Friday, March 21, 2008
اضحك عالدنيا
تخيل معايا واحد عاش عشان حلم محدد ، الحلم ده خده من كل الدنيا ، جرى وراه وسلم نفسه له ، الموضوع كان محتاج منه تلات سنين من السعي والكفاح عشان يحققه ، وفى وسط السنة التانية وقبل ما الحلم يوصل نهايته السعيدة ، مات ، تفتكر إيه الشعور ؟؟ ، صدمة في العمر اللي ضاع من غير فايدة ، أنا مش ضد إن يكون عند الواحد حلم وطموح ، بالعكس ، أنا بس بستغرب على اللي بيكتف نفسه في حاجة واحدة حتتحقق بعد سنين وهو مش ضامن يصحى تانى يوم عايش ، يعنى ليه اخد من الدنيا حاجة واحدة لما ممكن اضحك عليها واخد منها كل حاجة ، من الآخر كده الذكاء واحترام الموت وحقيقته الخالدة بيحتم على الواحد انه بجانب استعداده للمستقبل وطموحه منه لازم يعتبر إن اليوم اللي بيعيشه برضه له حلمه الخاص وتفاصيله البسيطة اللي المفروض يهتم بيها ، يعنى لو افترضنا إن الأيام عبارة عن قطع بازل بتكون صورة كبيرة في النهاية هي طموح الإنسان وحلمه ، لازم على ضهر كل قطعة بازل يكون فيه صورة كاملة خاصة بيها هي ولازم الإنسان يهتم بيها ويبص عليها
المستقبل رائع النظر له ، لكن الآن واللحظة اللي أنت عايشها واليوم اللي ممكن ما تعيش بعده برضه لازم ننظر له
خلى دايما قدامك حلم بسيط ومتعة بسيطة وحاجات بسيطة بتعملها ومش ياخدك منها الحاجة الكبيرة اللي انت عاوز تحققها ، كده يبقى انت ضحكت عالدنيا ولو العمر مش خدمك في الوصول لحلمك البعيد ، على الأقل انت عشت في كل يوم لحظات حلوة ومتعة بسيطة ، ولو قدرت تاخد عصفور اليد والعشرة اللى على الشجرة يبقى الله ينور وكده انت جبت النهائي ، ولو العمر مش ساعدك وما طلتش العشرة اللي على الشجرة ، يبقى على الأقل في عصفور في ايدك ما سبتوش ، بدل ما تطلع من المولد بلا حمص
posted by استراحة محمد at 10:27 AM
3 Comments:
سبحان الله انت أخد الكلام ده من على !لساني
مشكلة بعض الناس ( و أنا كنت منهم ) انهم بيركزوا على الأهداف و الي هما عايزين يوصلوله من غير ما يركزوا في الطريق اللي هيوصلهم .. و بالتالي بتبقى حياتهم عباره عن سلسله من الضغوط .. و ممكن جدا بعد كل الضغوط دي متوصلش بحاجه و تبقى انت كده فعلا طلعت من المولد بلا حمص .. جميل انك تكون صاحب حلم و حلم كبير كمان .. و جميل جدا انك تتعب عشان تحققه و توصله .. بس الأجمل و الأهم من ده كله ان طريقك و رحلتك للوصول ليه تكون ممتعة و لزيزه .. يعني ممكن تكون رحلتك طويلة و صعبة و متعبه لكن انت مستمتع بيها برضه .. ليه لأ ؟
هنشوف مقالاتك في الدستور امتى بقى ؟؟؟
بص اولا مفيش حد ادر انه يضحك على الدنيا وياخد منه كل حاجه ده اولا.
.ثانيا اى حد فى الدنيا بيحلم ساعة مابيوصل لحلمه مابيفتكرش الحظه الى حقق فيها الحلم على اد مابيفتكر الرحله الى قضاها فى الوصول للحلم..لان المتعه مش فى الوصل للكنز المتعه فى الطريق للكنز..الدنيا عمرها متديك كل حاجه لازم تاخد منك حاجه..ده اقتراحى فى القضيه..لكن..شكرا استاذى العزيز
معاك %100
بس دى معادله صعبه اوى,لما بتحط فكره فى دماغك وتحبها اوى وتكون عايز تحققها بتنسى اى حاجه حواليك,يعنى ياما تعيش اللحظه ياما تفكر فى الحلم
Post a Comment
<< Home