Tuesday, February 26, 2008
كليوباترا ام سدر محروق
اول مرة شفت فيها المنظر الغبى ده كان فى بيت واحد صحبى
كنا قاعدين لقيته بيقولى شفت الرسمه الجديده اللى على علبة الكليوباترا ، قلتله لأ ، قالى طب استقبل يا معلم ، وراح مطلعلى العلبه ، قلبى اتقبض لما شفت المنظر حسيت بكمية اشمئزاز ما حستش بيها قبل كده ، ايه القرف ده ، الرسمة يا سيدى- لو ما كنتش شفتها – عبارة عن سدر محروق المفروض انه لواحد بيدخن سجاير .
انا والله كنت ناوى احط الصورة هنا للى ما شفهاش بس بينى وبينكو صعبتوا عليا فقلت بلاش تشفوها عن طريقى كل واحد يعرف بمعرفته ، المهم ، انا ما بقتش عارف احدد انا فى صف ان رسمة زى دى تطحط على علبة السجاير ولا لأ ،ساعات اكون مع وساعات اكون ضد ، بس كل اللى اعرفه ان الكليوباترا سجاير وان الميريت ومارلبورو برضه سجاير مش عسل سدر جبلى مثلا ، يبقى ليه الرسمة دى الاقيها على علبة الكليوباترا بس ، وللا حتى التفرقه بين الغنى والفقر فى السجاير كمان ، انا ما بقتش فاهم حاجه ، حاجه تخلى برج من عقل الواحد يطير ، معقولة فى كده فى الدنيا ، يعنى الغلبان الغلب حيفضل ماسكه حتى فى دى ، والغنى لازم يترفع ويتميز حتى فى دى ، ده مش بعيد يكتبوا على علب سجاير الاغنياء " مفيده جدا للصحة وتسبب النجاح " زياده فى الحرص على مشاعر السيادة ، رائع جدا اللى عمال بيحصل ده ، وسلملى على مصالح الناس عند الموظف الغلبان اللى قرفان من نفسه وكمان حيلاقى المنظر ده فى وشه .
posted by استراحة محمد at 9:46 AM
2 Comments:
انت عبقرى عشان بتعرف تستغل الضوع تطلع فكره00 بص كل الى اقدر اقوله ان الفكره عجبتنى اوى
اولا: كل شركه من حقها تحط الى عايزاه على العلبه بعد موافقه وزاره الصحه والتموين طبعا
ثانيا:كتر خيرها كليوباترا انها بتوعى الناس الغلابه الى انتا بتقول عليهم والى هما طبعا من اكتر مستخدميها وعايزه تحافظ على صحتهم وفلوسهم
ثالثا:الناس الاغنيا الى انتا بتتكلم عليهم دول مبيشربوش كليوباترا ولا السجاير العاديه دى دول بيشربو سيجار
ومش اى سيجار السيجا الكوبى
Post a Comment
<< Home