع نفسهم بدون وجود بنات ، بيتكلموا في الموضوع عادى بدون اى كلفة او حساسية
ونفس الحكاية برضه تقدر تطبقها على البنات
اذا النتيجة المنطقية ان الحساسية راجعة للأختلاط بين الجنسين ، يعنى من الاخر مكان فيه ولاد وبنات وتذكر سيرة الجنس ، هنا بتلاقى الحساسية وجدت البيئة المناسبة اللى تكون فيها
والكلام ده بيودينا لنتيجة مهمة جدا – من رأيى الشخصى – وهى ان الموضوع في حد ذاته مش حساس لكن الحساسية راجعة لعوامل خارجية
والنتيجة اللى فاتت دى تقدر تطبقها على الكلام في الجنس عامة ، لكن خلينا نكون اكثر تحديدا ونتكلم في موضوعنا الرئيسى اللى هو العادة السرية
بداية البيئة اللى بتنشأ فيها العادة السرية في مجتمعنا ، مكونة من دين بيضع قيود على الجنس وبيحدده بنظام اجتماعى واضح اللى هو الجواز ، وبعدين المجتمع اللى بيضع قيود على القيود ، يعنى بيضع قيود على الجواز ويعقده بعادات وتقاليد وقيود مادية وما شابه
ده طبعا في وجود مثيرات بتزيد كل يوم وسائلها سواء التكنولوجية او الواقعية
وفى وسط ده كله بتوجد طاقة جنسية ربنا خلقها فينا ، ومش تحت سيطرتنا لأن الموضوع فسيولوجى بحت ، ولازم الطاقة دى تعبر عن نفسها
وعشان الانسان مش عاوز يغضب ربنا ويخالف الدين ، وفى نفس الوقت مش عارف يخوض القنوات الشرعية ، فبتظهر العادة السرية كحل بديل ومسكن له تأثيره
والعادة السرية مالهاش اى دعوة بالتعليم او الثقافة او اى حاجة من الحاجات دى ، لأن ببساطة الموضوع زى ما قلت فسيولوجى بحت ، يعنى التركيب الجسمانى والحاجات الرئيسية عند العالم هى نفسها عند انسان بسيط عادى ، وعلم النفس قسم الحاجات الرئيسية للأنسان عامة في جوع وعطش وجنس
واهمية العادة السرية بتظهر – وكلامى بمنتهى الوضوح – في محاولتك التخلص منها في لحظات معينة بتحس فيها انك قرفان وعاوز تخلص من الموضوع ده
وهنا بتبتدى توضع خطط وتضغط على نفسك وتشد من عزمك ، وده اكبر دليل على اهمية الموضوع ، يعنى لو كان بسيط كنت بطلته ببساطة ، لكن انت دلوقتى في محاولة لمواجهة حاجاتك الطبيعية الفطرية ودى مواجهة قاسية جدا
والعادة السرية قائمة على الخيال ، وده بيخلينى اوصل برضه لنتيجة مهمة – في وجهة نظرى – ان الخيال شىء مؤثر جدا ، لدرجة انه بيخلى جسمك يشتغل وغددك تدور وتؤدى وظائفها كاملة بدون وجود واقع ملموس
يعنى ماكنة بطلع عيش من غير ما يكون في عجينة لمجرد انك وهمت الماكنة ان في عجينة
ودى حاجة ما ينفعش نعديها بالساهل ابدا
طيب ايه الخطأ الحقيقى في ممارسة العادة السرية ؟؟
من وجهة نظرى ان الخطأ الحقيقى بيظهر لما الموضوع بيتعدى حدود الأشباع الفطرى للغريزة ، وبيبقى مجرد مليان فراغ
يعنى كل ما واحد يلاقى عنده شوية وقت يقوم مليهم بالعادة السرية
وهنا الموضوع بيخرج عن الحاجة وبيدخل في دائرة ثقافة واتجاهات الشخص ذاته
يعنى في واحد في وقت فراغه ممكن يملى وقته باشباع لنصه الفوقانى ، وواحد يملاه بأشباع لنصه التحتانى ، كل واحد واتجاهاته في الحياة
في النهاية احب اقول ان البنى ادم محصور بين قيود دينية ومجتمعية وحاجات فسيولوجية ، وعشان كده اضطر الانسان انه يلجأ للتحايل ويخترع بعقله وبقوة الحاجة اللى جواه ثغرة يقدر من خلالها يوزن المعادلة الصعبة جدا دى
واننا نقول ان الحكاية دى مش موجودة فده شغل نعام وهروب من الواقع ، واننا نقول نقضى على العادة السرية خالص فده غباء وجهل ، لكن اللى نقدر نقوله ان التنظيم والرقى بالتفكير والخروج من دائرة المتعة لمجرد المتعة هو الحل الأمثل
يعنى انت لو متجوز او انتى متجوزة – والكلام هنا للمسرفين – فمستحيل تقدر مثلا تمارس العلاقة الحميمة – حلوة العلاقة الحميمة دى – خمس مرات في اليوم ، مش هتعيش نايم في السرير يعنى
كما اوجد الانسان الثغرة التى يعبر بها عن ذاته ، لابد أيضا ان يعبر عن ذاته التعبير الأمثل والذى يدل على شخصية سوية

سمعنا صوتك

2008-04-27T10:37:00.000-07:00

فكرت يا جماعة إن إحنا نلعب لعبة سوا كده ، ممكن نستفيد منها كلنا
الفكرة ببساطة إن أنا هختار كلمة وليكن مثلا ( حب ) وكل واحد بيزور مدونتي يكتب في التعليقات تعريفه للكلمة دى الموجود في عقله ، التعريف اللى مقتنع بيه وشايفه انه الأحسن من وجهة نظره
بكده كلنا هنتعرف على أفكار بعض نوعا ما ، وكمان هنستفيد من ادمغة بعض
يعنى كل واحد يمكن يلاقى التعريف اللي في دماغه محتاج تعديل ويستفيد من رأى آخر شايفه أحسن
وأنا هكتب تعريفي للحاجة زيى زيكو في التعليقات ، والموضوع مش انكو تعلقوا على تعريفي ، انتوا تكتبوا تعريفكوا الشخصي ، وبعد كده مسموح بالمناقشة بينا وبين بعض في أرائنا المختلفة
هدى مثال بسيط للتوضيح
مثلا لو اخترت كلمة حب
في واحد ممكن يعرفها كالتالي : تعقيد فلسفي للعلاقة الجنسية لا مبرر له
بتهيألى كده فكرتي وضحت
عاوزين شغل نار ، وعاوزين كلنا نستفيد من بعض
على فكرة أنا مش هحتكر اختيار الكلمة وهتبقى العملية عافية على أساس إن دى مدونتي وأنا حرة فيها
ممكن كل واحد يقترح كلمة تتطرح للنقاش
أتمنى تكون الفكرة وصلت وعجبتكو ، واهى المرادى تجربة ونشوف رد فعلها
جه وقت اختيار الكلمة
امممممممممممممممممم
خلينا مثلا المرادى نختار كلمة
الحرية
خلينا نشوف تعريف كل واحد للكلمة دى ، التعريف اللي طالع من جواه
استراحة محمد ترحب بكم في كوكب افكار
انطلق

الفطرة والعاطفة

2008-04-22T14:19:00.000-07:00

أربعة رجال دخلوا هذا الاختبار
وضع الأول في موقف اختياري بين أمه وأخته وحبيبته ، كان لابد عليه أن يختار اثنين منهم حتى ينجوا من الاغتصاب أما الثالثة والتي لن يختارها فسيكون مصيرها .. الاغتصاب
لم يكن هناك سبيل للتراجع، ولا طريقة حتى ينجوا الجميع
لا يوجد شيء متاح أمامه إلا أن يختار هو بذاته الاثنين الناجيين ، أو ينفذ الوضع على ثلاثتهم بلا رحمة
وبعد نظرة انكسارية اختار الأول أمه وأخته
أما الثاني وبعد نظرة طويلة لحبيبته ، اختار أيضا أمه وأخته
وكذلك الثالث سقطت منه دمعه واختار أمه وأخته
ونهاية بالرابع الذي لم يستطع أن يرفع عينيه في حبيبته ، اختار أمه وأخته
***********
ثم كان الاختبار الثاني لنفس الأربعة
كان على كل منهم أن يختار واحدة من بين أمه وأخته لتنجو من المصير البغيض
ولم يستطع الأول أن يختار ، وسقط متوسلا طالبا الرحمة
والثاني كرر موقف الأول ، ولم يستطع أن يختار
ولم يكن الثالث مختلفا عن الآخرين ، صدرت منه صرخة الم ، صاحبها رجاء وتوسل ، ولم يستطع أن يختار
حتى الرابع عندما فقد الأمل في أن يدافع عن أمه وأخته سقط مغشيا عليه في صدمة شديدة، ولم ينطق باختيار
**********
لم يكن الأمر قاصرا على هؤلاء الأربعة ، كان هناك خامسا لم أحدثكم عنه في أول قصتي
فقد كان مختلفا عن الآخرين
عندما وضع في الاختبار الأول وطلب منه أن يختار بين أمه وأخته وحبيبته
لم يستطع أن يحتمل على اى منهم تلك النهاية
لم يستطع أن يختار
لم يقبل قلبه وإحساسه أن يرضى لأي منهم المهانة
إن كانت النجاة ، فلتكن لهم جميعا
وان كانت الخاتمة المؤسفة فلتكن عليهم جميعا
أما هو فلا يستطيع أن يحدد ، هم عنده شخصا واحدا ، وكيف يمكن له أن يجزئ الواحد
كان موقفه في الأختبار الأول كموقف الأربعة الاخرين في الأختبار الثانى

كلام من دهب 2

2008-04-20T18:56:00.000-07:00

منذ فترة ماضية كتبت موضوعا عن أهم ما قرأت وأكثر الجمل التي أثرت داخلي وانطبعت على روحي
وهاأنا أعود بجمل أخرى ، حازت اعجابى واعتبرتها من أفضل ما قرأت
يقول الكاتب الكبير توفيق الحكيم " الشيطان لا يصم أذنيه عن الدعاء " والحقيقة أن الشيطان أبدا لا يرد راغب ، يساعدك عندما يكون هدفك الشر ، ويوفر لك كل ما في طاقته حتى تصل إلى غرضك ، الذي هو في النهاية غرضه هو
أنت تريد أن تسرق مثلا ، يأتي لك هو بالفكرة العبقرية والخطة الجهنمية - اى الآتية من جهنم – حتى تتم السرقة وتتحول إلى سارق ، ويكون هو قد وصل إلى مأربه ، ولعب دوره الذي اختاره لنفسه في الحياة
هناك جملة أخرى للكاتب الكبير أنيس منصور تقول " آخر كلمة في اى شيء لم يقلها احد بعد " وهذه الجملة تدعوك إلى أن يكون لك إضافتك الخاصة ووجهة نظرك الشخصية ، فلم يضع احد نهاية لأي شيء ، قد تأتى أنت بما يهد كل ما فات ويخالفه ، ثم يأتي اخر ليهد ما أتيت به ويخلق قوانين جديدة ، وهكذا
كن دائما واثقا انك قد تأتى بالجديد ولا تنظر لما فات على انه نهاية الكلام ولا كلام بعده
وهناك أيضا حكمة بوذية قديمة لفتت انتباهي تقول " مفاتيح الجنة هي نفسها التي تفتح أبواب الجحيم " ونظرة تأملية تؤكد لك هذه الحقيقة ، فمثلا اللسان قد يكون مفتاح الخير والسعادة بالنسبة لك لو استخدم بلباقة وعرف الإنسان متى يستخدمه ومتى يمتنع ، وقد يكون مفتاح الجحيم ، لو ترك الحبل على الغارب ، وطفق الإنسان يتحدث بالحق والباطل
كذلك العلم مثلا فقد يكون وسيلة تدمير وإبادة لو وجه للشر والتخريب ، وقد يكون وسيلة إصلاح وتطوير ونشر معرفة لو وجه لما فيه الصلاح
يحضرني أيضا جملة للأستاذ محمد ابو كريشة تقول " الانحراف والاستقامة عندنا على الطريقة الغربية " والواقع يثبت صدق تلك المقولة ، فنحن إذا أردنا أن ننحرف نرى ماذا يفعل الغرب من انحرافات ونبدأ في تكرارها حتى بدون إضافات من عندنا
وعندما نريد أن نصلح نرى ماذا يفعل الغرب ، ونحاول تكرار الأمر
كأننا بلا حضارة واتجاه وفلسفة ، تفرض علينا حدود الصواب والخطأ ، وتضع أبعاد لحياتنا
اصبحنا نأخذ عنهم بعد أن كنا المصدر للعلم بالنسبة لهم
أصبحنا مجرد أغنام نسير حسب الراعي الغربي
وعندي جملة أخيرة للكاتب الكبير توفيق الحكيم تقول " الحياة اقوي من الموت " ولك أن تنظر عدد الثغرات التي من الممكن أن يدخل منها الموت لك كل يوم
مثلا من الممكن أن تصطدم بسيارة ، يسقط بك المبنى ، تأكل شيئا مسمم ، وغيرها وغيرها من الثغرات ، من أول ما تستيقظ من نومك وحتى تعود للنوم مرة أخرى
لو نظرت للأمر نظرة بسيطة لوجدت أن عمر الإنسان لو كان 20 سنة في عدد احتمالات الموت ، فهو أمر طبيعي
لكن ولأن الحياة اقوي من الموت يطول العمر بالإنسان ويستمر ويعمر في الأرض
إلى هنا وانتهت الجمل الحاضرة في ذاكرتي الآن ، ويبقى التمني أن تؤثر الجمل بكم كما أثرت بداخلي

اسأل نفسى

2008-04-18T16:35:00.000-07:00

اسأل نفسى ...
لو عشت في جزيرة وحيدا ، ليس هناك من بشر سواى
هل ستكون عاداتى كما هى الان ، ام ان الأمر سيختلف
هل كل عاداتى خارجة من داخلى ، ام هناك ما هو من اجل البشر والتعايش معهم
اسأل نفسى ...
عندما اقول انى لا استطيع ان احصى الشرور داخلى ، هل هذا يعنى انى شيطان وليس كل الناس مثلى ؟؟
وعندما اقول انى لا استطيع ان احصى الاشياء الصالحة داخلى ، هل هذا يعنى انى مغرور وليس كل الناس في غرورى ؟؟
اسأل نفسى ...
عندما لا اجد اجابات لأشياء معينة فعلتها ، كأن فجأة اقف مع نفسى لحظة متأملا واسأل نفسى لماذا فعلت الشىء الفلانى ، ولا اجد اجابة ، وفى نفس الوقت كنت في كامل ارادتى اثناء فعله
فماذا يعنى ذلك ؟؟
اسـأل نفسى ...
لو كل انسان انكشفت اسراره امام باقى الخلق ، ماذا ستصبح الدنيا وقتها
هل كان سيقدر احدا يوما ان يقف قائلا : دعونى اعظكم ايها الناس
اسأل نفسى ...
هل كل كلمة كتبت من اجلى في المدونة كانت نابعة حقا من داخل صاحبها ام كانت تعبيرا روتينيا بدون احساس داخله
عندما يقول احدهم مدونتك رائعة ، هل يعنيها حقا ، ام قالها بالاوعى وحسب العادة
اسأل نفسى ...
هل كل الأسئلة الفائتة وضعتنى في مأزق مع ذاتى ؟؟
فالاجابة تخلق مجهولا اقوى من مجهول السؤال

