Sunday, March 9, 2008
تيتانيك النسخة العربى
أنا بحب فيلم تيتانيك جدا ، وبعتبره من أحسن الأفلام اللي شفتها في حياتي ، وأنا مش حتكلم عن الفيلم هو أصلا بيتكلم عن نفسه ، أنا بس عاوزك تتخيل معايا فيلم تيتانيك لما يكون فيلم مصري
أكيد الفيلم حيبقى اسمه الأمورة رشا على أساس إن المركب اسمها الأمورة رشا ، كمان قصة الحب حتبقى بين سعدية وحلمي ، وحلمي اكيد بيشتغل سمكري وبعد ما أتعرف على سعدية وراها صور العربيات قبل ما يشتغل فيها وبعد ما يشتغل فيها ، وسعدية أعجبت جدا بشغله ، كمان في مشهد البصق ، حلمي وهو بيبصق وقعت على راس عوف فيا عيني كل علقة ما كلهاش حرامي في مطلع وسعدية واقفة بتولول جنبه ، والسفينة أكيد غرقت عشان عوضين ولع فيها بسبب شعلة كان واخدها معاه عشان يعمل عليها شاي ، وقبطان المركب الحاج على حدفه من فوق المركب عشان يستاهل ، وأكيد طبعا الداخلية بعد كده اعتبرت عوضين مختل عقليا ، ومش محتاجين نقول إن فرقة الموسيقى في المركب ، الطبال وعازف الأرج والرقاصة ، جريوا على اوض الناس ساعة الغرق عشان يلموا اللي يقدروا عليه بفهلوة جينية مصرية ، وطبعا لما الرجالة على المركب عرفت إن الستات والأطفال هي اللي حتتنقذ الأول قاموا موتوا نسوانهم عشان ما يلقوش ستات فياخدوهم ، وفى الآخر كل اللي على السفينة ماتوا وما حدش نجا عشان بصراحة كلهم يستهلوا يولعوا بجاز وبالذات سعدية وحلمي
أحب اعرفكوا إن الفيلم بطولة احمد السقا ووفاء عامر ، بعد ما رفضت منى زكى الدور عشان فيه قلة أدب ، وطبعا مدحت صالح هو اللي غنى أغنية الفيلم ، والجرافيك أتعمل في نفس المكان اللي أتعمل فيه كرتون بكار والمغامرون الخمسة
الفيلم كسر الدنيا عشان الدنيا عندنا خربانة زى ما قال المغنى اللي مش عارف اسمه ، واعتبر النقاد فيلم الأمورة رشا هو فيلم الموسم ، وكالعادة استضافت هالة سرحان أبطال الفيلم وخلتهم يغنوا ، هو كده لازم تغنى ، ممثل مغنى بتاع بطاطا ، حتغنى يعنى حتغنى ، وسلامات يا سيما
posted by استراحة محمد at 10:19 AM
5 Comments:
الفلم حلو اوى بصراحه ..بس انا كان نفسى خالد صالح يكون البطل لايق عليه حلمى
بس مقلتلناش مين المخرج!!
اكيد السبكى
ما استبعدش والله يا دكتور احمد ، وفعلا خالد صالح ممكن يكون لايق عليه حلمى يا لوما
بجد موضوع لزيز
لا اللي تخيلته مشهد الواد الصغير اللي كان هيغرق و جاك راح عشان ينقذه
طبعا لو في النسخه العربي عمك حلمي هيلوش الواد من قدامه .. امشي يا ابن الكلب يلعن أبو اللي جابت امك اغرق بعيد عني
و لا مشهد روز و هي بتقطع الكلبشات اللي جاك كان مربوط بيها بالفاس .. طبعا كانت هتلوشة في وشه و الفيلم يقلب هندي بقى
بجد السينما عندنا مسخرة
بجد تنفع تكون بدال السبكى ايه الابداع ده ايه الفن ده عبقرى زمانك
انا بجد بتخيل الفيلم نسخة عربية
وخصوصا لما اضاف خالد صالح
ده هيبقى مولد وصاحبه غارق
امتى هيتعرفض الفيلم فى دور السينما
البوست جميل
ضحكة كتير بس للأسف ده حال السينما عندنا
جاتهم نيلة
Post a Comment
<< Home