Sunday, February 24, 2008
رباعيات
من خوفى من الضلام والسكون
نورت شمعة بضى هادى حنون
ظهرلى ضلى قصادى شكله رهيب
طفيت الشمعة خوفى من الضلام يهون
**************
بصيت لنفسى فى المرايا لأجل اشوف النسخة
عجبى لقيت بقع سودة على صدرى راسخة
قلبى اتفزع ، والعيب ما كنش منى
العيب فيها المرايا هى اللى وشخة
*************
عبرت حدود الجسد ولبست طقية لخفه
صبحت روح انا شايف الكل وعن الكل بخفى
لفيت لأجل ما الاقى مين يبيع نفسه عشانى
ما افضلش غيرك انتى ياللى شلتى فى اللفة
************
موسى سأل لأجل يفهم والسؤال مباح
حيطة خبيث تنبنى ودم الولد ينباح
موسى عرف والعلم راحة ونور
اه لو اكون زى موسى وارتاح
**************
واحد مات واندفن والديدان ما خلتش
جسمه اللى مات وروحه مامتتش
زى لمبه اتحرقت فانطفت انوارها
والكهربا موجوده ما اتقطعتش
posted by استراحة محمد at 10:36 AM
4 Comments:
كلام جامد و في الجون
بالذات بتاعة موسى .. اه لو كلنا نرتاح زي موسى !!!
متشكرين يا بروفيسور على تعليقاتك .. وبالنسبه لأننا نبقى زى موسى ونرتاح .. ما اظنش
دى عاطفيه دى يامحمد؟!!!
ده انجليزى يا مرسى
Post a Comment
<< Home