فقرة اعلانية

2008-04-16T16:04:00.000-07:00

بفتح الجرنال يا جماعة فلقيت موبينيل عاملة اعلان ماسك صفحة بحالها
الاعلان بيقول ان شركة موبينيل تعاطفا مع الشعب المصرى الغلبان اللى مطحون من الغلاء وعلى طريقة تعاطفك واحده مش كفاية قررت انها تزكى عن اموالها وكله بثوابه وتخفض سعر الدقيقة ل 20 قرش
كله ده ممكن يتفوت ونقول كتر خيرك يا موبينيل وهعمل نفسى مصدقك، لكن انى الاقى الاعلان مقتصر على ان الاتصال يكون من موبينيل لموبينيل فده حاجة موتتنى على نفسى من الضحك
يعنى اللى معاه خط فودافون جنسيته هندى يعنى ، ما هو مصرى برضه والمفروض ان التعاطف يشمله ، ولا ما كنش ليها لازمة الدوكة دى كلها ونقول عرض جديد لموبينيل وخلاص ، احترموا عقولنا شوية بقى
وبما انى اتكلمت عن الاعلانات وفى عندى شوية حاجات عاوز اقولها في الموضوع استغل الفرصة واقولها ، اصل أنا راجل استغلالى والحياة فرص ، وما صدقت مسكت المايك
اولا حكاية ان اعلان يفضل يتكرر على بطال طول حلقات المسلسل مثلا ، او مع كل ماتش في بطولة معينة ، الحكاية دى بتجننى وبتثير اعصابى ، بالذات لما الاقى نفسى حفظت الاعلان من التكرار ، وانا مش عاوز احفظه ، هستفاد ايه لما احفظ اعلان ، وساعتها بحس انى نفسى اولع في ذاكرتى اللى مش عارف اسيطر عليها
مش ممكن اعلان يتكرر في حلقة واحدة من المسلسل خمس مرات ، واضرب في عدد حلقات المسلسل ، يعنى منتهى الملل اللى في الدنيا
كمان الاعلان ممكن يبقى حلو ، لكن مع الملل بيتحول لحاجة رخمة جدا والزهق ما يصدق يلاقى حاجة يتغذى عليها
( الكهربا قطعت 3 ساعات ، ولما رجعت كملت ، يا مسهل )
كمان موضوع الراعى الرسمى دى بيموتنى على نفسى من الضحك ، تلاقى بيبسى راعى منتخب مصر ، وبيبسى دى مش شركة صاحبها شهيد في حرب اكتوبر مثلا بيحب مصر قوى ، دى شركة عالمية وممكن تلاقى بيبسى راعى منتخب فرنسا برضه
وانا بقول لأى شركة ، قبل ما تكونى راعى رسمى ، راعى ربنا في عقولنا الله يكرمك
كمان ومازال الحديث عن الاعلانات ، لو شفت اعلانات قناة دبى مثلا ، على طريقة الماس يظل للأبد وما شابه ، هتعرف ان إحنا غلابة قوى
إحنا لسه عايشين في اعلان بونكس اللى بيوفر ربع جنيه ويجبلك الست وهى سعيدة جدا انها وفرت ربع جنيه ، ويكون شعار الشركة نضافة ريحة توفير
وبمناسبة الكلام عن ثقافة الشعوب اللى ممكن يوضحها الاعلان ، شوف الاعلانات الاجنبى في الدول المتقدمة اللى بياكلو مع الكباب طحينة ، هتلاقى الاعلان فيه فكرة وبيخاطب عقول بجد حتى الاعلان المضحك بيكون فيه شغل عالى قوى
انما عندنا ، أنا مش هتكلم ، انت مصرى وابن مصرى واكيد عارف الحال عندنا ازاى
واحيانا بتلاقى اعلانات حلوة عندنا ، يعنى أنا مثلا بحب اعلان ( دى اس ال ) بتاع الراجل اللى كل شوية يقع في حفرة ، اهو ده ضحكنى بجد
كمان اعلان موبينيل بتاع الو اقاليم والفلكلور الشعبى بتاع كل اقليم ، وده حسيت انه معمول صح ودخل دماغى
وبرضه مجموعة اعلانات هذه حياتى وهذا دينى ، اعلانات هادفة جدا ومؤثرة جدا
اما بقى الاعلانات الهايفة فما تعدش ، بداية من اعلانات السمنة بتاعة حسن حسنى اللى بحس بعدها ان في سمنة على جسمى ، ومجموعة اعلانات ميلودى واللى أنا بسأل لحد النهاردة هى البت ما سبتوش ينتحر ليه ويريحنا ، وبجد حسيت انها ظلمتنا ( ولو انها من ابو اخر ) ، والواد ابنهم الاسود ده طول الوقت بحس انه عملهم الاسود اللى عملوه فينا
كمان الاعلان بتاع القراية واللى لقيت فيه تامر حسنى بيقولى يالا نقرا ، طب والنبى ده كلام ، إلا اذا كنا هنقرا كتاب فضايح البت اللى اخدت كل حاجة في عهدك منها
في النهاية جه على دماغى حوار بنتريق بيه أنا وصحابى على الاعلانات
كنا بنقول انه في الحرب العالمية التالتة هتلاقى الجنود لابسة هدوم عليها من ورا كلمة جهينة مثلا
وفودافون هتبقى الراعى الرسمى للحرب العالمية التالتة
وهتسمع اعلان يقولك ، نزل احدث الكليبات والفيديوهات للحرب العالمية التالتة الان على محمولك فقط اتصل على رقم كذا
أنا خلصت كلامى ومضطر وامرى لله اسيب المايك للناس عشان تعلق ، ولو انه والله مش هاين عليا

MY TAG

2008-04-14T12:38:00.000-07:00

اولا احب اقول ان فكرة التاج دى فكرة جامدة جدا ، وبقول للشخص اللى اخترعها – واللى أنا ما اعرفوش – انت بجد دماغك حلوة قوى
ثانيا أنا هاخد التاج ده بمعناه العربى ، فهو فعلا تاج فوق راسى لسببين
اولهم انى الاقى صاحب عمرى دكتور احمد مخترنى من ضمن الناس اللى سلملهم التاج ، وده يعتبر شرف ليا من شخص أنا بتشرف انه صحبى
ثانى الأسباب انى الاقى اسمى محطوط مع اسماء محترمة جدا ، بداية من سمراء صديقتى الودودة ذات الكلمات الفياضة بالأحساس ، وصاحبة الأسم الرقيق كنارى اللى طول ما أنا في مدونتها والابتسامة مش بتفارق خدى من اسلوبها الساخر الرائع ، وايضا بروفيسور شريف صاحب مدونة اختلاف واللى أنا بعتب عليه انه ناسى مدونته حبتين الايامدى وحرمنا من افكاره اللى أنا عارف انها عظيمة ، اصل ده برضه صاحب عمرى وانا عارفه يا جماعة
كمان الشاب الثائر مصطفى صاحب القصص الجميلة والحالمة والمتنوعة الأفكار واللى أنا بحب مدونته جدا
احب اضيف برضه ان مدونتى المتواضعة عالمها محدود ، واخترت اللى هسلمهم التاج بعد تفكير عميق وناس أنا فعلا بحب مدونتهم ، وكمان بقول للناس اللى اخترهم دكتور احمد قبلى لأهدائهم التاج انى اتحرمت من شرف اهداء التاج ليكو
كفاية رغى ونخش فى قواعد اللعبة اللى جرت العادة على وضعها
اذكر عشر اشياء عن نفسك
اختر خمس اشخاص تهدى لهم التاج
لا تهدى التاج لمن اهداك اياه
عرف اللى بعتلك التاج انك اهتميت ونزلته عندك
نخش بقى في الموضوع ونقول عشر حاجات عن النفس بتاعة الأنا
اخوكو ربنا نعم عليه بنعمة كبيرة جدا اسمها صحاب عمر ، صحابى من وانا لسه بشيل الزمزمية ولحد النهاردة ، صحابى واخواتى احمد وشريف واسلام ، الأكسجين بتاع حياتى
اخوكو شخص بيحب الخيال جدا ، لدرجة انى عندى حياتين ، حياة بعيشها في الواقع ،وحياة تانية عايشها برضه بس في خيالى ، وكل حياة مستقلة بذاتها ، بس ده برضه ما يمنعش ان احيانا الحياتين بيتقاطعوا في لحظة ما
اخوكو جرب الحب مرة واحدة في حياته وربنا ما كرموش ، عرف يعنى ايه عذاب ، عرف يعنى ايه تبقى عاوز تنسى حد ومش قادر تنساه ، مش قادر بمعنى مش قادر ، عرف معنى كلام حليم لما غنى ، لست قلبى اذا انما انت قلبها
اخوكو بيحب القراية بشكل مش طبيعى ، لدرجة انى بفكر اجيب مكتبة في شقتى في المستقبل وعلى اساس لونها اظبط بقية البيت
اخوكو نفسه يبقى عنده عيل ، ولد او بنت مش هتفرق ، يعلمه كل حاجة في الدنيا ويربيه عشان يبقى حد يغير البلد دى ، يربيه بطريقة تخليه يقف قدام ربنا وراسه مرفوعة انه علم بني ادم صح
اخوكو بيتعلم في تجارة انجليزى وما بيعرفش يحسب 1 + 1 غير على الالة الحاسبة ، الرياضة بالنسبالى بعبع
اخوكو عمره ما انكسر لحد ، ولو حصل في يوم هيموت نفسه بعدها
اخوكو بيعشق التغيير والانطلاق وطول الوقت بيحب يعمل حاجة جديدة ، ويا سلام لو كان صحابه معاه فيها ، يا سلاااااااااااااام
اخوكو بيعشق ام كلثوم ، وبيعتبر ان عبقريه الجمال هى سعاد حسنى مش في مصر بس ده في العالم كله ، وده رأيى
اخوكو عمره ما فكر في الحاجات الحلوة اللى جواه ، بس عارف كويس اوى ايه الحاجات الوحشة ****************
دلوقتى جه وقت اهداء التاج ، استلموا منى يا جماعة
دينا .. ضحك ولعب وجد وحب
احمد العجوز .. معانا الخير في تسعة
مدحت محمد .. البصيرة
سمسة .. اشكى لمين
نورا .. صعبان عليا حالنا

نظرتهم الينا

2008-04-12T17:06:00.000-07:00

وَإِذْ قَالَ رَبُّكَ لِلْمَلاَئِكَةِ إِنِّي جَاعِلٌ فِي الأَرْضِ خَلِيفَةً قَالُواْ أَتَجْعَلُ فِيهَا مَن يُفْسِدُ فِيهَا وَيَسْفِكُ الدِّمَاء وَنَحْنُ نُسَبِّحُ بِحَمْدِكَ وَنُقَدِّسُ لَكَ قَالَ إِنِّي أَعْلَمُ مَا لاَ تَعْلَمُونَ }البقرة30
تحدثت في بوست سابق بعنوان (رأى شيطاني)عن رأى الشيطان فينا أننا لا نستحق ، ولهذا امتنع أن يسجد لنا بعد أن كان رأيه انه أفضل منا كبشر
وتحدثت عن ان تاريخ البشرية كله اثبت أننا فعلا لا نستحق ، تاريخنا يغرق في بحر من الحروب والخراب والانحلال والديكتاتورية
كان هذا البوست من فترة اقرب إلى الطويلة
لكنى اليوم لفتت انتباهي الآية القرآنية التي في رأس موضوعي ، وتوقفت عندها كثيرا
لم يكن رأى الشيطان وحده فينا سيئا
كانت الملائكة أيضا تظن بنا أننا لا نستحق تلك الأمانة التي يحملها لنا الإله المتعالي ، وأننا لسنا قدر المسئولية
بداية قالوا أتجعل من يفسد فيها
والان أجد نفسي انظر إلى تاريخ الأرض ، نحن فعلا أفسدنا فيها ودمرنا وخربنا
خلقنا بمنتهى الغباء لكل شيء ثمن ، حتى يضعف من لا يجد الثمن ويصبح ذليلا ، أو يتوحش من يجد لكنه يطمع أن لا يدفع
نادي أفلاطون بالمدينة الفاضلة منذ قديم الزمان ، وكم مرت السنون ونحن نبنى في المدينة المتوحشة ونعمر ونكبر فيها ، ووضعنا أصابعنا في أذاننا عن دعوة الحق ، وأصررنا واستكبرنا استكبارا
ثم تقول الملائكة عنا .. ويسفك الدماء
عندكم حق يا ملائكة الله وحملة عرشه
لو لم تكن الدماء تجف لغرق هذا الكوكب منذ زمن طويل وانتهت الحياة عليه
مجرد سماع لفظ كلمة حرب عالمية ، يجعلك توقن أن الملائكة كانت على حق فينا
عالم بأكمله يتقاتل ويسفك الدماء
أتخيل مثلا سكان كوكب آخر يتابعون كلمة حرب عالمية ، كأنها عندنا حرب أهلية داخل دولة واحدة
كوكب وقام يقتل في بعضه يا جدعان .. منتهى الكوميديا
إذا لم يكن الاعتقاد بأننا لا نستحق قاصرا على الشيطان وحده
الملائكة أيضا لم تكن على يقين من حكمتنا
لقد اجتمعت قوى الشر المطلق وقوى الخير المطلق على رأى واحد فينا
اثنان منتهى التضاد بينهم لكن يجمعهم رأى واحد ، إذا هذا منتهى المصداقية
ثم يأتي الواقع وهو سيد الأدلة ليثبت صحة نظرتهم إلينا
نحن الآن يجب أن نخجل من أنفسنا أمام طرفين
الشيطان اللعين ، واجدنى مكسورا أمامه خجولا بعد أن صدق ظنه فينا
وملائكة الرحمن الذين كانوا يتمنوا ان يخيب ظنهم ، اجدنى الآن أقف أمامهم خجلا بعد أن فشلنا وصح ظنهم
لكن بعد كل ذلك يبقى في الآية الكريمة كلمة الله التي لا يعلو فوقها كلمة
تأمل قوله تعالى ( انى اعلم ما لا تعلمون )
وهنا اجدنى أتوقف عن التفكير والملم اوراقى
فسبحانه له حكمة أخفاها عنا في علمه الذي لا يعلو فوق علمه علم

