Monday, April 14, 2008
MY TAG
اولا احب اقول ان فكرة التاج دى فكرة جامدة جدا ، وبقول للشخص اللى اخترعها – واللى أنا ما اعرفوش – انت بجد دماغك حلوة قوى
ثانيا أنا هاخد التاج ده بمعناه العربى ، فهو فعلا تاج فوق راسى لسببين
اولهم انى الاقى صاحب عمرى دكتور احمد مخترنى من ضمن الناس اللى سلملهم التاج ، وده يعتبر شرف ليا من شخص أنا بتشرف انه صحبى
ثانى الأسباب انى الاقى اسمى محطوط مع اسماء محترمة جدا ، بداية من سمراء صديقتى الودودة ذات الكلمات الفياضة بالأحساس ، وصاحبة الأسم الرقيق كنارى اللى طول ما أنا في مدونتها والابتسامة مش بتفارق خدى من اسلوبها الساخر الرائع ، وايضا بروفيسور شريف صاحب مدونة اختلاف واللى أنا بعتب عليه انه ناسى مدونته حبتين الايامدى وحرمنا من افكاره اللى أنا عارف انها عظيمة ، اصل ده برضه صاحب عمرى وانا عارفه يا جماعة
كمان الشاب الثائر مصطفى صاحب القصص الجميلة والحالمة والمتنوعة الأفكار واللى أنا بحب مدونته جدا
احب اضيف برضه ان مدونتى المتواضعة عالمها محدود ، واخترت اللى هسلمهم التاج بعد تفكير عميق وناس أنا فعلا بحب مدونتهم ، وكمان بقول للناس اللى اخترهم دكتور احمد قبلى لأهدائهم التاج انى اتحرمت من شرف اهداء التاج ليكو
كفاية رغى ونخش فى قواعد اللعبة اللى جرت العادة على وضعها
اذكر عشر اشياء عن نفسك
اختر خمس اشخاص تهدى لهم التاج
لا تهدى التاج لمن اهداك اياه
عرف اللى بعتلك التاج انك اهتميت ونزلته عندك
نخش بقى في الموضوع ونقول عشر حاجات عن النفس بتاعة الأنا
اخوكو ربنا نعم عليه بنعمة كبيرة جدا اسمها صحاب عمر ، صحابى من وانا لسه بشيل الزمزمية ولحد النهاردة ، صحابى واخواتى احمد وشريف واسلام ، الأكسجين بتاع حياتى
اخوكو شخص بيحب الخيال جدا ، لدرجة انى عندى حياتين ، حياة بعيشها في الواقع ،وحياة تانية عايشها برضه بس في خيالى ، وكل حياة مستقلة بذاتها ، بس ده برضه ما يمنعش ان احيانا الحياتين بيتقاطعوا في لحظة ما
اخوكو جرب الحب مرة واحدة في حياته وربنا ما كرموش ، عرف يعنى ايه عذاب ، عرف يعنى ايه تبقى عاوز تنسى حد ومش قادر تنساه ، مش قادر بمعنى مش قادر ، عرف معنى كلام حليم لما غنى ، لست قلبى اذا انما انت قلبها
اخوكو بيحب القراية بشكل مش طبيعى ، لدرجة انى بفكر اجيب مكتبة في شقتى في المستقبل وعلى اساس لونها اظبط بقية البيت
اخوكو نفسه يبقى عنده عيل ، ولد او بنت مش هتفرق ، يعلمه كل حاجة في الدنيا ويربيه عشان يبقى حد يغير البلد دى ، يربيه بطريقة تخليه يقف قدام ربنا وراسه مرفوعة انه علم بني ادم صح
اخوكو بيتعلم في تجارة انجليزى وما بيعرفش يحسب 1 + 1 غير على الالة الحاسبة ، الرياضة بالنسبالى بعبع
اخوكو عمره ما انكسر لحد ، ولو حصل في يوم هيموت نفسه بعدها
اخوكو بيعشق التغيير والانطلاق وطول الوقت بيحب يعمل حاجة جديدة ، ويا سلام لو كان صحابه معاه فيها ، يا سلاااااااااااااام
اخوكو بيعشق ام كلثوم ، وبيعتبر ان عبقريه الجمال هى سعاد حسنى مش في مصر بس ده في العالم كله ، وده رأيى
اخوكو عمره ما فكر في الحاجات الحلوة اللى جواه ، بس عارف كويس اوى ايه الحاجات الوحشة ****************
