Saturday, March 1, 2008
وجهة نظر فى طفشان الحضرى
مش عارف ليه على طول بحس إن موضوع طفشان الحضري ده وراه دماغ نسوان ، بتخيل دايما الحضري ومراته قاعدة جنبه وعمالة تقوله العيال ، المصاريف ، وليه يكون عندنا اقل لما ممكن يكون عندنا اكتر ، وانسف حمامك القديم ، واستمرت عالحال ده – وكعادة النسوان – فضلت تتوغل وتنتشر لحد ما ودت الراجل ورا الشمس ، بدليل انه رجع اهه والدنيا مضلمة في وشه بعد ما اكتشف إن حواء نزلت ادم الأرض بعد ما كان في السما
posted by استراحة محمد at 8:59 AM
8 Comments:
أولا كلامك عنصري لأبعد مدى .. انت من نفسك كده قررت ان الراجل ده طالما عمل عمله سودا كده يبقى دماغ (نسوان) طيب مقولتلناش بالمره الدكر ده ليه سمع كلام النسوان دول
ثانيا أظن انك مسلم يبقى عيب أوي لما تقول ان حوا هي اللي خرجت آدم من الجنه الكلام اللي انت بتقوله ده مش موجود في أي أثر اسلامي ولو تتبعت الآيات اللي اتذكرت فيها القصة هتلاقي ان المتهم هو الشيطان اللي خرجهم هم الاتنين من الجنه
آسفه على حدتي في الكلام مع انها أول زياره ليّه هنا بس بصراحة كلامك نرفزني
فعلا أنا نفس السيناريو اللي انت بتقول عليه أنا بتخيله برضه كل ما بتيجي سيرة الحضري .. بس مش بتخيل مراته بس بتخيل أهله كلهم و هما بيقولوله امتى بقى هتشوف حالك و انت بقالك عمرك كله فاني نفسك في النادي و مخدتش حقك و الكلام ده
و الله أنا خايف بعد العمله دي نخسر حارس مرمى عظيم زي الحضري .. ربنا يستر من النادي الاهلي و ميكونش عقابه الدفن للأبد
أنا معاك يا شيريهان بس انت واخده الموضوع جد أوي كده ليه .. احنا بنمرح يعني !! و بعدين موضوع ان الزوجه تأثر على زوجها ده شيء طبيعي ممكن يكون تأثير سلبي وممكن يكون ايجابي .. بس متنكريش ان كلام الستات "بلاش النسوان عشان بتنرفزك" بيأثر على أتقلها راجل بغض النظر عن كونه "دكر" أو مش "دكر" و يا ستي سيبك من حكاية ادم و حوا .. انا مستعد أجيبلك قصص حقيقية من التاريخ قامت فيها حروب بين أمم و دول بسبب كلام " الستات " !!!!
انا ما قصدتش انى اكون ضد الست بكلامى انا زى ما قال سليكون مايند كده كنت عاوز اقول انى حاسس ان مراة الحضرى هى اللى اثرت عليه بالسلب .. عامة يا مراحب بيكى يا شريهان
كلام سيليكون مايند لطيف جدا .. فإذا كانت الستات سبب بعض الحروب فياريت تطرح الحبه دول من مجمل الحروب عبر التاريخ وشوف الرجاله عملوا كام حرب :) وانا مش بنكر ان الستات عملوا حروب بس منقولش ان حوا طلعت آدم من الجنه ..
ثانيا لما الحضري يطلع ويقول أنا مراتي هي اللي وزتني أعمل كده نبقى نتهمها انما مش لمجرد انه عمل عمله سودا دي تبقى بسبب مراته ماهو ممكن يكون تفكيره هو اللي هداه للموضوع ده وانا مبنكرش ان الزوجه لها تأثير على قرارات الزوج بس على أي أساس هنبني الافتراض ده في حالة الحضري .. ليه مثلا مقولناش انه أكيد كان قرار مشترك بينه وبين مراته علشان مصلحة عيالهم ؟ بدل ما نقول ان القرار كان زن نسوان
كده وصلنا لنقطة التقاء يا شيريهان .. أنا معاك في كل كلمة قلتيها
معتقدش ان الحكاية وراها ست بل سماسرة وحاقدين وطمع شخصي ويمكن شوية طموح وغرور.. ولو الحكاية وراه ستات فهي تبقى ادانة للبطل لأنه مشي ورا كلام الستات مش عذر ليه.
انا عجبانى المناظرة اللى بين سيلكون وشريهان .. وبالنسبه ليكى يا اميرة فهو فعلا حيبقى غلطان
الله..الله
Post a Comment
<< Home