عبقرية الانسان

2008-04-10T09:35:00.000-07:00

ابن ادم
سبحان من اعطاه القدرة ان يعيش وداخله كل تلك المتناقضات
قلبا يدعو للرومانسية والود والسلام والحب والجمال
شهوة تدعو للسقوط والرزيلة والكره والحرب والحقد
عقلا يدعو للموضوعية والحصافة والاتزان والثبات
خيالا يدعو للجموح والتمرد الانطلاق والتحرر
هل رأيت ما بداخل كل منا ، كل هذه المتناقضات تعيش معا في جسد واحد
تخيل معى لو كان القلب رجلا وكانت الشهوة امرأة وتزوج الاثنان
كارثة هى النهاية المتوقعة لتلك الزيجة ولن ينتج ابدا وفاق بين الضدين
لكن هذان الضدان يعيشان معا دخل جسدك ومعهما العقل والخيال
لا انسى هتلر ذلك الطاغية وركوعه تحت اقدام حبيبته التى تاه اسمها عن ذاكرتى الان
هل تتخيل رجلا تسبب في كل ذلك الدمار ويحب مثل ذلك الحب ويعشق امرأة ، وينبض قلبه بالرومانسية
اتذكر سيدنا محمد صلى الله عليه وسلم عندما ارسل الله ملائكة حتى تشرح صدره وتنقيه
احتاج الأمر لمعاملة من نوع خاص
لهذا اجد سيدنا محمد هو اقل البشر تناقضا وافضل خلق الله اجمعين
لقد خلق الانسان من الكل
خلقه الواحد مالك الصفات
نفخ فيه من روح الله
سبحانه الغفور الجبار ، الرحيم المنتقم
الضار النافع ، المحيى المميت
كل هذه الصفات موجودة في الانسان ، كل هذا يحمله داخله ذلك الكائن الاسطورى
انت لا تستطيع ان تفهم احدا ، اذا قلت لأحد انك تفهمه فقد كذبت
انت لا ترى إلا ما طفى منه على السطح ، اما ما في الأعماق فعدم ظهوره على السطح لا يجعلنا ننكر وجوده
قصر نظرك عن ان تخرق المياه وترى اعماقها لا ينكر ان لهذه المياه اعماق واسعة
تستطيع ان تقول انك تفهم ما يريد ان يبديه هو
لهذا اجدنى مهتما بالغضب
اؤمن بأن الغضب يظهر ما يضمره الانسان داخله
انها حالة ثورة وتقلب كبركان يدفع بما خفى في الاعماق
لهذا تجد الغاضب احيانا يأتى افعال تندهش لها وتخبره مثلا " أنا ما كنتش متوقع انك كده " او " انت مخبى ده كله جواك " واشياء من هذا القبيل
اتدرون ماذا تعنى كلمة الفطرة ، من رأيى انها تعنى ان كل الصفات داخلك ، كل عيوب الدنيا ومميزاتها
اذا مادام الأمر هكذا ، ما الذي يجعل هذا شريرا معظم الوقت – اكرر معظم – واخر ودود رغم ان الشرير يحمل الود والودود يحمل الشر
انها حالة انتخاب بين المتناقضات ، حتى يظهر المتحدث الرسمى عن ذلك الشخص
ويكون الدافع لفوز الشر وان يظهر الشخص شريرا هو التكيف مع البيئة مثلا ، او موقف معين حدث في حياة الشخص جعل الشر يربح في الانتخابات بين المتناقضات ، او التربية واسلوبها ، او ارادة الشخص ذاته
لكن هذا لايمنع ابدا ان كل الصفات الاخرى مازالت باقية مدفونة في اعماق تلك النفس الانسانية العبقرية
اود ان اصل إلى ان الانسان عبارة عن صندوق يحوى كل خير الدنيا وشرورها ،فكل منا بداخله عقل وقلب وخيال وشهوة ، وكل جزء منهم يلعب دوره كما كتبه الله له ، ولا يوجد خير مطلق والا اصبح ملاكا ، او شر مطلق والا اصبح شيطانا
ماذا يبقى لأتحدث عنه ؟؟
يبقى هؤلاء المعذبون القافزون بين الخير تارة والحب تارة والعشق الالهى تارة والشهوة تارة والرزانة تارة والتمرد تارة
هؤلاء الذين لم يحدث لهم ذلك الموقف الذي يحثهم على انتخاب صفات ما حتى تظهر ، او لم تجبرهم البيئة على ذلك ، او فهموا قواعد اللعبة
هؤلاء فعلا هم الذين يذوقوا العذاب ، ودائمى البحث عن ذاتهم
هؤلاء الغجر الرحالة ، ليس لهم وطن ولا ارض ثابتة
يبقى عزائهم ان كل ابن ادم خطاء وخير الخطائين التوابين

اضحك كركر

2008-04-08T20:46:00.000-07:00

واحد بلدياتنا كسب 60 مليون دولار اشترى رونالدو
مرة واحد مسطول أحول، جه يعيط قام ريل
مره واحد مسطول ماشي مع حبيبته في نص الليل فا شافت ابوها فقالت يالهوي بابا بابا فقالها ماتخافيش قوليلوا اخوكي
واحد باشا دار عليه الزمن وافتقر حب يشتغل اشتغل بياع فجر وجرجير , طول النهار واقف فى السوق ولابس الطربوش وبينادى فجل ياحوش جرجير يا كلاب
صعيدى فى الجيش بيقول لعسكرى زميله فى الحرب :انت من دشنا؟ قال له لا .. راح ضربه بالنار وقال له تبقى من ديش العدو
مرة اتنيين مساطيل راكبين عربيه فواحد بيقول للتاني "حاسب قدامك شجره" فمردش عليه راح مزعق شويه وقال "حااااسب قداااامك شجرة" برضه مردش عليه طراااااخ خبطوا في الشجره فقال الاول "مش قلتلك قدامك شجره" رد عليه وقاله "اعملك ايه مش انت الي سايق"
مرة واحد كسلان جدا كان فى لجنة الامتحان القلم وقع منه فى اول اللجنة فقام سلم الورقة
مره اتنين مساطيل واحد قال للاخر مش فيتنام فازت على امريكا فى الحرب واحنا فزنا على اسرائيل .... المسطول الثانى قال له : يبقى كده احنا المفروض نصفى مع فيتنام
اتنين ستات عواجيز نفسهم يتجوزوا وطبعا مش لاقيين فكروا يعملوا اعلان فى الجرنال كتبوا فية .......تزوج واحدة ..و احصل على الثانية مجانا
مرة واحد انجليزى و واحد فرنساوى و واحد صينى راحو يجربو صدى الصوت الانجليزى قال هاللو فرد عليه صدى الصوت و قال هالوووو الفرنساوى قال بنجور رد عليه صدى الصوت و قال بنجوووور الصينى قال شونجا كونجا هونجاهى فرد عليه صدى الصوت و قال بتقول ايييييييه
واحد كسلان جداً ...بيقول لصاحبه : مش انا اشتغلت . قال له مبروك اشتغلت فين ؟؟ قال له في مطبعه... اقعد علي الورق علشان ما يطرش
مرة واحد دخل علي فجأة &فجأة صوطط
واحد صعيدى دخل مسابقة لوحده طلع التالت
واحد رخم عرف ان الأموات بتحس وتسمع اللى حواليها راح عند المقابر وشغل الكاسيت على العالى على اغنية(الحياة حلوة(
مرة ديناصور بيقول لديناصورة, اديني بوسه قالتله ,لأ عيب قالها , ما احنا عشان كدة انقرضنا
فيل ونمله بيتقابلو على النيل ..الفيل رما نفسه فى النيل ................ليه ؟اخو النمله جه
واحد صعيدى دخل ايده فى نار وبعد شويه جه يخرجها مش لاقاهادخل راسه يدور عليها
مرة واحد مسطول قاعد يفكر مع نفسه ويقول "جمبرى فى الطبق؟ لا لا ارنب فى الجردل؟ برضه لا مش دى استكوزا فى البانيو؟ يوووة برضه مش دى، انا هتصل اعرف من الدكتور احسن." راح اتصل بيه وساله "يا دكتور انا عندى ايه؟" قال له "انا قولت لك ميت مرة انت عندك سرطان فى الحوض
مره قرية كلها أغبيا كان فيها حفره كل يوم واحد يقع فيها عملوا مجلس علشان يشوفوا حل للحفره دي قام واحد وقال يا جماعه احنا نحط عربية اسعاف جنب الحفره علشان المصابين يتنقلوا بسرعه قام التاني قال احنا نبني مستشفى جنب الحفره علشان يتنقلوا أسرع قام التالت قالهم يا جامعه انتوا مغلبين نفسكم ليه احنا نردم الحفرة دي ..ونحفر واحدة تانية جنب المستشفى

رحلتى مع القراءة

2008-04-06T17:24:00.000-07:00

لي قصة مع القراءة بدأت مع أولى سنواتى على ارض هذا الكوكب
كنت طفلا في السابعة من عمري تقريبا وكانت امى تأخذني من يدي إلى المكتبة كل يوم حتى اقرأ
لا ادري لماذا كنت اشعر بالسعادة حينها ، كان الوقت الذي اقضيه في المكتبة هو وقتي المفضل
كنت أدور بين الكتب ، اقرأ كل يوم كتاب ، أو قصة على وجه التحديد ، لا اعرف فائدة لما افعل إلا أنى استمتع باللحظات بشكل جعل تلك اللحظات محفورة في ذاكرتي حتى اليوم
حتى أن امى عندما لاحظت اهتمامي بالذهاب للمكتبة ، بدأت تهددني إن لم أحفظ صفحتي القران الواجب عليا حفظهم يوميا ستحرمني من الذهاب للمكتبة
ثم كان اليوم التاريخي في حياتي عندما افتتح قصر الثقافة في مدينتي
ذهبت مع أبى إلى هناك ، صعدت إلى المكتبة التي به والتي كانت ضخمة بالنسبة للمكتبة التي كنت اذهب إليها سابقا
أحسست إحساسا لن أنساه طيلة عمري ، شعرت أنى وجدت خاتم سليمان ، لم أكن أريد أن أغادر المكان ، هذه الكمية من الكتب المرصوصة كانت تشعل داخلي شيئا ما ، تحفز غدة لا اعرفها تفرز هرمون سعادة حالمة
، بعد مضى ساعتين تقريبا وأنا هائم بين القصص أراد أبى أن نعود ، لكنى أصررت على البقاء ، ولم يجد أبى وسيلة معي إلا أن اشترى لي قصة واقنعنى بأني اقرأها في البيت أفضل
لم انسي عنوان القصة إلى الآن ، كانت تسمى حمزة بن عبد المطلب ، وبها قصة حياة حمزة في حوالي عشر صفحات
قضيت ليلة رائعة بعد أن ذقت طعم أن تقرأ وأنت ممدد في فراشك ، حتى أنى قرأت هذه الصفحات العشر ما يقارب الخمسين مرة
بعد ذلك بحوالي سنة اكتشفت مكتبة أدوات مدرسية بجانبنا ، كان يمكنك من خلالها أن تستعير الكتاب بربع جنية وتعيده مرة أخرى لتستبدله بأخر
كان الأمر قاصر على قصص فلاش وسماش ورجل المستحيل وما شابه
كان أيضا ذلك الاكتشاف تاريخيا في حياتي ، طاقة القدر وتفتحتلى
بدأت بفلاش ثم اتجهت لأول عدد من رجل المستحيل ، لكنه لم يعجبني ، ولا ادري لماذا أو لا اذكر لماذا
فعدلت عن رجل المستحيل وسحبت أول قصة من ملف المستقبل
سرحت مع هذه السلسلة واندمجت فيها ، كان روح الفريق والتعاون بينهم يأسرني ، واثر داخلي كثيرا ، لدرجة أنى إلى اليوم مثلا عندما العب أنا واصدقائى بلاى ستيشن ، اضغط عليهم حتى نلعب مالتى ، اى زوجي لمن لا يعرف البلاى ستيشن
عشت واندمجت مع ملف المستقبل ونور الدين محمود وس 18 الذي كنت انتظر ظهوره بشغف ، ووصل الأمر بى إلى أنى كنت اقرأ في اليوم الواحد ما يقارب 6 أعداد من ملف المستقبل
ثم انتقلت إلى ما وراء الطبيعة وأحببت هذه السلسلة بشدة ، أحببت القصص نفسها ، لكنى أبدا لم أحب رفعت إسماعيل بطل السلسلة
عندما وصلت إلى الصف الثالث الاعدادى وبدأ ضغط المذاكرة وما شابه من والدى ، واني لابد أن أوقف قراءة القصص هذه في ايام الدراسة ، لم استطع ، حاولت لكنى لم استطع ، فكنت اضطر أن اجلس على المكتب واضع القصة بين ثنايا الكتاب ورافعه وكأني اقرأ في الكتاب وأنا مندمج مع القصة
جعلتهم في البيت يقتنعوا أنى أذاكر وأنا افعل ما أحبه في هدوء
ثم كانت المرحلة الثانية مع القراءة عندما توقفت عن قراءة القصص واتجهت لكتب الكبار
كان أول عهدي بالكتب مع كتاب مصباح لكل إنسان لأنيس منصور ، ومن تلك القطرة بدأ الغيث
اليوم عندي مكتبة فخور بها ، استفيد منها واصدقائى معي ممن يحبون القراءة مثلى
وما زال عندي حلم أن يكون عندي مكتبة بها عشرة ألاف كتاب وأدعو الله ان يبقيني حتى أحقق حلمي
والآن بعد كل هذه السنوات من القراءة ، اشعر أن الله منن عليا بنعمة كبيرة ، فلم تكن أبدا شطارة منى أن أميل للقراءة ، لكنها هداية من الله ونعمة اشكره عليها واحمده سبحانه
تعلمت الكثير والكثير من كل سطر قرأته لكل كاتب واشعر انى مدين لكل عظيم منهم ، ولو ساعدتني الأقدار وقابلت أيا من هؤلاء العباقرة أول ما سأفعله سأقبل يده، فهم عندي ليسوا بالقليل ، أبدا

اللعين

2008-04-04T13:20:00.000-07:00

اذهب مع امى لعيادة دكتور عيون لتغير نظارتها لمقاسات جديدة
ننتظر حتى يأتي دورنا في الكشف
انظر حولي فأرى مرضى ممدون تتصارع في أعينهم الآلام ، بجانبهم ذويهم يكفكفوا دموعهم ويصبرونهم ويصبروا أنفسهم على ما ابتلاهم به الله
انه المرض ، ذلك اللعين القاتل ، انه الألم والانكسار والعجز
في عيادة الجراحة المقابلة للعيادة التي أنا بها ، اسمع أصوات صراخ تتعالى ، آهات إنسانية مصدرها المرض وأوجاعه
انظر لمن أتى بكل مريض والمح في عينيه الإرهاق والتعب ، ليس وحده المريض يتعذب ، كل من حوله يتعذبوا مثله
إذا كان المريض نفسه يتعذب كله لمرض جزء به ، وهو جزء منهم ، إذا فلا إنكار أنهم أنفسهم يتعذبوا مهما حاولوا أن يبدوا غير ذلك
يدخل احدهم مندفعا من باب العيادة متوسلا ( للتمرجى ) أن يدخل حالا إلى الدكتور ابوس ايدك دخلنى ، امى بتموت -
ااااااااااااااه ، افقد اعصابى واشعر بتقلصات في احشائى
انظر عن يميني فأرى طفل تحاول أمه أن تكفه عن البكاء ، الأب ممدد بجانبهم يكافح مرضه حتى يبقى من اجله
التقلصات تزيد في احشائى
لا يجب أبدا أن يتعرف طفل صغير على هذه العذابات الإنسانية
انه الأمل واقفا في نار البؤس والشقاء
مازالت تحاول الأم ترويض طفلها وكفه عن البكاء
محاولة فاشلة سيدتي ، أنا نفسي انظر حولي وانظر لأبيه فأمسك نفسي عن البكاء بصعوبة
يقول سيدنا على لو كان الفقر رجلا لقتلته
كنت أتمنى أن يكون المرض رجلا ، لن اقتله ، سأجعله يجلس ساعة واحدة ممددا في عيادة مكان اى من هؤلاء المساكين ، سأجعله يتمنى هو نفسه الموت
اسمع صياح يتعالى من العيادة المقابلة
- يارب خدنى ، مش قادر استحمل ، ده أنا حبيبك يارب
اشعر بأحشائي تتمزق داخلي
علمونا أن الآم المرض تكفير للذنوب ورحمة من الله ، اشعر أن صرخة مثل هذه مليئة بالتضرع والألم كفيلة أن تكفر ذنوب مثل جبل احد
أتذكر جدتي وكيف كانوا يحملونها إلى الحمام في أخر أيامها ، بعد أن أصبحت عاجزة أن تدخل وحدها
رغم عذاب أهل المريض ، إلا انه - ولله الحمد – مازال قلب الإنسانية ينبض
تفتح باب غرفة الدكتور وتخرج من عنده سيدة عجوز الموت لا يحتاج المرض كواسطة ليصل إليها
اشعر أنى لو مكان المرض لخجلت أن أصيب عجوز مثلها
تدخل امى بكشفها البسيط – ولله الحمد – ونخرج من عند الدكتور وأنا اشعر أن كل جزء في جسدي يعانى من شيء ما
- - - - -
الهي ، يا مالك الملك ، يا خالق الجنة والأمل والحياة ، ادعوك ولا دعوة إلا لك ، ولا ضراعة لسواك ، أن تكفيني المرض وأوجاعه ، ليس من أجلى ، اقسم بأسمائك الحسنى ليس من أجلى ، فقط حتى لا أجد ابني أو زوجتي أو اختى أو حفيدي تائها معي ، محملا بأوجاعي راكضا بجسدي الواهن ، أنا لا استطيع أن احتمل ذلك ، لا استطيع ، وحدك تعلم ما تخفيه الصدور ، وحدك قادرا على أن ترحمني ، وترحمهم معي ، يارب العالمين