دلوقتى جه وقت اهداء التاج ، استلموا منى يا جماعة
دينا .. ضحك ولعب وجد وحب
احمد العجوز .. معانا الخير في تسعة
مدحت محمد .. البصيرة
سمسة .. اشكى لمين
نورا .. صعبان عليا حالنا
23 Comments:
خلينى اول تعليق
وانا بجد سعيد باختيارك بطريقة لاتوصف
بس تعرف
اصعب تاج
لانك هتتكلم فيه عن نفسك
كويس انا عرفت شخصيتك من خلال اجاباتك
بجد معجب بشخصيتك الحالمة
حسيت فعلا انك حبيت بجد
وحسيت المك اوى
مفيش حد خيالى بيحب الرياضيات على فكرة
وعشقك لام كلثوم
وسعاد
دليل على رومانسيتك واحساسك العالى بجد
الف شكر والف تحية ليك
اول مرة ادخل مدونتك واشعر بالتعب
اتعبتني يا صاحب الاستراحة
شرف لي هذا التاج ليس لكونه تاج ولكن لانه منك
اصعب شئ ان تجعل الشخص يتحدث عن نفسه هذا اصعب شئ علي بجد
ادعيلي بقي كتير
العجوز
انا بالنسبالى عشان انا صحبك واحنا عشرة عمر فطبعا انا ممكن ازود على الكلام ده حاجات كتير اوى عايزالها يجى اربع خمس مدونات جمب بعض
بس بصراحه انا باعتبر ان معرفتى بيك دى كنز خصوصى لواحدى انا ومش عايز حد يشاركنى فيه
والجميل باه فى التاج بتاعك انك سبت بصمتك عليه,مش مجرد تاج زى اى تاج اتعمل
براعتك فى الكتابه واضحه اوى فيه
ده فعلا تاج دهب والماظ
جميل إن أول تعليق ليا عندك يكون على تاج لأن التاجات دي إختراع هايل جداً
.,...
مع إني لفت إنتباهي موضوح الحياة بتاعة الخيال
إنت تقصد أحلام يقظه وكده ولا إيه
لوكان قصدك كده
أعتقد إن الخيال بالكم ده مش كويس وضار جداً
اجمل تاج قرائته
مش علشان التاج نفسك ولا علشان اجاباتك واوو
لا علشان لما شفتك بتتكلم عن نفسك
عرفت ان في واحد في الدنيا دي بيشاركني
حاجات كتير
يشرفني ان ادعوك انك تكون واحد من التسعة اللي بيسعوا في الخير
تسعة في الخير
بعدين في عيد ميلاد مدونتي قريب هقلك ليه هما تسعة في الخير وسر التسعة
لك مني كل الحب والود
العجوز
اللى منورنى لأول مرة مدحت
احب اقولك انى لما دخلت مدونتك عجبتنى فعلا .. ولقيت نفسى بخرج من موضوع بخش فى موضوع ومش اكتفيت بأول موضوع بس
افكارك جامدة جدا ويشرفنى انى اهدى التاج لحد جامد زيك
تحياتى ليك
اللى عجبانى دماغه احمد العجوز
انت هتقولى على التعب لما تيجى تكلم عن نفسك .. ما انا كنت لسه فيه
انت حد رائع بجد ومدونتك من المدونات الجامدة ، والشرف ليا انا انى اسلمك التاج
وبدعيلك يا كبير
صاحب الليلة من اساسها بالنسبالى عمو احمد
ما تعرفش كلامك ده اد ايه اثر فيا ، احنا ما بنعدش نشكر فى بعض واحنا مع بعض ، بس كل واحد من جواه عارف التانى بيحبه اد ايه
ليا الشرف انى اكون صحبك اللى بتحبه ، وانت عارف احمد بالنسبالى ايه
ضيفى للمرة الأولى هيومن
منور يا كبير فى استراحتى ، واتمنى تكون عجبتك ، وتكرر زياراتك
تحياتى ليك
السلام عليكم ورحمة الله وبركاته
محمد ياصاحب الاستراحه (وعايزة ه اقولك ليه انا بسميك كده اولا لان كتيير من المدونين اسمهم محمد
وثانيا لان اسم محمد من او- الاصح- احب اسم الى قلبى
)
نيجى بقى للشرف العظيم ده ,وما
كنت احلم به وما كنت اظن ان مدونتى المتواضعة تخطرعلى بال احد!!
