Wednesday, April 16, 2008
فقرة اعلانية
بفتح الجرنال يا جماعة فلقيت موبينيل عاملة اعلان ماسك صفحة بحالها
الاعلان بيقول ان شركة موبينيل تعاطفا مع الشعب المصرى الغلبان اللى مطحون من الغلاء وعلى طريقة تعاطفك واحده مش كفاية قررت انها تزكى عن اموالها وكله بثوابه وتخفض سعر الدقيقة ل 20 قرش
كله ده ممكن يتفوت ونقول كتر خيرك يا موبينيل وهعمل نفسى مصدقك، لكن انى الاقى الاعلان مقتصر على ان الاتصال يكون من موبينيل لموبينيل فده حاجة موتتنى على نفسى من الضحك
يعنى اللى معاه خط فودافون جنسيته هندى يعنى ، ما هو مصرى برضه والمفروض ان التعاطف يشمله ، ولا ما كنش ليها لازمة الدوكة دى كلها ونقول عرض جديد لموبينيل وخلاص ، احترموا عقولنا شوية بقى
وبما انى اتكلمت عن الاعلانات وفى عندى شوية حاجات عاوز اقولها في الموضوع استغل الفرصة واقولها ، اصل أنا راجل استغلالى والحياة فرص ، وما صدقت مسكت المايك
اولا حكاية ان اعلان يفضل يتكرر على بطال طول حلقات المسلسل مثلا ، او مع كل ماتش في بطولة معينة ، الحكاية دى بتجننى وبتثير اعصابى ، بالذات لما الاقى نفسى حفظت الاعلان من التكرار ، وانا مش عاوز احفظه ، هستفاد ايه لما احفظ اعلان ، وساعتها بحس انى نفسى اولع في ذاكرتى اللى مش عارف اسيطر عليها
مش ممكن اعلان يتكرر في حلقة واحدة من المسلسل خمس مرات ، واضرب في عدد حلقات المسلسل ، يعنى منتهى الملل اللى في الدنيا
كمان الاعلان ممكن يبقى حلو ، لكن مع الملل بيتحول لحاجة رخمة جدا والزهق ما يصدق يلاقى حاجة يتغذى عليها
( الكهربا قطعت 3 ساعات ، ولما رجعت كملت ، يا مسهل )
كمان موضوع الراعى الرسمى دى بيموتنى على نفسى من الضحك ، تلاقى بيبسى راعى منتخب مصر ، وبيبسى دى مش شركة صاحبها شهيد في حرب اكتوبر مثلا بيحب مصر قوى ، دى شركة عالمية وممكن تلاقى بيبسى راعى منتخب فرنسا برضه
وانا بقول لأى شركة ، قبل ما تكونى راعى رسمى ، راعى ربنا في عقولنا الله يكرمك
كمان ومازال الحديث عن الاعلانات ، لو شفت اعلانات قناة دبى مثلا ، على طريقة الماس يظل للأبد وما شابه ، هتعرف ان إحنا غلابة قوى
إحنا لسه عايشين في اعلان بونكس اللى بيوفر ربع جنيه ويجبلك الست وهى سعيدة جدا انها وفرت ربع جنيه ، ويكون شعار الشركة نضافة ريحة توفير
وبمناسبة الكلام عن ثقافة الشعوب اللى ممكن يوضحها الاعلان ، شوف الاعلانات الاجنبى في الدول المتقدمة اللى بياكلو مع الكباب طحينة ، هتلاقى الاعلان فيه فكرة وبيخاطب عقول بجد حتى الاعلان المضحك بيكون فيه شغل عالى قوى
انما عندنا ، أنا مش هتكلم ، انت مصرى وابن مصرى واكيد عارف الحال عندنا ازاى
واحيانا بتلاقى اعلانات حلوة عندنا ، يعنى أنا مثلا بحب اعلان ( دى اس ال ) بتاع الراجل اللى كل شوية يقع في حفرة ، اهو ده ضحكنى بجد
كمان اعلان موبينيل بتاع الو اقاليم والفلكلور الشعبى بتاع كل اقليم ، وده حسيت انه معمول صح ودخل دماغى
وبرضه مجموعة اعلانات هذه حياتى وهذا دينى ، اعلانات هادفة جدا ومؤثرة جدا