بهبهتنا والمطالب الرئيسية لجيل

2008-04-02T16:59:00.000-07:00

( الأستاذ سيد يجلس في أمان ومحمد ابنه يدخل عليه )
محمد : بابا أنا عاوز كورة عشان العب بيها مع صحابى
الأب : ماشى يا سى محمد ، حجبلك الكورة بس تسمع كلام ماما وما تزعلهاش ، يا بني أنا مش حرمك من حاجة
( بعد مرور ثلاث سنوات )
( الأستاذ سيد يجلس في سلام ومحمد ابنه يدخل عليه )
محمد : بابا أنا عاوز اتارى ، والنبي يا بابا عشان خاطري
الأب : حجبلك الأتارى يا محمد ، بس عاوزك تطلع الأول زى الشاطر ، يا بني أنا مش حرمك من حاجة
( بعد مرور ثلاث سنوات )
( الأستاذ سيد يجلس في هدوء ومحمد ابنه يدخل عليه )
محمد : بابا أنا عاوز عجلة ، كل صحابي جابوا عجلة وانا اللي بركب الجزمة بتاعتى
الأب : بس توعدني تاخد بالك من نفسك ، وما تحاولش تتفزلك وتعمل زى العيال الصيع ، يا بني أنا خايف عليك ، وبعدين أنا مش حرمك من حاجة
( بعد مرور ثلاث سنوات )
( الأستاذ سيد يجلس في طمأنينة ومحمد ابنه يدخل عليه )
محمد : بابا أنا عاوز كمبيوتر ، الكمبيوتر حيفدنى في الدراسة وحذاكر عليه
الأب : استنى لأول الشهر وربنا يكرم ونجبلك الكمبيوتر عشان تذاكر عليه ، وعاوزك كمان تتعلم تكتب عالكمبيوتر وتصغر الخط وتكبره كده يعنى عشان تستفيد منه
محمد : حكبرك الخط لدرجة انك حتجيب شاشة اكبر
الأب : كويس يا محمد ، أنا عاوز مصلحتك برضه ، وانا عمري ما حرمتك من حاجة
( بعد مرور ثلاث سنوات )
( الأستاذ سيد يجلس في استرخاء ومحمد ابنه يدخل عليه )
محمد : بابا أنا عاوز موبايل ، عشان تطمن عليا وانا في الجامعة وكمان لو عوزتنى تلاقينى
الأب : أحسن موبايل بمناسبة دخولك الجامعة ، هو أنا من امتى كنت بحرمك من حاجة يا بني
( بعد مرور اربع سنوات )
( الأستاذ سيد يجلس في سكينة ومحمد ابنه يدخل عليه )
محمد : بابا أنا عاوز اخد كورسات عشان اعرف اشتغل
الأب : خد يا بنى وماله عشان ربنا يكرمك وتشتغل ، شوف احسن مكان وروحه ، يا بني أنا عمري ما حرمتك من حاجة
( بعد مرور ثلاث سنوات )
( الأستاذ سيد يجلس في خشوع ومحمد ابنه يدخل عليه )
محمد : بابا أنا عاوز اتجوز ، بدل ما اجبلك العار
الأب : نخلى أمك تشوفلك احسن عروسة في البلد ، والله وكبرت يا ابن الكلب وحتكبرنى معاك وتخلينى جد وانا لسه في عز شبابي
محمد : ربنا ما يحرمني منك يا بابا
الأب : بمناسبة يحرمني ، يا بني أنا عمري ما حرمتك من حاجة

لماذا نحن ؟؟

2008-03-25T10:38:00.000-07:00

هل نحن نستحق أن ينزل علينا نبي من السماء ؟؟
يشغل ذهنى هذه الأيام ذلك التساؤل ، وحيرتني إجابته بشده ، إذا كان قوم لوط نزل عليهم نبي من عند الله ليهديهم عن خطيئة واضحة ، فهذه الخطيئة موجودة في أيامنا هذه ، وخطيئة قوم موسى والتي وضحها القران عندما قالوا " فاذهب أنت وربك فقاتلا إنا هاهنا قاعدون " ونحن أيضا تكاسلنا واكتفينا بالدعاء على أعدائنا ولا نريد أن نفعل أكثر من ذلك ، ونطلب من الله أن ينزل عليهم صاعقة من السماء في منتهى السلبية والتخاذل والتواكل
أيضا قارون وتجبره واكتنازه الذهب والفضة وقوله أنا ربكم الأعلى موجود أيضا في عالمنا من تسلط وعبادة للمال واذلال للعباد ، وكل قوم نزل عليهم نبي فينا عيوبهم مثل ثمود وعاد وقوم يونس وهكذا ، حتى الجاهلية قبل سيدنا محمد وعبادتهم الأصنام من دون الله وإغراقهم في المتع ، موجود أيضا عندنا فكل منا اتخذ إلهه هواه كما قال القران ، يسير وراء هواه ويسجد لمتعه من دون الله
الأدهى أن الجاهلية مثلا رغم عيوبهم إلا أنهم كان عندهم شجاعة ونخوة ورجولة وعزة وكرامة ، أما نحن فحتى هذه الأشياء تكاد تنتهي من بيننا
، لا نملك غير أن نشجب ونطالب ولا نستطيع أن نتخذ مواقف حاسمة لأن الجبن والتخاذل والانهيار الحضاري هو ما تحويه خزائننا الواهنة
أعود هنا لسؤالي الرئيسي ، لماذا رغم كل عيوبنا هذه لا ينزل علينا نبى من عند الله يهدينا إلى صراط مستقيم ؟؟
أود فقط أن أوضح أنى اسأل عن نبي لا رسول ، فالرسول هو من أتى برسالة مثل سيدنا محمد والإسلام وسيدنا عيسى والمسيحية ، أما النبي فهو من يهدى الناس إلى طريق الصلاح دون أن يأتي برسالة جديدة
اعلم أن هناك حكمة من عند الله أن يكون سيدنا محمد صلى الله عليه وسلم هو آخر الأنبياء والمرسلين ، لكن عقلي اللعين جعلني أفكر وأحاول أن اربط الأمور يبعضها واسأل سؤالي ذلك واحاول فهم حكمة ربنا سبحانه وتعالى ، ويبدو أن الوصول لإجابة مستحيل، وليبقى معي ظني أننا نستحق نبي أكثر من اى احد قبلنا، ويبقى الأمر في علم الله وحده ، اشهد بعلمه الذي وسع كل شيء
***********
أنا حنقطع عن التدوين من عشرة لخمستاشر يوم كده ، عشان امتحانات الميد تيرم ، على عيني والله ابعد ، بس أنا زهقت بصراحة من التعليم وعاوز اخلص السنادى ، عشان كده بركز في الامتحانات عشان ربنا يكرمني ، أتمنى إن الشوق هو اللي يترسم في عيونكو لحد ما اخط القلم تانى هنا ، واشوفكو على خير

ضمور الصواب

2008-03-23T11:04:00.000-07:00

المجتمع دلوقتى بيتبنى قاعدة جميلة جدا اسمها عموم الخطأ وشذوذ الصواب ، يعنى الصح دلوقتى بيتنظر له على انه غريب ومش طبيعى ، لكن الغلط هو اللي صح لأنه هو اللي سايد ، عشان نلاقى نفسنا كلنا فجأة بقينا زى بطل قصة نهر الجنون ، القصة بتقول باختصار انه كان فيه ملك على مدينة والنهر اللي الناس بتشربه منه في المدينة أصابت المياه بتاعته الناس بالجنون إلا الملك كان الوحيد اللي ما شربش ولسه عاقل ، وبعد فترة اكتشف انه مش حيقدر يعيش كعاقل وسط كل المجانين دول ، وشرب من مياه النهر بكامل إرادته وهو عارف اللي حيحصله ، بس ماكنش قدامه غير كده عشان يقدر يتعامل مع الناس ، ويقدر يحكمهم بقانونهم
إحنا دلوقتى بقينا كلنا كده ، يعنى مثلا لو اتكلمت في موضوع كلام له معنى و موزون يقولوا انت حتتفلسف ، وإيه الكلام الكبير ده يا عم ، وحاجات من كده ، لكن لو هذيت في الكلام وخدت كل حاجة بهزار تبقى تمام وروعة وليك مستقبل ، ده حتى ليا واحد صحبي حكالى انه كان واقف قدام الفرن فى طابور طويل عريض ولما صعبت عليه نفسه من الاهانة اللي فيها ، شخطت في الناس وقال إحنا ما ينفعش نسكت على كده لازم نتصرف وناخد حقنا ، المفاجأة إن كل الناس بصتله باستغراب وكأنه كائن فضائي نزل عليهم ، طبعا صحبى كان بيتكلم صح لكن وطبقا للقاعدة اللي قولتها في أول كلامى يبقى كلام صحبى مش صح ، وتبقى وقفة الناس في الطابور وطلعان عنيهم هو اللي صح
من ناحية تانية الموضوع ده ادى لحاجة غريبة جدا ، انك بتضطر تكون غلط في وسط الغلط عشان يحصل الصح ، كلام متلعبك أنا عارف بس حوضحه بمثال ، مثلا وانت في اى مصلحة حكوميه عشان تخلص مصلحتك بتدى الموظف قرشين عشان تخلص ، هنا بقى المصلحة بتخلص بسرعة وكله بيبقى تمام من غير اى تعسف ، وده هو الصح والمفروض انه يتم من غير اى رشوة ، لكن انت بتدى الرشوة اللي هي غلط عشان توصل للصح اللى المفروض يتعمل
هنا بقى ودى المأساة بيكون الإنسان العاقل قدامه خيارين ، الأول انه يمسك بالمبادئ ويرفض انه يرشى الموظف ويقف في طابور عريض وفى الآخر – للأسف – مش حيوصل لحاجة ، او انه يشرب من نهر الجنون ويعمل زى الناس ، وطبعا الناس ما بتعملش غير فضلات
الموضوع أصبح متعقد جدا ولو ما خدناش بالنا كلنا اننا حنروح في داهية ، وتعاونا لأنه حل الموضوع ده محتاج التعاون بين الناس كشرط اساسى ، حيتحول الأمر إن الصح حينقرض بعد ما تضمر وظيفته ويسود الغلط لأنه هو اللى له لازمة ، ولك ان تصف الدنيا وقتها كما تفضل ، أصل أنا بصراحة مالقتش وصف يكفى

اضحك عالدنيا

2008-03-21T10:27:00.000-07:00

تخيل معايا واحد عاش عشان حلم محدد ، الحلم ده خده من كل الدنيا ، جرى وراه وسلم نفسه له ، الموضوع كان محتاج منه تلات سنين من السعي والكفاح عشان يحققه ، وفى وسط السنة التانية وقبل ما الحلم يوصل نهايته السعيدة ، مات ، تفتكر إيه الشعور ؟؟ ، صدمة في العمر اللي ضاع من غير فايدة ، أنا مش ضد إن يكون عند الواحد حلم وطموح ، بالعكس ، أنا بس بستغرب على اللي بيكتف نفسه في حاجة واحدة حتتحقق بعد سنين وهو مش ضامن يصحى تانى يوم عايش ، يعنى ليه اخد من الدنيا حاجة واحدة لما ممكن اضحك عليها واخد منها كل حاجة ، من الآخر كده الذكاء واحترام الموت وحقيقته الخالدة بيحتم على الواحد انه بجانب استعداده للمستقبل وطموحه منه لازم يعتبر إن اليوم اللي بيعيشه برضه له حلمه الخاص وتفاصيله البسيطة اللي المفروض يهتم بيها ، يعنى لو افترضنا إن الأيام عبارة عن قطع بازل بتكون صورة كبيرة في النهاية هي طموح الإنسان وحلمه ، لازم على ضهر كل قطعة بازل يكون فيه صورة كاملة خاصة بيها هي ولازم الإنسان يهتم بيها ويبص عليها
المستقبل رائع النظر له ، لكن الآن واللحظة اللي أنت عايشها واليوم اللي ممكن ما تعيش بعده برضه لازم ننظر له
خلى دايما قدامك حلم بسيط ومتعة بسيطة وحاجات بسيطة بتعملها ومش ياخدك منها الحاجة الكبيرة اللي انت عاوز تحققها ، كده يبقى انت ضحكت عالدنيا ولو العمر مش خدمك في الوصول لحلمك البعيد ، على الأقل انت عشت في كل يوم لحظات حلوة ومتعة بسيطة ، ولو قدرت تاخد عصفور اليد والعشرة اللى على الشجرة يبقى الله ينور وكده انت جبت النهائي ، ولو العمر مش ساعدك وما طلتش العشرة اللي على الشجرة ، يبقى على الأقل في عصفور في ايدك ما سبتوش ، بدل ما تطلع من المولد بلا حمص

الانحلال المحتجب

2008-03-19T10:15:00.000-07:00

حال مجتمعنا أصبح محير بشدة ، مع انتشار القنوات الدينية والمشايخ والدعاة بعد أن كانت الثقافة الدينية مقتصرة قديما على برنامج حديث الروح إلا ان الانحلال والفساد ينتشر في مجتمعنا في نفس الوقت ، الحجاب ينتشر ولكننا نكفن داخله مصائب كثيرة ، تجد الفتاة ترتدي حجابها وتستر شعرها وتكشف عورتها ، وأخرى تكشف شعرها وتعيش بأخلاق كريمة ، تجد رجلا يؤمن بشيء ويأتي نقيضه ، أصبح المجتمع متناقض بشكل غريب ، يظهر شيء ويخفى أخر ، مجتمع اقنع امى أن الإسلام يعيش عهدا مزدهرا وان الوعي الديني انتشر والحجاب عم وساد والذقون طالت وكبرت والاعتكاف أصبح بديهيا في رمضان ، أكاد اجن عندما تحدثني امى هكذا ، هل أصبح مجتمعنا مظهره خادعا لتلك الدرجة ؟! ، نحن لسنا سوى كتيبة من المنافقين لذاتهم ، يقول الأمام الشيخ الشعراوى أن الكافر صريح مع نفسه يخفى في قلبه ما يبديه وكذلك المؤمن ، أما المنافق فيخفى شيء ويظهر شيء أخر ، غير متصارح مع ذاته ، يحمل نفسا مريضة لا تستطيع أن تتوافق أفعالها بنواياها ، وهذا – للأسف – هو حالنا ، تحول الإسلام بيننا لمجرد شعار جميل ، غلاف متميز يحوى داخله قطعة منتهية الصلاحية من الحلوى ، نحن نعيش في مجتمع باع دعاته فيه خطبهم كرنات على الموبايل ، وتحدث فيه الراقصات عن التقوى والعمل الصالح
لنستمر هكذا ونظل ننافق أنفسنا ، وليظل دائما من يسودنا أكثرنا قدرة على النفاق ، ويوما ما أعدكم أن نتحول لمجرد مرضى نفسيين تتقاتل داخلنا المتناقضات ، ونصبح مثل بطل فيلم الأيدي الناعمة ، باشا فقد كل أمواله وأصبح متسولا إلا انه مصمم أن يناديه الناس بلقبه كباشا من عائلة ارستقراطية عريقة هو نفسه من أضاع تاريخها واذهب كل حسناتها ، ليتحول الدين بيننا إلى مجرد لقب نحافظ عليه دون أن نستحقه ، ونصبح نحن أنفسنا بشوات بالعافية

