Friday, March 7, 2008
رأى شيطانى
لما ربنا خلق ادم وأمر إن كل الملايكة تسجد له ، رفض إبليس وركب دماغه وقال مش لاعب ، قصدي مش ساجد ، كان عنده وجهة نظر ساعتها إن ادم ده ما يستاهلش وحيعمل دوشة عالأرض ووجع دماغ عالفاضى ، كمان كان شايف انه في كل الأحوال هو أحسن من ادم ،يبقى ازاى يسجد للي اقل منه من رأيه ، إلا انه في نفس الوقت كان عارف إن رفضه أمر ربنا مش حيفوت بالساهل وأكيد نهايته حتبقى سودة ، عشان كده وعلى طريقة عليا وعلى اعدائى ، طلب إبليس من ربنا انه يديله الإذن يغوى ابن ادم ، وفعلا ربنا أذن له بوجود استثناء بسيط " إلا عبادك منهم المخلصين " ، كان غرض الشيطان من طلبه- بعد ما عرف إن نهايته كده كده مش ولابد – انه يثبت لنفسه على الأقل انه رأيه في الإنسان كان صح ، وفعلا بدأ الشيطان مشواره المراثونى مع الإنسان من أول ادم وحوا ولحد النهاردة ، مر عليه أجيال وأجيال حروب واستعمار ظلم وطغيان ديكتاتوريه وانحلال ، ناس خربتها وقعدت على تلها وناس مش رضيت حتى تسيب التل فهدته بالمرة ، صحيح كان في خير بس كان عامل زى ناموسة بتذن في ودن الشر مش اكتر
لو بصيت في تاريخ البشرية حتلاقى إن سنين السلام ممكن تعدها على صوابعك ، بلاش يا سيدي تاريخ البشرية والكلام الكبير ده ، بص حوليك كده حتلاقى الناس عمالة تاكل في بعض وماحدش سايب حد في حاله ، وكمية نكد وغم ولا كأنك بتتفرج على مسلسل خليجي ، السؤال هنا بقى اللي بيفرض نفسه وعمال يتنطط قدام عنيه ، وداوش دماغي بقاله كام يوم
يا ترى يا هل ترى الشيطان كان على حق في رأيه فينا واحنا فعلا ما نستاهلش اى حاجة ؟؟
لو عندك اجابة برجاء ارسالها في جواب عليه طابع بوستة على شكل عفريت .. وشكرا
posted by استراحة محمد at 8:54 AM
10 Comments:
هوه ممكن فعلا يكون معاه حق بس النقطه دى احنا عرفنها اصلا ربنا خلقنا اصلا كده حتى معظم وصف بنى ادم فى القران تلاقى ظلوما جهولا,خلقناه فى كبد عظيم
الشيطان مبيخلقش فينا حاجات وحشه الشيطان بيكبر الحاجات الوحشه الى فينا
بس حتى لو الشيطان فعلا كان جدير انو ينزل الارض بدل مننا مكنش عمل الى عمله وعصا ربنا(محدش احسن من حد(
ملحوظه:ملقتش ولا طابع بسطه عليه صوره ابليس فخليت الراجل يفكهولى باربع عفاريت
الحوار الشيطاني الرباني ده من أكتر الحاجات اللي بتخليني أقف و أفكر عندها كتير و من احد الاسباب اللي كانت هتوديني في داهية في يوم من الايام ..
بص بقى هو الشيطان عنده حق و في نفس الوقت معندوش .. هتقولي ازاي , هقولك هو عنده حق في معرفته بضعف الانسان و انه "طيشه" يعني حبة زن شيطاني يخلوه يروح في داهية و يعمل أشنع الأفعال .. و اللي يثبتلك ذكاء الشيطان كمان و انه مش بيتكلم كده و خلاص "الا عبادك منهم المخلصين" .. تحس هو عارف هو بيتعامل مع مين ( ودي حاجه تجيبلك عته مغولي .. ما علينا )
لكن هو معندوش حق في وجهة نظره اللي بتقول ان الانسان مايستهلش حاجه .. أولا ده أمر رباني و ربنا أعلم بشؤون خلقه ( دي الاجابه اللي تريح الدماغ) .. لكن لو عايز تفكر شوية هتلاقي فعلا الانسان يستاهل باقي المخلوقات تسجد له و تضربله تعظيم سلام كمان .. فهو حامل الأمانة, هو المكلف بالطاعة و المبتلى بعشق الشهوات .. هو بطل المسلسل و نجم الفيلم و أساس الاختلاف .. هو اللي خلى للشيطان لازمه في يوم من الايام !
أعوذ بالله من الشيطان الرجيم
عجبتنى اوى يا شريف حكاية ان الانسان هو اللى خلى للشيطان لازمة .. شكرا على الفكرة
اعوذ بالله من الشيطان الرجيم فعلا يا انونيموس ولو انا مش فاهم تقصد ايه بالظبط
انا محتار فى الموضوع ده بصراحه
الى الاخ اسلام:البيه الحمار قاعد بيهز دماغه..انتا بتهز دماغك على ايه ياله
وحيات امك منا سيبك
صلوا عالنبي يا رجاله مش كده
حقك عليا يا عم اسلام
بالهداوه بس يا ابو حميد الراجل ماغلطش برضه ده بيقول رأيه يعني
بوسوا روس بعض يا ولا مش تضايجوا بعض
لا حول ولا قوه الا بالله
Post a Comment
<< Home