ولكنه الفضل من الله
فلك الشكر يارب
واستأذنك فى الرد عليه
بعد حين (بصراحة الاسئلة صعبه قوى ولازم الواحد يكون مذاكر ولا ايه رايك؟؟
مرة تانيه شكرآ ياصاحب الاستراحة
وتسلم من كل شر
norahaty
طبعا فى الاول لازم اشكرك على كلامك الجميل عنى وحسن ظنك بيا . تانى حاجه هى شهادة حق قدرت استشفها من معرفتى القصيرة المدة بيك وهى انك بنى ادم عشرى جدا وصاحب صاحبك يعنى . دايما بتسئل و ودود ودايما بتكون زوق فى ردودك ودة طبعا شئ جميل
بس يخوف يا محمد . انا مش هعمل عليك كبيرة واقولك بقى ان دة غلط وكدة . لا. انا بس هقولك خد بالك اوى عن كدة احوال الدنيا بقت تخوف بالنسبه للاشخاص الحالمين اللى زيك
لكن عموما ربنا يوفقك وتفضل برومانسيتك دى والدنيا لا تجبرك على تغيير طبعك الجميل دة
بجد شرف ليا انك تهدينى التاج و انى اكون اول اسم فى وسط عتاولة و جبابرة تدوين...و انت نفسك جامد جدا فى التدوين فدا لوحده شرف ليا....و انا كمان اضم صوتى لصوتك ان فكرة التاج دى فكرة عبقرية و دلوقتى حالا حجاوب عالتاج الغالى دا فى مدونتى
احلى حاجة عجبتنى فى اجاباتك..حجيب مكتبة و اظبط لون الشقة عليها
ههههههههههه
تحياتى
صاحبة العلم المرفرف .. نورا
انا زى ما قولت فى التاج انى اهديت التاج لناس انا بحبهم فعلا وبحب اسلوبهم فى التدوين ، وانتى اسلوبك ملفت ومدونتك من المدونات اللى بعتز بيها
عاوز اقولك لا شكر على واجب ، انتى فى نظرى تستحقى التاج
صاحبة الاسم الرقيق .. كنارى
اولا متشكر جدا على حسن ظنك بيا ، وكلامك الجميل ده
ثانيا ما تخفيش يا كبيرة ، احنا جدعان اوى
الوردة الحمراء .. دينا
الشرف ليا انا يا دينا
وانا مبسوط جدا انك قبلتى اهدائى وان شاء الله ما يكونش ده اخر المطاف
تحياتى ليكى
ياااه دانا اتاخرت خالص فى كتابة التعليق
اعذرنى يامحمد بس كل ما ادخل مدونتك
اصاب بالسكته الكلامية وأجل تعليقى
اولا شكرا على الكلام الحلو اللى قلته
وده المنتظر منك انو مبيطلعش من
كيبوردك غير الكلام الانيق المترتب
طبعا فى كل اللى قلته انا كنت اعرف حاجات عنه واللى كنت اعرفه حبك للقراية والصداقة اللى بتجمع بينك وبين احمد وشريف واسلام
اما الباقى عرفته منك
وكل اللى اقدر اقوله ربنا يحرسك
صديقتى الودودة سمراء
يارب تكون اتكشفتلك حاجات تانية فى شخصيتى ، جميل ان الواحد يعرف ابعاد شخصية الحد اللى بيتواصل معاه
متشكر جدا عالدعوة الجميلة دى ، والكلام الجميل دايما مصدره شفايفك
اولا انا بشكرك على الاهداء
و ده شئ يشرفنى
وبيسعدنى متابعتك لمدونتى
تحياتى
الشرف ليا انا يا سمسمة
تحياتى ليكى
انا كمان شايفة انه جميل جدا يكون أول تعليق ليا هنا على تاج..وللصدفة يكون هو نفس التاج اللي لسة منزلاه على مدوتي من 10 دقايق....بس بصراحة بجد اجاباتك عجبتني اوي...عجبني جدا انك عمرك ما انكسرت..وانك شايف ان في الحب عبد الحليم ماغلطش لما قال (لست قلبي انما انت قلبها)...وعجبني اكتر واكتر انك بتتمنى يبقى عندك ولد او بنت تربيهم كويس.بجد دي جامدة موووووووووت......يا ريت تشرفني بالزيارة.....مدونتك حلوة جدا....
منورة دواير
ان شاء الله تلاقينى عندك
اتمنى زياراتك تكرر
وشكرا جدا على كلامك الرقيق
ربنا يكرمك ويوفقك
انت حد حلو قوي
ربنا يخليك يا مصطفى باشا
ما تحرمناش من وجودك فى استراحتنا
Post a Comment
<< Home