تكنولوبيا

2008-03-17T10:19:00.000-07:00

في الأفلام الأجنبي على طول بيجيبوا العرب عبارة عن ناس لابسة عمة وجلبية وسارحة بجمال في الصحرا ، الفكرة دى غلط من ناحية المظهر ، إحنا فعلا كده ، لكن مش في مظهرنا في عقولنا ، إحنا لحد دلوقتى عقولنا سارحة بجمال في الصحرا والدنيا اطورت وتنورت من حواليها
على قد ما إحنا عندنا تكنولوجيا وتتطور وانترنت وموبايل ونايل سات وكل الكلام الجميل ده ، إلا إننا وبلا فخر ما بنخدش منهم غير عيوبهم وربنا وفقنا وقدرنا نتخلص من كل المميزات والأهداف الرئيسية اللي اتعملت عشانها الحاجات دى
الكلام ده بيودينا لسؤال مهم جدا ، ليه إحنا كده وما بناخدش من التكنولوجيا والتقدم غير عيوبهم ؟؟
أولا لازم التطور يصاحبه تتطور في الإنسان ذاته ، وإلا يحصل فجوة تعمل اللي إحنا شايفينه حاليا ، يعنى لازم الإنسان يكون على قدر من التحضر يؤهله لوضع الأمور في مكانها الصحيح ، يكون فاهم الحاجة دى اتعملت عشان إيه ؟ ، وإيه المساوئ وإيه المميزات ؟ ، وازاى يقدر يتغلب على العيوب ويستفيد اكبر استفادة ممكنه من الاختراع اللي معاه ، وإحنا عندنا طبعا مستوى تقدم الفرد وتحضره منحدر جدا ، والبركة وحبتها هي المسيطرة على تفكيرنا ، فانتهى الأمر بينا إننا حصرنا الموضوع في إشباع غرائزنا وبطونا وفروجنا ، واعتبرنا تحقيق اكبر إشباع للغرائز ده هو أفضل استخدام للتطور
ثانيا إحنا يعتبر الجيل الأول اللي أتصدم بالتكنولوجيا ، وأهلنا كان بالنسبالهم الموضوع انتقال من مرحلة ظلام لنور شديد خلى علمهم بالحاجات معمى ومفيش إدراك لأبعاد الأمور ، لذلك اتسبنا إحنا براحتنا ما حدش قلنا فين الصح وفين الغلط ، والرقابة غائبة طبعا ، فانطلقنا وكل واحد وضميره ، وأصبح انك تكعبل في ميزة للجهاز اللي معاك ده بمحض الصدفة لكن ماحدش علمك ، حتقولى دلوقتى طب ماهو برضه في الغرب التكنولوجيا كانت جديدة عليهم ورغم ذلك استخدموها صح ، حقولك اقرا الفقرة اللي فاتت وأنت تفهم
ثالثا الدور التافه الغبي اللي بيلعبه الإعلام على شاكلة رنتك بأسم حضرتك ، وابعت رسالة فيها اسمك واسم حبيبتك ونقولك مدى التوافق اللي بينكو من غير لا سحر ولا شعوذة ، وابعت مقطع من اى أغنية ونقولك اسمها واسم المغنى ، كل الحاجات التافهة دى الأعلام بيحصرك بيها وبيغذيها لينا بمنتهى الاستهانة بعقولنا ومنتهى الاستفزاز لدرجة انى كل ما بسمع الإعلانات دى بحس عربية إسعاف بتمشى جوا مخي عشان تلم جثث الخلايا اللي انفجرت من الغيظ ، وأصبح الربح هو الهدف الوحيد ، وأصبحت الحاجات المهمة زى التوعية والارتقاء بمستوى الفرد وكيفية التعامل الجيد مع التكنولوجيا ، كل الحاجات دى بتشوفها على برنامج كل أربع سنين مرة وبرضه بيتقطع بفقرة إعلانية فيها إعلان رنتك بأسم حضرتك
دى بعض النقط اللي خلتنا حالنا مع التقدم كده ، وحصرت الإنترنت في ورلد سكس والموبايل في رسايل الشات اللي مش قادر افهمها والكليبات اللي بتتصور بكاميرا الموبايل ، والتلفزيون في ميلودى ومزيكا ،وهكذا تقدر تقيس الوضع على كل الأجهزة حولينا ، والدنيا من سىء لأسوء في شكل محزن بجد ، وأصبح ظهورنا في الأفلام الأجنبي سارحين بجمال في الصحرا تشبيه جيد لحالتنا العقلية مش المظهرية

اللهو الخفى

2008-03-15T11:23:00.000-07:00

اكتر حاجة بتضحكنى في بلدنا ، ان كل واحد فينا بيقول على الشعب المصرى انه متخلف وجاهل وعاوز حرقه بجاز ، وطبيعى لما كلنا شايفين المصريين كده ، يبقى احنا اكيد صوماليين ومش واخدين بالنا .. السؤال اللى مدوخنى فين المصريين المتخلفين دول .. عايشين فين ؟؟ .. ساكنين فين ؟؟ .. طب لو حد شافهم قبل كده سايق عليه النبى يقولى
لو سألتك انت مصرى تقولى ايه ، تقولى مصرى ابن مصرى وابن مصر ربنا اعلم بيه

كلام من دهب

2008-03-13T11:09:00.000-07:00

لن يكون اليوم يوم كلامي أنا ، فقد اخترت اليوم ثمارا ناضجة من كتب أساتذة كبار ، وهذه الثمار عبارة عن جمل أثرت داخلي كثيرا وتوجت بها عقلي كطوق من ذهب ، واليكم ما اخترت
هناك جملة رائعة للأستاذ نجيب محفوظ تقول " البطر بالنعمة قد يرتدى ثوب الضجر " ، وهذه حقيقة خالدة أراد أن ينقلها لنا الأستاذ الكبير ، إذ قد يكون الإنسان في نعمة لا ينالها الكثير لكنه يمل منها هنا يكون ملله هذا نوع من أنواع جحود النعمة ، ولكن في النهاية هذه احد مساوئ النفس البشرية ، ولا يتجنبها إلا من رحم الله وعرف الرضا
هناك أيضا جملة للكاتب الكبير أنيس منصور تقول " ليس من الضروري أن تجعل حياتك جهنم لكي تنعم بالجنة بعد عمر طويل " ، وأدعو من الله أن يفهم كل متشدد هذا المعنى ، فالدين لم يأتي أبدا ليخلق الجحيم على الأرض ، التشدد والتزمت هو الذي يستر جمال الدين بتلك العباءة الهزلية ، كل ما يطلبه الدين أن تنظم حريتك وشهواتك ولتنعم بعد ذلك بجنة الدنيا وستنال في النهاية أيضا جنة الآخرة
تحضرني أيضا جملة للشيخ الشعراوى تقول " الأسباب عاجزة عن ان تفعل شيئا إلا بإرادة المسبب " ويوضح الشيخ الشعراوى معنى كلامه بمثال جميل ، فمن الممكن أن يكون الرجل معافى ويستطيع الإنجاب وزوجته أيضا تستطيع الإنجاب ولكن في النهاية لا يحدث حمل ، هنا لابد من وجود شرط ثالث هو إرادة المسبب ، ومسبب الأسباب هو المولى تعالى ، فالإنسان عليه أن يتدبر ويعزم وعلى الله التوكال
وهناك جملة تستحق أن نقف عندها للأستاذ عباس العقاد تقول " الصفح قوة ، لأنه عنوان القدرة الدائمة التي لا تمسها إساءات الناس وعداوتهم ، والتي إذا أبقت خصمها اليوم فلأنها قادرة على الاقتناص منه في اى وقت تشاء "وهناك الكثير من البشر على ارض الواقع ينطبق عليهم جملة الأستاذ العقاد ، يقتنص النصر ويتشفى في المهزوم قدر المستطاع لأنه يعلم أن المواجهة القادمة قد لا تكون لصالحه
أيضا في ذهني جملة للكاتب يوسف معاطى تقول " التماثيل لا تقام بجنب الحيط ، وإنما تقام في الميادين الكبرى " والرسالة هنا موجهة لكن من يهاب الحياة ويرتجف من رؤية خياله ، ولا يرغب إلا ان يعيش مستورا والسلام وأمامه أن يطور من نفسه فقط لو ترك الحائط الذي يمشى بجواره وواجه وانتصر ، حتى يتذكره العالم وتكون له بصمة على ارض هذا الكوكب ، فتماثيل العظماء تقام في الميادين حيث قرروا أن يعيشوا ، وليس بجانب الحائط
وهناك جملة تخرجها لي ذاكرتي للأستاذ مصطفى صادق الرافعي تقول " تخيط ثوبها بيدها فتباهى بصنعه قبل أن تباهى بلبسه " والأستاذ هنا يحدثنا عن المرأة التي تحتمل أعباء الحياة ، الزوجة التي تستطيع أن تحتضن زوجها في الأزمات وتساعده على أن ينتعش ويواجه من جديد ، وليس تلك المرأة التي تثقل عاتق زوجها وتكلفه حملا فوق أحمال الحياة ، انه الفرق بين امرأة تفخر بالثوب وامرأة تفخر بالصناعة ، انه الفرق بين من يخلق ويعين وبين من يقتل ويذل ، إنها الزوجة التي يبغاها كل رجل كشريكة حياة
أيضا هناك جملة للعظيم نجيب محفوظ تقول " ما أكثر العفة المتولدة من العجز " فهناك الكثير من البشر يدعى العفة ويعرف بها ، لكنها ليست من خصاله ، فقط هو لم يستطع غيرها ، ولو واتته الفرصة ليسرق في مكان عمله مثلا لفعل ، لكنه العجز وحده هو الذي ولّد عفته المصطنعة ، فلم يكن ما ظهر فقط هو مقياس الحكم على البشر ، فهناك الكثير قابع في داخل كل منا
عندي الكثير والكثير من الجمل لعباقرة كبار طالما فخرت بكلماتهم وفادوني بعلمهم ، لكنى اكتفيت بهذا الآن خوفا من أن تتداخل المعاني ، في النهاية يحضرني دعاء لفيلسوف اغريقى قديم يقول " يارب امنحني القدرة على تحمل مالا طاقة لي على تغييره ، والشجاعة لتغيير ما ينبغي تغييره ، والحكمة للتفريق بينهما

العدل الزمنى

2008-03-11T10:59:00.000-07:00

كل حاجة في الدنيا دى ليها معنى وغرض محدد ، كل حاجة في الدنيا دى بتؤدى وظيفتها صح ، حتى الحاجات اللي إحنا شايفنها غلط بينطبق عليها جملة " اعوجاج الخطاف استقامة لمهمته " ، على الأساس ده أنا شايف موضوع إن الوقت " ما عدش فيه بركة " زى ما بيقولوا حاجة طبيعية جدا وكمان نوع من أنواع العدل ، حتقولى ازاى ؟ ، أقولك يا سيدي ، زمان أيام ما كانت الناس بتسافر على جمال ، كان الواحد منهم عشان ينتقل من بلد لبلد كان بيغيب بالشهور عن بيته ، الموضوع فيه استهلاك ضخم للوقت ، لكن دلوقتى بعد ربنا ما فتحها علينا ، بقى عندك القدرة انك تسافر من بلد لبلد وترجع في نفس اليوم ، قولي بقى بالله عليك ، عاوز تفهمني إن قيمة الوقت بالنسبالك تتساوى باللى كان بيودع أهله عشان يمشى عشرين كيلو ، أكيد لازم تختلف ، عشان يبقى فيه عدل ، وكل البني ادمين تاخد فرص متساوية في الحياة ، أنا شايف إن ده نوع من أنواع العدل الالهى ، كمان لازم متوسط أعمار الناس يقل عن زمان ، يعنى زمان كان الناس بتعيش كتير وبتعمر عشان الحاجات اللي كانوا ممكن يعملوها في 100 سنة ، إحنا بنعملها في عشرين سنة بس ، إذا انخفاض معدل أعمار الناس ده برضه نوع من أنواع العدل ، في النهاية الفكرة عبارة عن لعبة توازن ، تعيش اكتر قيمة الوقت تقل ، تعيش اقل قيمة الوقت تكبر ، وفى أخر كلامي ما عنديش حاجة أقولها غير اللي قولته في أوله ، فعلا كل حاجة في الدنيا دى مرسومة صح ، وان الدنيا دى يحكمها اله " بيده ملكوت كل شيء " .. أقولها عن يقين

تيتانيك النسخة العربى

2008-03-09T10:19:00.001-07:00

أنا بحب فيلم تيتانيك جدا ، وبعتبره من أحسن الأفلام اللي شفتها في حياتي ، وأنا مش حتكلم عن الفيلم هو أصلا بيتكلم عن نفسه ، أنا بس عاوزك تتخيل معايا فيلم تيتانيك لما يكون فيلم مصري
أكيد الفيلم حيبقى اسمه الأمورة رشا على أساس إن المركب اسمها الأمورة رشا ، كمان قصة الحب حتبقى بين سعدية وحلمي ، وحلمي اكيد بيشتغل سمكري وبعد ما أتعرف على سعدية وراها صور العربيات قبل ما يشتغل فيها وبعد ما يشتغل فيها ، وسعدية أعجبت جدا بشغله ، كمان في مشهد البصق ، حلمي وهو بيبصق وقعت على راس عوف فيا عيني كل علقة ما كلهاش حرامي في مطلع وسعدية واقفة بتولول جنبه ، والسفينة أكيد غرقت عشان عوضين ولع فيها بسبب شعلة كان واخدها معاه عشان يعمل عليها شاي ، وقبطان المركب الحاج على حدفه من فوق المركب عشان يستاهل ، وأكيد طبعا الداخلية بعد كده اعتبرت عوضين مختل عقليا ، ومش محتاجين نقول إن فرقة الموسيقى في المركب ، الطبال وعازف الأرج والرقاصة ، جريوا على اوض الناس ساعة الغرق عشان يلموا اللي يقدروا عليه بفهلوة جينية مصرية ، وطبعا لما الرجالة على المركب عرفت إن الستات والأطفال هي اللي حتتنقذ الأول قاموا موتوا نسوانهم عشان ما يلقوش ستات فياخدوهم ، وفى الآخر كل اللي على السفينة ماتوا وما حدش نجا عشان بصراحة كلهم يستهلوا يولعوا بجاز وبالذات سعدية وحلمي
أحب اعرفكوا إن الفيلم بطولة احمد السقا ووفاء عامر ، بعد ما رفضت منى زكى الدور عشان فيه قلة أدب ، وطبعا مدحت صالح هو اللي غنى أغنية الفيلم ، والجرافيك أتعمل في نفس المكان اللي أتعمل فيه كرتون بكار والمغامرون الخمسة
الفيلم كسر الدنيا عشان الدنيا عندنا خربانة زى ما قال المغنى اللي مش عارف اسمه ، واعتبر النقاد فيلم الأمورة رشا هو فيلم الموسم ، وكالعادة استضافت هالة سرحان أبطال الفيلم وخلتهم يغنوا ، هو كده لازم تغنى ، ممثل مغنى بتاع بطاطا ، حتغنى يعنى حتغنى ، وسلامات يا سيما