اما بقى الاعلانات الهايفة فما تعدش ، بداية من اعلانات السمنة بتاعة حسن حسنى اللى بحس بعدها ان في سمنة على جسمى ، ومجموعة اعلانات ميلودى واللى أنا بسأل لحد النهاردة هى البت ما سبتوش ينتحر ليه ويريحنا ، وبجد حسيت انها ظلمتنا ( ولو انها من ابو اخر ) ، والواد ابنهم الاسود ده طول الوقت بحس انه عملهم الاسود اللى عملوه فينا
كمان الاعلان بتاع القراية واللى لقيت فيه تامر حسنى بيقولى يالا نقرا ، طب والنبى ده كلام ، إلا اذا كنا هنقرا كتاب فضايح البت اللى اخدت كل حاجة في عهدك منها
في النهاية جه على دماغى حوار بنتريق بيه أنا وصحابى على الاعلانات
كنا بنقول انه في الحرب العالمية التالتة هتلاقى الجنود لابسة هدوم عليها من ورا كلمة جهينة مثلا
وفودافون هتبقى الراعى الرسمى للحرب العالمية التالتة
وهتسمع اعلان يقولك ، نزل احدث الكليبات والفيديوهات للحرب العالمية التالتة الان على محمولك فقط اتصل على رقم كذا
أنا خلصت كلامى ومضطر وامرى لله اسيب المايك للناس عشان تعلق ، ولو انه والله مش هاين عليا
posted by استراحة محمد at 4:04 PM
12 Comments:
والله يابنى انتا جيت على موضوع مستفز فعلا وهوه موضوع الاعلانات
انا مش حانسى ابدا الاعلانات الى كانت بتنزل وسط الماتشات بتاع الامم الافريقيه والى من غير مبالغه الواحد كان بيلاقى نفسه بيرددها غيبا غصب عنه
بس ده نتيجه جشع القنوات الى كل همها فى الحياه تجمع اكبر عدد من الاعلانات وتحقق مكاسب وهميه
وبجمله الاعلانات نسيت انتا اعلانات الى بتنزل على ميلودى زى اعلان شوجر الى هوه مفروض دوا لعلاج السكر مع ان الطب الحديث لسه متوصلش لعلاج السكر لغايه دلوقتى ومعرفش هما عملو العلاج ده ازاى
يعنى بيقرفك باعلان طويل عريض وكمان بيضحك عليك..قمه الاستفزاز
اما بالنسبه لاعلانات دبى فكل برغوت على قد دمه,الناس هناك عملو استراحه الاتوبيسات مكيفه فطبيعى اعلاناتهم تكون على قد مستواهم المادى
انما احنا غلابه يبقى ننزل اعلانات على قد مستوانا
ههههههههه يخرب عقلك يا محمد بجد بجد بأمانه ربنا مش بلاقى كلام ارد بيه عليك معظم الوقت غير انى اضحك من شدة غيظك اللى باين من كلامك
وبعدين يعنى انت شايف انهم لو عرضو فى الاعلانات بتاعتنا فمصر هنا اعلانات لازوردى واعلانات الماس يظل اللى الابد حد فينا هيشتريها ؟؟تصدق بالله يكش حتى الماس يعيش مليون سنه وانا مالى؟اعرفه؟يعرفنى؟بينه وبينى حاجه بعد الشر؟ولا حتى هحطه على جلدى
يبقى مالها بقى السمنه والزيت وصابون الغسيل . اللى انت بتقولو دة بطر على اعلانات بلدنا واوعى تنق فيها بقى احسن تزول ونبقى نتيمم بس من الفقر
موبينيل بتتعاطف مع الشعب المصرى
ده احنا اتفضحنا اتفضحنا يعنى
على العموم دى تجارة
ومضاربة مع شركة فودا واتصالات
هما يتعاطفو معانا واحنا نتعاطف معاهم ونشترى
موضوع الاعلانات
لولا الاعلانات مافتحت القنوات
دى حاجة معروفة
تحياتى ليك
حبيب قلبى عمو احمد
عندك حق فى موضوع اعلان شوجر ، اهو الاعلان ده برضه والكتيبة بتاعته يموتوا من الغيظ