رأى شيطانى

2008-03-07T08:54:00.000-08:00

لما ربنا خلق ادم وأمر إن كل الملايكة تسجد له ، رفض إبليس وركب دماغه وقال مش لاعب ، قصدي مش ساجد ، كان عنده وجهة نظر ساعتها إن ادم ده ما يستاهلش وحيعمل دوشة عالأرض ووجع دماغ عالفاضى ، كمان كان شايف انه في كل الأحوال هو أحسن من ادم ،يبقى ازاى يسجد للي اقل منه من رأيه ، إلا انه في نفس الوقت كان عارف إن رفضه أمر ربنا مش حيفوت بالساهل وأكيد نهايته حتبقى سودة ، عشان كده وعلى طريقة عليا وعلى اعدائى ، طلب إبليس من ربنا انه يديله الإذن يغوى ابن ادم ، وفعلا ربنا أذن له بوجود استثناء بسيط " إلا عبادك منهم المخلصين " ، كان غرض الشيطان من طلبه- بعد ما عرف إن نهايته كده كده مش ولابد – انه يثبت لنفسه على الأقل انه رأيه في الإنسان كان صح ، وفعلا بدأ الشيطان مشواره المراثونى مع الإنسان من أول ادم وحوا ولحد النهاردة ، مر عليه أجيال وأجيال حروب واستعمار ظلم وطغيان ديكتاتوريه وانحلال ، ناس خربتها وقعدت على تلها وناس مش رضيت حتى تسيب التل فهدته بالمرة ، صحيح كان في خير بس كان عامل زى ناموسة بتذن في ودن الشر مش اكتر
لو بصيت في تاريخ البشرية حتلاقى إن سنين السلام ممكن تعدها على صوابعك ، بلاش يا سيدي تاريخ البشرية والكلام الكبير ده ، بص حوليك كده حتلاقى الناس عمالة تاكل في بعض وماحدش سايب حد في حاله ، وكمية نكد وغم ولا كأنك بتتفرج على مسلسل خليجي ، السؤال هنا بقى اللي بيفرض نفسه وعمال يتنطط قدام عنيه ، وداوش دماغي بقاله كام يوم
يا ترى يا هل ترى الشيطان كان على حق في رأيه فينا واحنا فعلا ما نستاهلش اى حاجة ؟؟
لو عندك اجابة برجاء ارسالها في جواب عليه طابع بوستة على شكل عفريت .. وشكرا

حلال ولكن

2008-03-05T07:26:00.000-08:00

عاش ذلك الرجل وعاشت معه فكرته الخاطئة
لم يحاول طوال حياته الزوجية وعلى مدى مرات طوال من العلاقة مع زوجته في الفراش أن تلامس شفتيه نهديها ، كانت عنده معلومة مغلوطة أن ذلك حرام شرعا ، هو لا يتذكر من أين أتى بهذه المعلومة لكنه لم يشك أبدا في صحتها ولم يسع من اجل أن يتأكد منها ، وظل يحافظ على نفسه من أن يرتكب ما حرم الله ، إلا انه في احد المرات وهو يجامع زوجته تملكته شهوته ، وكسرت حواجز الممنوع ، فمال على نهدها بشفتيه كطفل رضيع ، وقد أثار ذلك زوجته فأثاره ، حتى انه لم يمنع نفسه فيما بعد من أن يكرر ذلك في كل لقاء يجمعه بزوجته ، وظل على حاله هذا حتى توفاه الله ، وفى يوم الحساب وعندما وقف الخلق جميعا بين يدي خالقهم كلا يقرأ كتابه ، وجد صاحبنا ما كان من أمره مع زوجته

مكتوبا في سيئاته وبجواره هذه الكلمات
كنت تفعل ما احل الله بإيمان منك انه مما حرم الله لكنك تحديت وعصيت .. فهي سيئة

انا واصحابى

2008-03-05T07:21:00.000-08:00

قريت الكلمتين دول للعبقري عباس العقاد ، اسمع بيقول إيه الأستاذ يا سيدي :
إذا انتشرت الألعاب غير الرياضية كالورق والدومينو النرد والسيجه وأمثالها كان ذلك دليلا على نضوب مادة الحديث في الوسط الذي تنتشر فيه
أنا حاسس بسعادة ما تتوصفش ، الحمد لله أنا عمري وصحابي ما لجأنا للعبة نقتل بيها الوقت ، كنا دايما بنلاقى حاجة نتكلم فيها ، ساعات نهزر وكتير نتكلم جد ، المهم إن إحنا عمر مادة الحديث ما نضبت بينا ، وعمر ما كان المكان اللي إحنا فيه بيفرق معانا ، كنا دايما إحنا اللي بنخلق للمكان متعة مش هو اللي بيخلق لفسحتنا متعة ، في النهاية أنا فخور جدا بصحابي وفخور بكل لحظة قضتها معاهم ، أقول قولي هذا واستغفر الله لي ولهم ولكم ، وسلامو عليكو

بيت العز يا بيتنا

2008-03-03T09:38:00.000-08:00

حدث هذا وأنا في الحادية عشر من عمري ، قررت أن اترك المنزل ولا أعود أبدا بعد أن ارتكبت خطأ فادحا توقعت له عقابا قاسيا من أبى ، لا أدرى ما الذي جعلني أفكر هكذا حينها ، إلا انى بالفعل أخذت دراجتي وانطلقت بها من المنزل في سعادة شديدة وإحساس بالحرية بعد أن فقدت الرقيب على افعالى ، فلن يسألني احد لماذا تأخرت وأين كنت ، وأخذت أدور في شوارع مدينتي منطلقا بلا هدف وكان هذا من أسرار سعادتي فقد اعتدت أن أتحرك بهدف ، وقتها ندمت بشدة على أنى لم أفكر في ترك المنزل منذ زمن ، بغباء أضعت وقتا طويلا متحملا قيود المنزل وأوامر أولى الأمر ، كان يجب أن يكون قراري أسرع من هذا ، كان هذا هو ما شغل تفكيري حينها حتى قادني الطريق إلى مجموعة أولاد يلعبون الكرة ، نزلت من على دراجتي وقررت أن اشترك معهم ، وكانت هذه أفضل مرة لمست فيها قدمي الكرة في حياتي ، انطبعت سعادتي واعتدال مزاجي على ادائى في الملعب ، وظللت منطلقا بلا تعب ولا توقف حتى أتى المغرب وتوقف اللعب وعاد كل إلى منزله بعد إعياء اللعب وأنا انظر إليهم في حسد، أما أنا فقد جلست بجانب دراجتي لا أدرى ماذا افعل ، تملكني الجوع وإرهاق يوم طويل قضيته دائرا دون راحة ، إلا أنى في النهاية ركبت دراجتي في اتجاه منزلنا طالبا الأمان ، وعلى الرغم من عقاب أبى القاسي الذي نلته بعد عودتي ، إلا أنى شعرت بسعادة الدنيا وأنا ممدد في فراشي بسلام .
كنت عائدا من المصيف مع صديقي ، كان الجو حار جدا والقطار بطيء بشكل ممل والعرق تغرق فيه الأبدان ، حتى أن صديقي نام من شدة الإرهاق ، أما أنا فنظرت من شباك القطار وشردت متخيلا نفسي في منزلنا اخذ حمامي والمياه الباردة تتسابق على جسدي مزيلة إرهاق السفر ، ثم أغير ملابسي واقفز على سريري فاردا قدماي ممدا في استرخاء لذيذ حتى أغوص في نوم عميق .
تذكرت هذان الموقفان وغيرهما وأنا عائدا إلى بيتي وشعرت أنى اعشق ذلك المنزل حقا ، ازداد إيمانا كلما كبرت بأفضاله واعترافا بأني مدين له بالكثير ، والكثير جدا .

حكاية طفل

2008-03-01T09:11:00.000-08:00

أطفئت الأم الأنوار وأغلقت باب الحجرة على طفلها ذو الست سنوات ، ليصبح وحيدا في الظلام .
كانت هذه أول ليلة يبيتها وحيدا بعد أن قرر أبواه انه أصبح كبيرا ويجب إن ينام في غرفة مستقلة .
لم يستطع الطفل إن يغلق عينيه ويستسلم للنوم ، كاد الخوف أن يقتله إلا انه لم يستطع الصراخ ، كان يفهم أن من بالخارج لن يعترف بخوفه من المجهول ، لابد إن يكون شيئا محددا واضحا أخافه حتى يقتنع والديه .
مر وقت طويل والنوم لا يريد أبدا إن يتسلل إلى عينيه ، الخوف برد أطرافه وحفز حواسه حتى انه شعر بتلك الهمسات بالخارج ، كان هناك احدهم يتحدث مع أخر بصوت منخفض تماما ، بقليل من التركيز استطاع أن يميز أن هذان الصوتان ليس لوالديه ، اقشعر بدنه وارتجفت أعضائه ، وكاد الرعب أن يقتله ، خاصة بعد أن سمع صياح أبويه بالخارج وأصوات رصاص ، لابد أن يهرب، فاللصوص قادمون لا محالة ، أخيرا وجد لبياته وحيدا فائدة ، فقد كان مصيره الموت الآن مثل أبويه لو كان معهم في نفس الغرفة ، اتجه بسرعة إلى الشرفة الخاصة بغرفته هو ينظر خلفه خشية أن ينقض عليه اللصوص ، نظر إلى الأرض فوجد الارتفاع شاهقا ، هو يسكن في الطابق الرابع والأرض بعيده ولن يستطيع القفز ، إلا انه توصل في النهاية أن يقفز إلى الشرفة المواجهة لشرفته ، حيث منزل جارهم الأستاذ فاضل ، المسافة ليست بعيدة ويمكن أن يستطيع قفزها ، نظر نظرة أخيرة إلى باب غرفته وحمد الله أن أحدا لم يدخل حتى الآن ، ثم اخذ نفسا عميقا وسعادة واضحة ترتسم على وجهه لأنه سيصبح الناجي الوحيد من اللصوص و .. قفز .
لم يستطع الوصول إلى هدفه ، خانته المسافة بين الشرفتين ولم يقدر ان يصل بجسمه إلى الشرفة الأخرى ، ليجد نفسه فجأة يسقط من الطابق الرابع والأرض تقترب أمام عينيه ولا يستطيع أن يفعل شيئا لينقذ نفسه هذه المرة .
نظر بعينيه إلى أعلى بعد أن ارتطم بالأرض وهو يلفظ أنفاسه الأخيرة ليجد أبويه في شرفته ينظرون إليه والهلع واضح في أعينهم .
كان آخر ما سمعه صوت أمه وهى تهتف بأسمه في صدمة ، ثم أغمض عينيه في هدوء واستسلم للموت كما استسلم لخوفه .

وجهة نظر فى طفشان الحضرى

2008-03-01T08:59:00.000-08:00

مش عارف ليه على طول بحس إن موضوع طفشان الحضري ده وراه دماغ نسوان ، بتخيل دايما الحضري ومراته قاعدة جنبه وعمالة تقوله العيال ، المصاريف ، وليه يكون عندنا اقل لما ممكن يكون عندنا اكتر ، وانسف حمامك القديم ، واستمرت عالحال ده – وكعادة النسوان – فضلت تتوغل وتنتشر لحد ما ودت الراجل ورا الشمس ، بدليل انه رجع اهه والدنيا مضلمة في وشه بعد ما اكتشف إن حواء نزلت ادم الأرض بعد ما كان في السما

حكاوى تاريخية

2008-02-28T06:20:00.000-08:00

التاريخ مليان أحداث ومواقف وحكاوى مالهاش اخر ، من أول ما ربنا خلق ادم لحد النهاردة ، وكل واحد ممكن تعلق معاه مواقف معينه من التاريخ صعب انه ينساها لأنها أثرت فيه بشكل معين أو على الأقل لفتت انتباهه .. أنا مثلا عندي كام مشهد تاريخي لزقين في دماغي ولفتوا انتباهي بشدة ،بداية خد عندك يا سيدى مشهد قتل قابيل لأخوه هابيل عشان خناقه على مين يتجوز واحدة ( اختهم أصلا ) كانت عجباهم هما الاتنين ، والغريبة يا سيدي إن الجريمة دى على الرغم من إنها من ألاف السنين إلا إنها بتكرر بنفس تفاصيلها لحد النهاردة ، والله العظيم حاجه تضحك لما افتح الجرنان في سنة الفين وتمانية والاقى جريمة حصل أختها من أيام ادم ، مش ناقص غير إن القتيل يبقى اسمه هابيل .
عندك كمان مشهد عمر بن الخطاب وهو واقف يوم الهجرة ولامم حواليه الكفار وبعرفهم انه حيهاجر دلوقتى والراجل يطلع وراه .. منتهى الشجاعة والبسالة اللي في الدنيا ، اكتر استحقار لعدوك انك تعرفه أنت حتعمل إيه ، وما يقدرش برضه يعملك حاجه ، مفيش بعد كده ثقة في النفس يا فاروق ، والله ليه حق الشيطان يجرى منك لما يشوفك ، وليهم حق الكفار ماحدش منهم يفكر يطلع وراك خطوة ، ما حدش مستغنى عن عمره ، وثقه زى دى أكيد لازم تولد الجبن .
وفى كمان مشهد نكسة 67 لما القيادة عرفت خلاص إن العملية باظت وخربت ، طلبوا من الجنود الانسحاب ، ولما سألوا ايه خطه الانسحاب ، كان الرد " انسحبوا وخلاص " ، عشان تكون دى أعظم خطة انسحاب فى التاريخ ، ويتحول جنودنا إلى أهداف بيتعلم عليها الجنود الاسرائليين التنشين ، وينتهي الموضوع – زى ما حكي ليا أبويا وأمي – إن ماكنش في شارع في مصر إلا وفيه اتنين شهدا على الأقل .
كمان في مشهد سيدنا موسى لما طلع الجبل عشان يجيب التعاليم من ربنا سبحانه وتعالى وساب وراه قومه بيعبدوا الله ومقتنعين بدينه وميه ميه ، ولما ينزل يلاقى الناس صنعوا عجل وقعدوا يعبدوه وولا كأن موسى قال حاجه ولا عمل حاجة والأمور ماشية والزهايمر شغال عجب ، بجد حاجة تشل ، ربنا يديك على قد صبرك يا سيدنا موسى على العالم دول ، أنا أمنت فعلا من الموقف ده إن الأنبياء ربنا نعم عليهم بصبر غريب ،اى واحد عادى مكان سيدنا موسى كان طب ساكت في ساعتها وعداد عمره ولع من الغيظ .
وكمان مشهد شجره الدر الملكة العظيمة وهى بتموت بالقبقاب ، حد كان يتخيل الموتة الصراصيرى دى لملكة فاتنة حكمت مصر فترة والرجالة أيامها كانوا يتمنوا ليها الرضا ترضا ، لكن تقول إيه بقى في أفعال الزمن ، وتقول إيه في حظها النحس اللي وقعها في ايد واحدة ست ، عشان تنتقم منها انتقام لو أتلم رجالة الدنيا عشان يخترعوا انتقام زيه ولا كانوا يعرفوا ، وتاخد أم على - اللي موتت شجرة الدر- براءة اختراع اسمه الإعدام ضربا بالقبقاب ، وهو ده كيد النسوان زى ما الكتاب بيقول .
أخر مشهد لعلى بن أبى طالب لما معاوية عصى أمره وخرج لحربه ، وطبعا كان لازم يواجهه على لكن قومه رفضوا يخرجوا معاه للحرب وسابوه بطوله مش لاقى حد يساعده على مواجهة الباطل ، وفضل على رضي الله عنه يخطب فيهم عشان يتحركوا بأبلغ كلام سمعته في حياتي منه مثلا :
( يا عباد الله ، مالكم إذا أمرتم أن تنفروا في سبيل الله اثاقلتم الى الأرض ، أرضيتم بالحياة الدنيا من الآخرة بدلا ، وبالذل والهوان من العزة والكرامة خلقا ، افكلما دعوتكم إلى الجهاد دارت أعينكم في رءوسكم كأنكم من الموت في سكرة ، وكأن قلوبكم قاسية )
ومن خطبه فيهم أيضا :
( أيها الناس أصبحت لا اطمع في نصركم ، ولا اصدق قولكم ، فرق الله بينى وبينكم ، وابدلنى بكم من هو خير لي منكم )
شوفت إحساس بالانكسار اكتر من كده ، إمام وقائد عظيم نفسه يواجه الباطل بس للأسف مش حيقدر لوحده وفى نفس الوقت مش لاقى حد يساعده ، كتب التاريخ حاولت كتير توصف مشاعر سيدنا على أيامها ، بس مهما حاولوا مش حيقدروا يوصلوا الإحساس ، صعب الكلام يعبر عن مشاعر إنسان حس فجأة بالانكسار والخضوع .
دى كانت المواقف اللي نالت اهتمامي ، وممكن حد غيري يشوف غيرهم ، العملية عبارة عن إحساس ودول كانوا بعض المشاهد اللي أنا حستها .

كليوباترا ام سدر محروق

2008-02-26T09:46:00.002-08:00

اول مرة شفت فيها المنظر الغبى ده كان فى بيت واحد صحبى
كنا قاعدين لقيته بيقولى شفت الرسمه الجديده اللى على علبة الكليوباترا ، قلتله لأ ، قالى طب استقبل يا معلم ، وراح مطلعلى العلبه ، قلبى اتقبض لما شفت المنظر حسيت بكمية اشمئزاز ما حستش بيها قبل كده ، ايه القرف ده ، الرسمة يا سيدى- لو ما كنتش شفتها – عبارة عن سدر محروق المفروض انه لواحد بيدخن سجاير .
انا والله كنت ناوى احط الصورة هنا للى ما شفهاش بس بينى وبينكو صعبتوا عليا فقلت بلاش تشفوها عن طريقى كل واحد يعرف بمعرفته ، المهم ، انا ما بقتش عارف احدد انا فى صف ان رسمة زى دى تطحط على علبة السجاير ولا لأ ،ساعات اكون مع وساعات اكون ضد ، بس كل اللى اعرفه ان الكليوباترا سجاير وان الميريت ومارلبورو برضه سجاير مش عسل سدر جبلى مثلا ، يبقى ليه الرسمة دى الاقيها على علبة الكليوباترا بس ، وللا حتى التفرقه بين الغنى والفقر فى السجاير كمان ، انا ما بقتش فاهم حاجه ، حاجه تخلى برج من عقل الواحد يطير ، معقولة فى كده فى الدنيا ، يعنى الغلبان الغلب حيفضل ماسكه حتى فى دى ، والغنى لازم يترفع ويتميز حتى فى دى ، ده مش بعيد يكتبوا على علب سجاير الاغنياء " مفيده جدا للصحة وتسبب النجاح " زياده فى الحرص على مشاعر السيادة ، رائع جدا اللى عمال بيحصل ده ، وسلملى على مصالح الناس عند الموظف الغلبان اللى قرفان من نفسه وكمان حيلاقى المنظر ده فى وشه .

خواطر واقعية

2008-02-26T09:46:00.000-08:00

هذه الكلمات كتبتها من اجل صديقى بعد تجربه واقعيه حدثت له طلب منى تدوينها بأسلوبى ، وقد اثرت وضعها على المدونة بعد ان تبين لى ان هناك الكثيرين ممن مروا بمثل تلك التجربة فى مجتمعنا الذى تحاصره الظروف الصعبة .. قد تعتبرونها خواطر او اى شىء الا انها فى النهاية خرجت من داخلى بعد ان عايشت مع صديقى قصته .. واليكم ما كتبته
" للدنيا عجائبها ، وللبشر ايضا عجائبهم ، وهناك فى حياة كل منا عجائب خاصه به هو ، لا يفهمها ولا يدرك مغزاها الا الشخص ذاته .. انا مؤخرا اكتشفت واحدة جديدة من عجائب حياتى .. البالون .. ذلك الشىء الذى ينتفخ ولا يحوى شيئا .. لكنه فى نفس الوقت يحوى شيئا والا فكيف انتفخ هكذا .. اذا فهو يحوى ولا يحوى ، ممتلىء ولا ممتلىء ، او بمعنى اخر .. الفراغ الممتلىء .
وما الذى دفعنى لأعتبار ذلك احدى عجائب حياتى ؟ .. لأنى شعرت ان حياتى العاطفية وعلاقتى بسلمى اصبحت تشبه البالون لحد كبير .. اواه يا سلمى ، كم احتوتنى احضانك عندما جافتنى الدنيا .. كم افطمنى عسل شفتيكى عن مر الدنيا .. كم تدثرت بحنانك عندما شعرت بقلة حيلتى وضعف مستقبلى .. كم قلت لى مرارا " لبيت تخفق روحك فيه .. احب اليا من قصر من ذهب " .. كم وكم يا سلمى .. اننى لى ان اتناسى صاحبة عمر وحبيبة قلب .. اننى لى ان اتناسى ضراوة دفاعك عنى وانهار دموعك التى سكبتيها من اجلى .. كيف اتناسى نفسى ؟؟ .
اواه يا سلمى .. كم اقشعر بدنى واضمحلت احلامى وانا اصغى لحديث ابى " انت بلا مستقبل واضح ، ومازال امامك الكثير حتى تكون قادرا على الارتباط .. اتركها ان كنت تحبها ولا تدع سنين عمرها تتساقط هباء "
احتبست انفاسى وتدافعت كلماتى كالصراخ .. لماذا لا تفهمونى ؟؟ .. هى بالنسبه لى غاية ووسيلة .. وسيلة لا بد ان تبقى جانبى حتى اصل لما احلم ، وغاية سأبذل كل ما فى وسعى لأصل اليها .. الا ان كلماتى كانت كالعدم .. واحتكم الاخر فى امر علاقتنا بالفراق .
حاولت ان اصمد واكتم على احزانى ، وارضخ لما اتت به الأقدار .. الا نك كنت كما اعتدتك باسلة فى الدفاع عن حبك لى .. لتخبرينى انه مادام قد كتب لكى ان تصبحى لغيرى فلا احرمك ان تنامى فى احضانى حتى يأتى غيرى هذا .. ولأجد انا نفسى تائها لا ادرى اين الصواب .. اتركك لأنه لا يصح ان انتهك حرمة غيرى .. ام ابقى جانبك كما يصرخ بى قلبى حتى الرمق الأخير .. اين الحقيقة ، لا ادرى .. الى اين تأخذنى الدنيا ، لا ادرى .. متى ترضى عنى الأقدار ، لا ادرى .. لا ادرى ، لا ادرى ، لا ادرى .. وسأظل هكذا اردد لا ادرى ، وسأظل اردد :
" انا قلبى زى بالون منفوخ مفيش "

رباعيات

2008-02-24T10:36:00.000-08:00

من خوفى من الضلام والسكون
نورت شمعة بضى هادى حنون
ظهرلى ضلى قصادى شكله رهيب
طفيت الشمعة خوفى من الضلام يهون
**************
بصيت لنفسى فى المرايا لأجل اشوف النسخة
عجبى لقيت بقع سودة على صدرى راسخة
قلبى اتفزع ، والعيب ما كنش منى
العيب فيها المرايا هى اللى وشخة
*************
عبرت حدود الجسد ولبست طقية لخفه
صبحت روح انا شايف الكل وعن الكل بخفى
لفيت لأجل ما الاقى مين يبيع نفسه عشانى
ما افضلش غيرك انتى ياللى شلتى فى اللفة
************
موسى سأل لأجل يفهم والسؤال مباح
حيطة خبيث تنبنى ودم الولد ينباح
موسى عرف والعلم راحة ونور
اه لو اكون زى موسى وارتاح
**************
واحد مات واندفن والديدان ما خلتش
جسمه اللى مات وروحه مامتتش
زى لمبه اتحرقت فانطفت انوارها
والكهربا موجوده ما اتقطعتش

حنين

2008-02-24T10:27:00.001-08:00

انا من عشاق البحر .. مجرد جلوسى مسترخيا على شاطئه يمثل لى لذه .. اتنفس هواءه ، اداعب بأقدامى رماله ، ارى التقاؤه مع السماء على امتداد بصرى فى مشهد خلاب طالما سحرنى وأثار تأملاتى .
الا اننى وفى تلك اللحظات تحديدا كنت شاعرا بالملل نوعا ما .. ربما بسبب شمس الظهيره الحارقة ، او لأننى لا اجد من احادثه فقد كنت وحيدا على الشاطىء او ما شابه ذلك .. حتى اتت هى .. فتاه –لو لم تكن ملاك – ينخسف لها القمر ، تنطفىء لها النجوم ، تحتكر الفتنه عندها لتسترق بها من تشاء .
كانت الفتاه مع ابوها وامها واخوها حسب تخمينى ، وجلسوا على الشمسيه المجاوره لمكانى ، حينها شعرت ان الشمس تدغدغ جلدى بعد ان كانت تحرقه ، والحراره خارجه منى وليست داخله اليا .. وتحول خمولى الى نشاط .. عقلانى .. فقد كان خجلى دائما كالحائط امام علاقتى بالنساء .. كنت دائما ما اتلعثم وارتجف ويمنعنى الخجل اللعين الكامن داخلى من اىخطوه ايجابيه ناحيه اى فتاه .
لهذا فقد ادعيت قراءه الجريده واكتفيت ان اختلس النظر اليها بين حين واخر .. ومن نظراتى احسست فى عينيها ميولا ناحيتى ، فرقصت مشاعر الرجل داخلى ، وانتظرت اللحظه الحاسمه لأقتطفها ، او بمعنى ادق ، تنضج هى وتسقط وحدها .
حتى همت هى بسؤال والدتها بصوت مرتفع نسبيا عن امكانيه وجود من يبيع الجرائد فى ذلك المكان .. ولم تكن اجابة امها ذات فائده فقد كانت هى الأخرى لا تعلم .. هنا استجمعت قوتى واخذت نفسا عميقا ، وبلباقه لا اعلم من اين اتيت بها ، عرضت عليها مساعدتها وايصالها .. جاوبتنى بأبتسامة مع كلمات شكر لأنى سأتكلف مشقة من اجلها – ليتها اتعلم انى يمكننى ان احملها وادور بها العالم وانا سعيد – وبادرت امها بشكرى وحثى على مرافقتها .. هنا ضمنت انى سأحادثها ، لكنى لم اضمن خجلى ان يمنعنى .
مشيت الى جوارها والارتباك واضح على معالمى ، انظر لها تارة وابتسم اخرى دون ان ادرى ماذا افعل .. حتى انقذتنى هى بسؤالى عن اسمى ومن اى بلد انا .. فأجبتها ورددت اليها سؤاليها ، فعلمت ان اسمها حنين ، وهى ايضا من سكان العاصمة مثلى .
الى هنا كنا قد وصلنا الى مقصدنا ، واشترت هى جريدتها – لم يفتنى انها الأهرام – ومشينا فى طريق العودة دون ان يتصل بيننا حديث .. فقد عدت انا الى ارتباكى ونظراتى ، واكتفت هى بنظرات مماثلة .
مر الوقت سريعا ومالت الشمس الى الغروب ، وانا ما بين تردد وارتباك ، اقدام واحجام ، حتى استعدت اسرتها للرحيل .. هنا انقبض قلبى واحسست فى عينيها اضطراب وقلق ، لابد ان افعل شيئا ، الا ان خجلى قبحه الله كان لى بالمرصاد ، ومنعنى من ان اطلب منها لقاء او موعد .
مضت هى مع اسرتها بعد ان رمقتنى بنظرة لن انساها ما حييت ، ارجوك تكلم ، لا تتركنى هكذا ، هذا ما كانت تنطقه عينيها فى تلك النظرة المتوسلة ، الا انى لم اتحرك ولم ابادر ، حتى انطلقت مع اسرتها وتباعدت بيننا المسافات .
ايتها الفتاة التى تقرأ الأهرام وتسكن القاهرة .. ايتها الفتاة التى ظلمتها .. حنين .. لن اسامح نفسى .. سأظل ابحث عنكى طالما فى العمر بقية .. سأجول القاهرة من قصورها الى قبورها كل يوم .. لن اسأس ولن امل .. فاما اجدك وتشرق الدنيا لى ، واما اقسم بمن فطرنى انى لن اعرف بعدك امرأة .. ولن اعشق ما حييت .. وسيبقى داخلى .. حنين .

خواطر

2008-02-22T11:39:00.000-08:00

خواطر
النوم هو افشل خطه لقتل الفراغ
الايمان بالذنب وفعله ابشع مرض يصيب الضمير
غموض الموت فى عشقه للسواد
امريكا علمتنا ان الشعور بالأمان مرتبط بالصمت
انسان بلا قلب .. حيوان ذكى
اشرف مياه تعرفها الأرض .. عرق مجتهد
المراهق حيوان فى موسم التزاوج
سيد الموت خالقه
الهارب من الواقع .. مجنون او عبقرى
الشك سلاح العظماء
استعجالك النتيجة .. بداية اليأس
حتى اللص لو اخلص يكافؤه القدر
الرضا احيانا يقتل الأمل
لو احترم الموت من احترمه .. لخلد الفراعنة
اللسان يخفى ما تظهره العيون

2008-02-22T11:29:00.000-08:00

الدور
بما أنى في هذه الدنيا, حي أسعى على ارض هذا الكوكب.. وبما أنى اعشق التأمل في هذا الكون.. وبما أنى لا أحبذ أن أتطرق في تأملاتي لقضايا غيبيه لن يفيد بحثي فيها, كأمثلة: لماذا خلقنا الله في هذه الدنيا؟؟ , او لماذا خلقت هذه الدنيا من الأصل ؟؟
فكل هذه الأسئلة لن تؤدى إلا إلى شطحات كأن تجد نفسك تفكر في أن الدنياما هي إلا حرف في سطر في صفحه في كتاب كبير هو سيناريو الكون.. ولم لا ؟ , ليصبح ما نرهق فيه أذهاننا على انه غاية ما هو إلا وسيله لغاية أعظم واعقد بكثير.. جدا
لهذا وتجنبا لتلك الشطحات قررت أن لا أخوض في تلك المناطق المعتمة, أو بمعنى أدق شديدة الضوء فلا يمكنني أن أرى لأصل.. وتتحول اجتهاداتى لعذابات لا طائل من ورائها.. واحمل عقلي ما لا طاقه له به .
دعونا إذا نتحدث في موضوع قوى وحيوي وفى نفس الوقت قابل للاجتهاد , يمكن تلخيصه في سؤالين اثنين ..
" ما هو حجم الدور الذي تلعبه في الحياه, وهل على طول حياتك تحصل على دور واحد فقط ؟؟ "
وقبل أن أضع لك أجوبه لهذه الأسئلة.. اقرأ معي السطور القليلة القادمة بتركيز...
"رضيع اكتشف الأطباء مع ساعاته الأولى في الدنيا انه يحتاج لعمليه جراحيه عاجله.. ليصبح أبوه في مأزق مع دخله المحدود.. ويلجأ إلى الاختلاس لينقذ حياه ابنه.. لكن شاء الله أن يموت الطفل.. ويعاقب أبوه بالسجن.. ليضغط أهل زوجته عليها أن تتطلق منه.. وتحصل على الطلاق فعلا.. ثم يضغط أهلها عليها مره أخرى لتتزوج.. وتلبى ثانيه رغبه الأهل وتتزوج.. لتنجب طفلا يصبح بعد ذلك عالما يخترع اختراعا يغير العالم ويحدث طفرة غير مسبوقة على سطح هذا الكوكب.. "
أرجو أن تكون توصلت لشيء من مثالي هذا..
فانظر إلى عمر ذلك الطفل.. ساعات معدودة.. وانظر إلى حجم الدور الذي لعبه..
سبحان الله.. دائما ما تؤثر وتتأثر شئت أم أبيت.. ولن يخلقك الله هكذا هباء حتى لو قضيت في هذه الدنيا دقائق هي كل عمرك .. لابد أن يكون هناك شيء ما احدثته .. لابد أن تؤثر والا يصبح وجودك عبث..
ولن تستطع مهما حاولت أن تحصى عدد الأدوار التي لعبتها في هذه الدنيا.. فقد تحرك حجرا بقدمك وأنت سائر في الطريق من مكان لمكان ليترتب على ذلك أحداث جسام لم تكن أبدا في حسبانك..
وإذا كانت المياه على سطح الأرض لا تتجدد وحجمها لا يتغير منذ خلقها الله .. وكما يقولون قد تكون المياه التي تشربها الآن هي التي استخدمتها كليوباترا للاستحمام.. أيضا قد تكون هذه اللحظات التي قضتها كليوباترا في الاستحمام هي السبب فيما انت عليه الآن
لا تندهش قارئي العزيز.. فكل حبة رمل على هذه الأرض خلقها الله لسبب وتلعب دورا ما في هذه الحياة دون أن تشعر..
وهذا اكبر دليل على وجود اله عظيم يحكم كل هذه التفصيلات بكثرتها وتعقيدها.. وان الدنيا ليست كما يقول البعض وجدت بالصدفة.. وان الإنسان أصله قرد أو ( سلعوه ) لا أتذكر..
فلو لم يكن هناك اله قادر على كل شيء, لا يغفل ولا ينام .. لأفلتت تفصيله من هذه التفصيلات واددت إلى نهاية حياتنا منذ ألاف السنين.. وهذا لمن تأمل و .. تفهم .