وبانلسبة لموضوع اعلانات دبى ، فأنت تقدر تقيس امكانيات الشعب وحالته الاقتصادية من الاعلانات ، ما هى الشركات مش بتلعب وعارفه نفسها هى بتخاطب مين
يعنى مثلا فى الدول العربية لو بيبسى عالمة مسابقة تلاقى جايزتها خرافية
لكن عندنا الجايزة بتبقى عجلة والناس بتبقى هتموت بعض عشان العجلة
صاحبة الاسم الرقيق كنارى
ههههههههههههههههه ، والله عندك حق ، الشعب ده بعد كده هيتيمم من الفقر
هههههههههههههههههههههه
مدحت بيه محمد
منورنى يا باشا فى استراحتى
اتفضحنا لأن زى ما قلت لأحمد الاعلانات بتعبر عن حالة البلد الاقتصادية
ربنا يستر
بص انا مرتاحة من كل الهم ده بشوف التليفزيون فى المناسبات السعيدة بس ده ميمنعش ان لما بتكون امى مشغلة القناة الرئيسة بتاعة المسلسلات اللى اكل وشرب عليها الضهر واتعرضة كتير بس عشان يحسسونا باننا شعب معاقب ونستحق انهم يمللونا بيعرضو المسلسلات دى لا والطريف الظريف اللى زى ما قلت انت انهم اصلا هدفهم من القناة دى انهم يذيعو اعلان والفاصل الاعلانى وسطه فاصل اعلانى وبيعرضو على الماشى كام دقيقة فى المسلسل عشان بس ميكسفوناش
وكذلك باقى القنوات
هما بيعملو فينا كده ليه
على فكرة فى اعلان شغال عن الفلتر عشان تلوث الماء ياريت يكون فى فلتر للأعلانات كمان عشان عقلنا اتلوث
بجد حرام عليكم يا جماعه , ده حتى ام نبيل ( موبينيل يعنى
طيبه وبنت ناس
ده من كتر الاقبال عليها عملت خط 017
يعنى عندها 012 و018 و 017
بجد بجد شركات الموبايل لها حق تعمل فينا اكتر من كده
اذا كان كل واحد معاه اكتر من خط
طيب ليه ؟؟؟ ماتعرفش
كل حاه فى بلدنا بتقل الا الكلام هو اللى بيزيد
يبقى لازم الشركات دى تبهدلنا براحتها
كنا عايشين كويس من غير موبايل وكان عادى , لكن التكنولوجيا بتاخد معانا حقها اوى فى الحاجات التافهه
متهيألي انك شوفت الأعلان بتاع هوندا
انا شوفته في احد المدونات بصراحة انبهرت خصوصا لما عرفت امه مش معمول جرافيك وانه تصوير حقيقي وانهم جربوا 500 مرة علشان يطلعو للتصويرالنهائى الناس دي بتفكر وبتحاول ومش بتخاف من التجربة لكن عندنا عقلية هابلة جدا بينتج عنها اعلانات اهبل
فاكر اعلان بتاع سمن الطاهي
عملته رز ماكلش رز عملت مكرونة بردة ماكلش مكرونة
موضوع جامدا . .. تحياتي ليك
انت نسيت اهم اعلان شوجر..افضل منتج لعلاج السكر
هههههههههههههههههه عندك حق والله يا محمد
حلو قوى موضوع الاعلانات دة لكن فى حاجة يا محمد موبينيل مش بتعمل كدة علشان الطبقة الفقيرة ولا علشان هى عارفة ان الناس تعبانة وتعاطفا زى ما انت قولت ... ابدا موبينيل بتعمل كدة لانها عارفة كويس مدى فلة وعى المصريين فى تصرفاتهم واتصالتهم الهتفية الكتير اللى عمال على بطال .. واهو الدقيقة ب 20 قرش وكل واحد يشوف مين اللى اللى بقالة كتير متصل بية وهو موبينيل ويكلمة ويطمن علية وهكذا ...
يا محمد الشركات دى بتبيع الهوا بمعنى الكلمة وحتى لو وصلت الدقيقة لأقرش بس هى كسبانة مليون المية وكمان فى حاجة مهو نجيب سويرس راجل مصنف فى اغنى اغنياء العالم يعنى كدة كدة مش محتاج ومش فارقة معاة ...
احنا غلابة يا عم محمد
Post a Comment
<< Home