2008-02-21T06:20:00.000-08:00

الحب
ايه هو الحب ؟؟
ما اقدرش اقولك ايه هو الحب بالظبط .. ولا حد قدر يقولنا ايه هو الحب على مر العصور كلها ..يعنى تقدر تقول كده ان تعريف الحب هو ( اللا تعريف ) بمعنى ان مالوش تعريف محدد اتفق عليه الناس , لكن كل واحد ممكن يكون عنده تعريفه الشخصى للحب من وجهه نظره هو , كمان مستحيل توضعله قاعده لأن ببساطه اول قاعده فى الحب ( مافيش قاعده ) .
والحب مش مجرد كلمه بتعبر عن شعور معين يجى فى دماغك اول ما تسمعها .. الموضوع اوسع من كده بكتير .. لأن الحب عامل زى صندوق كبير مليان بكل المشاعر اللى خلقها ربنا .. يعنى الاخلاص موجود فى الحب , الحنان فى الحب .. التضحيه فى الحب .. تقدر تقول ان الحب هو المنبع اللى خرج منه كل المشاعر اللى عرفها الانسان .
والحب مش المقصود بيه حب الأب والأم والأخوات .. لأن ده حب فطرى اتولد معاك .. يعنى ما تقلش انا انسان رومانسى لمجرد انك بتحب بابا وماما .. حبك للأب والأم يدل على انك انسان بيحترم فطرته ليس الا .
وفى اسطوره اغريقيه لذيذه جدا عن الحب .. بتقولك يا سيدى ان اله الجنون ( اله اهبل , ما علينا ) صعب عليه كيوبيد اله الحب لما لقاه اعمى ومش عارف يمشى .. قام سيادته مشكورا اتبرع وقرر ياخد بأيده فى الطريق .. حاجه كده شبه محمود عبد العزيز فى الكيت كات وهو سايق الفيزبا .
وكل ( روميو وجولييت) يعنى كل عاشق وعاشقه بتقابلهم مشكله كبيره جدا .. هى الفضفضه .. لأنه مش بيلاقى حد قادر يفهم الكلام اللى بيقوله عشان يفضفضله .. كمان صعب حد يفيد برأى لأن الموضوع متعلق بالأحاسيس ومحاولتك لترجمه الأحاسيس لكلام بيهدمها وما يخليش ليها معنى .. لكن منعا لأى اتهامات بالجنون بيضطر الحبيب يجيب واحد يحطوا قدامه منظر وخلاص احسن ما يكلم فى الحيطان وساعتها يبقى اهبل رسمى ومش بعيد يتعين ( اله الهبل ) .
وفى رأيي المتواضع ان الحب ما فيهوش محايله .. يعنى اذا ما حستش الحب فى عنين اللى قدامك .. يبقى انسى .. وما تتعبس نفسك فى اى محاولات لكسب حب الاخر .. لأنه لو حتى حصل بعد ما مشيت على ايديك ووافق الطرف التانى مشاركتك العلاقه حتبقى انت عامل زى فأر التجارب .. (حبيب على ما تفرج ) , يعنى كلام فارغ .. لأن كده الحب حيبقى نقص منه اهم مميزاته ( الفجائيه ) وكمان ى نقص منه سحر السؤال الخالد : انا ايه اللى بيحصلى ده ؟؟ .
والشعور بالحب عمره ما كان نوع من انواع الرفاهيه .. الحب موجود بين الغلابه زى ما هو موجود عند الاغنياء .. والحب موجود فى امريكا وموجود برضه فى الصومال .. ده انت حتى ممكن تقول ان الرفاهيه هى اللى فسدت الحب .. وفى الحياه بتلاقى اتنين منتهى العز والفخفخه , واغلى الهدايا بتداول بينهم فى المناسبات ومش مستقرين فى علاقتهم زى اتنين كل الهدايا اللى يعرفوها فى الدنيا ورده تتحط وسط كتاب لأجل يحافظ عليها مع الزمن .
وما تقدرش تقول على اى علاقه فشلت بين اتنين ان الحب ماكنش موجود فيها .. لأ الحب كان موجود , بس بشكله السلبى .. يا اما الولد كان بيحب نفسه , او كان بيحب يبان جان , او كان بيحب جمال البنت مجرد زى اى مليكان .. يا اما البنت كانت بتحب المظهره , او بتحب المحفظه بتاعه حبيبها , كده يعنى .. المهم ان الحب موجود , بس بشكله السلبى زى ما قلت .. وده فى حد ذاته يعتبر مرض , ربنا ما يورينا .
الحب ممكن تألف فيه مجلدات , والكلام فيه ما بيخلصش .. وانا لسه عندى شويه كلام .. فكرونى ابقى اقولهم .. او لو مش عجبكم كلامى اللى فات .. لغوشوا عليا عشان ما افتكرش
اكمل الموضوع .. وسلام ....

2008-02-21T06:17:00.000-08:00

سكت الكلام واللسان اتكتم .. بكل معنى جميل بينا اتقسم ..
اه لو رضيت يا حبيبى انا .. تعيش لقلبى زى ما رسم
شىء بسيط طلبت تغيره .. كان فى ايدك انك تعدله ..
واستنيت كلمه اؤمر .. استنتها بالعشم
لكن صدمنى .. ردك وخدنى .. لحد خزنى
وايه يهون .. وانت فى قلبى .. زى الوشم
*************************
غيرينى ..
غيرينى بكلمة واحدة
غيرينى بنظره ساحرة
غيرينى لحد تانى .. اخطفينى
غيرينى ..
غيرينى وانتى قادرة
غيرى روحى اللى شاردة
غيرينى انا كلى ليكى .. املكينى
غيرينى ..
غيرى صورتى فى مرايتى
رجعى احساس سعادتى
نفسى راضية بس نفسى .. تحضنينى

2008-02-21T06:07:00.000-08:00

يا حبيبتى يا مصر
لو شفت كام كلمه مصر اتقالت من القلب فى وقت بطوله افريقيا .. حتتمنى البطولة تبقى كل يوم .
لو شفت لعيبتنا اد ايه كانوا رجالة واصرارهم يهد الجبل وازاى كنا وثقين فيهم .. حتتمنى البطوله تبقى كل يوم عشان نكسبها .
لو شفت مرسى ابن الزناتى ( الكاميرون وكوت ديفوار ) وهما بيتهزموا مننا بالأربعة .. حتتمنى البطولة تبقى كل يوم .
لو شفت الناس وهى بتغنى مع شاديه يا حبيبتى يا مصر .. حتتمنى البطولة تبقى كل يوم .
لو شفت اعلام مصر وهى بترفرف فى البلكونات بعد كل فوز .. حتتمنى البطولة تبقى كل يوم .
لو شفت الابن وهو بيحضن ابوه وقت الجون فى لحظه ما بتتكررش كتير .. حتتمنى البطولة تبقى كل يوم .
لو شفت الناس فى المواصلات وهم بيقربوا من بعض وبيتعرفوا على بعض عشان يتكلموا عن منتخبنا .. حتتمنى البطولة تبقى كل يوم .
انا شفت كل ده وانت اكيد كمان شوفت وحسيت .. فرحت وبكيت من الفرحة .. طرت ورقصت وغنيت بأسم مصر .. جريت والعلم فى ايدك والأرض مش شيلاك .. حسيت بوجود الوطن فى قلبك ، وأد ايه انت بتحب بلدك ...
انا اتمنيت البطولة تبقى كل يوم .. اتمنيت ان مصر تفضل فرحانة على طول .. البلد دى لما بتفرح بتبقى جنة .. البلد دى الحزن زى تراب مغطى حاجات كتير حلوة فيها ، ووقت لما بتهب عاصفة الفرحة وينكشف الحزن .. بتبقى ام الدنيا على حق ...
انا اتمنيت حاجات كتيرة قوى من ضمنها ان الدنيا كلها تسمعنى وانا بقول .. يا حبيبتى يا مصر .

2008-02-20T06:11:00.002-08:00

رباعيات

فى يوم بعيد كان للحب زهره
دار الزمن دبلت وصبحت صفرا
وبتسأل ايه اللى جرى فى الدنيا
لما يموت الحب يجرى ما يجرى
*****************
اسمع ما تسأل حق ولا حدوتة
عن قلب نسمه ربيع لأحلى بنوتة
حبت ولد رفرف جناح الهوى
مرت سنين ولسه بحبه مربوطة
*******************
عالبحرسارح من الحياة مليت
الموج حدفلى قمقم وفيه عفريت
قالى شبيك لبيك تطلب ايه ؟؟
ضحكت بسخريه وسبته ومشيت
***************
ياللى واخدك غرورك والدنيا فانية
مش دايمه ليك والله ماهى دايمة
حب الناس فى عين الناس تزيد
دى السبعه لمى تنحنى تصبح تمانية
**************
صدق اللى قال بلا هم
وان كان جرح مسيره يتلم
دمعة فى عز الفرح ترويه
ضحكه فى عز الحزن يتسم

2008-02-20T06:11:00.001-08:00

قصة قصيره

تسبيحات شيطان
انا رجل فى السبعين من عمرى ..
عهدت نفسى طوال حياتى صابرا .. كان الصبر – وما زال – اهم ملمح وابرز علامة لشخصيتى .. واحقاقا للحق ، فلم تنمو داخلى تلك الميزة من مثابرة منى او حسن تدبير الا انها كانت هبة من الله ومنحة فاضلة لا تستحق منى الا ان اكون عبدا شكورا حامدا الله على رزقه وعظيم نعمته .
ولم تنشأ داخلى تلك الخصلة فجأة ، او فى مرحلة عمرية معينة ، الا انها وجدت معى منذ طفولتى ومع سنينى الأولى على تلك الدنيا .
فكيف انسى وانا مازلت طفلا فى السادسة من عمره ، اختلف مع اختى الصغيرة – رحمها الله – فأحرق عرائسها انتقاما لنفسى .. لتبكى هى لأبى ، ويأتى هو ليوجعنى بقبيح الألفاظ ناعتا تصرفاتى بالحماقة .. ورغم ما كان يخلف ذك داخلى من ألم ، الا انى .. صبرت .
وكيف انسى ذلك العصفور الذى اتى به ابى وانا فى نحو الثامنة من عمرى تقريبا ، ليحظى باهتمام اسرتى وعنايتها .. الا انه كان بالنسبه لى ليس الا مجرد شىء مزعج يوقظنى كل يوم من نومى بزقزقته اللعينة التى هى عندى نباحا وانكر الأصوات .. ولهذا فقد قررت باحسانى ونبل اخلاقى ان اخلصه من محبسه فى قفصه واطلق سراحه عند بارئه يرفرف فى جناته مختالا فرحا .. فسكبت عليه قليلا من الجاز ، وبعود ثقاب واحد انهيت المسألة .. ليأتى ابى ويقف مشدوها امام منظره ويوجعنى بعدها ضربا وسبابا .. الا انى احتملت كل ذلك .. وصبرت .
عى هذا المنوال عشت حياتى .. ومن اشباه هذه المواقف واجهت الكثير فى اطوار عمرى من طفولة وصبا وشباب .. حتى انى عندما نويت الزواج واخترت شريكة حياتى .. قمت بفحوصات طبية قبل الارتباط لأكتشف عدم قدرتى على الانجاب .. لكنى اخفيت ذلك عنها وتزوجتها حتى لا يشاركنى احد فى ثواب الصبر والاحتساب .
وبدأت حياتى الوظيفيه تاجرا يحبو نحو النجاح .. هازما الصعاب مروضا للظروف حتى امن الله عليا بالفلاح لأصبح من اهم التجار فى السوق ، ليس لى الا منافسا واحدا ، وفقنى الله لقتله .. فلم يكن يصلى ، ولا يستحق امثال هذا الا القتل او ما هو اشد وطأ .. ورغم كل ما اثير حولى من اقاويل ، ورغم كل الشبهات التى مستنى الا انى كنت جلدا متيقننا من نبل اغراضى .. فتخطيت كل ذلك .. وصبرت .
والان بعد ان مرت بى السنون ووصل العمر الى ارذله .. انهيت كل تجاراتى واوقفت كل اعمالى ، فلم تعد الصحة كما كانت ولم تعد النفس تشتاق للعمل كسابق عهدها .. وبما انى لا املك صديقا او حبيبا يؤنس وحدتى – ولا اريد – فقد اتجهت لشغل فراغى بتربيه القطط .. اهتم بها وأرعاها حتى تعتادنى واعتادها واشعر انها اخت حيزا من قلبى ، وهنا تصدمنى الحقيقة .. فقد شارك الله فى الفؤاد شريك .. ولا استطيع ان احتمل عذاب ضميرى وخوفى من عقاب الجبار ، فأقوم بسلخ جلد القطة وهى حية تسعى اسمع مواء اقرب الى الصراخ ، واحتمل حتى يقبل الله توبتى ويغفر لى .. ثم اضعها فى ماء يغلى لتلفظ انفاسها الأخيرة امام عينى وانا متجلدا حابسا الامى محتسبا اجرى عند الله .. ثم امزق بطنها واخرج احشائها واتركها على حالتها بعد ان اغلق الغرفه عليها .. لأتى بعد يوم او يزيد فأفتح الغرفة واجلس وسط تلك الرائحة العفنة اشتمها ولا تهتز لى شعره او تأخذنى شفقة فقد اغضبت الله ، ومن اجل ان يقبل توبتى عانيت ما عانيت .. وصبرت .

2008-02-20T06:06:00.000-08:00

فكرت ان يكون عندى مدونة، شعرت انها منبر جيد يمكننى ان ابوح من خلاله بأفكارى وفى نفس الوقت الملمها بدلا من ان تبقى مبعثره داخل خلايا عقلى .. وعندما اتم صديقى تصميم المدونة وامسكت بالقلم حتى اكتب اولى تدويناتى حانت منى التفاته لمكتبتى .. اسماء عملاقه اراها امامى .. عباس العقاد ومصطفى محمود ونجيب محفوظ .. اسف يا اساتذتى ، انا لا احاول ان انافسكم ، ولا احاول ان اناطح بكتاباتى ابداعكم ، فأنا كمن يضرب الصخر برأسه لو فكرت ان ابارزكم ، لكنى فقط اطلب منكم سعة الصدر فان اجدت فهاذا بفضلكم وان اخفقت فيكفينى شرف المحاوله ، وانتم ادرى منى بأهميه المحاولة ....
اتمنى من الله ان اجيد وافيد واستفيد .. ولا اجد ما احفز به نفسى اكثر من مقوله للعملاق نجيب محفوظ جعلتها دعاء لى " اللهم اجعل كلامى يجد فيه السامع الحكمة فيما يفهمه منه والشعر فيما لا يفهمه يارب العالمين " .